Read Mizo_Old_version BU KHATNA CHRONICLES 15 Bible Online

BU KHATNA CHRONICLES 15 - Mizo_Old_version bible

BU KHATNA CHRONICLES 15

¹Tin, Davida chuan Davida khawpuiah chuan inte a sa a; tin, Pathian bâwm awmna hmun a buatsaih a, puan in a zârsak a.

²Tichuan, Davidan, “Pathian bâwm hi Levi-hote chauh lo chuan tu mân an zâwn tûr a ni lo ve; Pathian bâwm hi kumkhuaa zâwntu leh a rawngbâwltu atâna LALPA thlan an ni e,” a ti a.

³Tin, Davidan LALPA bâwm a dahna tûr hmun a buatsaihnaa zâwn chho tûrin Jerusalem-ah Israel-ho zawng zawng chu a khâwm a.

⁴Tin, Davidan Arona fate leh Levi-ho a khâwm a:

⁵Kohatha thlahte zînga mi, puipa ber Uriela, a unaute nên za leh sawmhnih;

⁶Meraria thlahte zînga mi, puipa ber Asaia, a unaute nên zahnih leh sawmhnih;

⁷Gersoma thlahte zînga mi, puipa ber Joela, a unaute nên za leh sawmthum;

⁸Elizaphana thlahte zînga mi, puipa ber Semaia, a unaute nên zahnih;

⁹Hebrona thlahte zînga mi, puipa ber Eliela, a unaute nên sawmriat;

¹⁰Uziela thlahte zînga mi, puipa ber Aminadaba, a unaute nên za leh sâwm leh pahnih.

¹¹Tin, Davidan puithiam Zadoka leh Abiathara leh Levi-ho Uriela te, Asaia te, Joela te, Semaia te, Eliela te, Aminadaba te a ko va,

¹²an hnênah, “Nangni hi Levi-ho puipa berte in ni a; Israel-te Pathian, LALPA bâwm chu a hmun ka buatsaiha in zâwn chhoh theih nân nangni hi in unaute nên intithianghlim rawh u.

¹³A tîrah pawh khân nangnin in zâwn loh avângin LALPA kan Pathian chu kan chungah a ṭuan a nih kha, thupêk angin kan lo ti si lo va,” a ti a.

¹⁴Chutichuan, Israel-te Pathian, LALPA bâwm chu zâwn chho tûr chuan puithiamte leh Levi-hote chu an intithianghlim a.

¹⁵Tin, LALPA thupêk Mosian a sawi ang khân, Levia thlahte chuan bâwm chu a zâwnfung chuan an zâwn ta a.

¹⁶Tin, Davidan Levi-ho puipate chu an unaute zînga mi hla sa mite, thil tum rîk mi perhkhuang te, ṭingṭang te, dârbenthekte nêna ring tak leh hlim taka hla sa tûrin a ruattîr a.

¹⁷Chutichuan, Levi-ho chuan Joela fapa Hemana te, a unaute zînga mi Berekia fapa Asapha te, an unau Meraria fapate zînga mi Kusaia fapa Ethana te an ruat a.

¹⁸Tin, an unaute zînga mi Zekaria te, Bena te, Jaaziela te, Semiramotha te, Jehiela te, Unia te, Eliaba te, Benaia te, Maaseia te, Matithia te Eliphelehua te, Mikneia te, kawngkhâr vêngtu Obed-edoma leh Jeiela te nên an ruat bawk a.

¹⁹Chutichuan, hla satuho Hemana te, Asapha te, Ethana te chu dârbenthek ring taka bêng tûra ruat an ni a;

²⁰tin, Zekaria te, Aziela te, Semiramotha te, Jehiela te, Unia te, Eliaba te, Maaseia te, Benaia te chu perhkhuangte nêna Alamoth sa tûra ruat an ni a;

²¹tin, Matithia te, Eliphelehua te, Mikneia te, Obed-edoma te, Jeiela te, Azazia te chu ṭingṭangte nêna Sheminith saa hmahruai tûra ruat an ni.

²²Tin, Levi-ho puipa Kenania chu hla sa hotu a ni a, a thiam avângin hla hruaitu ber a ni.

²³Tin, Berekia leh Elkana chu bâwm vêng vêltu an ni.

²⁴Tin, puithiamho Sebania te, Josaphata te, Nethanela te, Amasaia te, Zekaria te, Benaia te, Eliezera ten Pathian bâwm hmaah chuan tawtawrâwt an tum a; tin, Obed-edoma leh Jehia chu bâwm vêng vêltu an ni bawk a.

²⁵Chutichuan, Davida leh Israel upaho leh sipai sâng hotute chu, Obed-edoma ina mi LALPA thuthlunna bâwm chu zuk la chho tûrin hlim takin an kal ta a;

²⁶tin, heti hi a ni a, LALPA thuthlunna bâwm zâwntu Levi-hote chu Pathianin a ṭanpui a, sebâwngpa pasarih leh berâmpa pasarihin an inthawi a.

²⁷Tin, Davida leh bâwm zâwntu Levi-ho zawng zawng leh, hla satute leh hla sa hotu Kenania te chu puan zai sînin an inthuam a, Davida chuan puan zai sîn, puithiam kawr a ha bawk a.

²⁸Chutichuan, Israel mi zawng zawng chuan au dur dur chung leh, tawtawrâwt bi nei leh tawtawrâwt hâm ruai ruai leh, dârbenthek te, perhkhuang te, ṭingṭangte nêna ri bûng bûngin LALPA thuthlunna bâwm chu an la chho ta a.

²⁹Tin, heti hi a ni a, LALPA thuthlunna bâwm Davida khuaa a luh lai chuan, Saula fanu Mikali chuan tukverh aṭangin a lo thlîr a, Lal Davida lâma zuang chu a hmu a, a hmusit rilru ta a.