Read Mizo_Old_version BU KHATNA CHRONICLES 16 Bible Online

BU KHATNA CHRONICLES 16 - Mizo_Old_version bible

BU KHATNA CHRONICLES 16

¹Tin, Pathian bâwm chu an la lût a, a dahna tûra Davidan a zâr, puan in chhûngah chuan an dah ta a; tin, Pathian hmaah chuan hâlral thilhlante leh remna thilhlante an hlân a.

²Tin, Davidan hâlral thilhlan leh remna thilhlante a hlan zawn chuan, LALPA hmingin mipuite chu mal a sâwm a.

³Tin, Israel mi zawng zawngte chu a hmei a pain chhang hlâwm khat leh sa hrang khat leh grêp rah pho ro bâwr khat a pe ṭheuh va.

⁴Tin, LALPA bâwm hmaa rawngbâwl tûr leh LALPA, Israel-te Pathian chu hre renga amah fak tûr leh a hnêna lâwm thu sawi tûr Levi-ho ṭhenkhat a ruat a:

⁵a hotu berah chuan Asapha, a dawtah perhkhuang leh ṭingṭang tum mi Zekaria te, Jeiela te, Semiramotha te, Jehiela te, Matithia te, Eliaba te, Benaia te, Obed-edoma te: Jeielan ṭingṭang a tum a, Asapha chuan dârbenthek a bêng a;

⁶tin, puithiam Benaia leh Jahaziela chuan Pathian thuthlunna bâwm hmaah tawtawrâwt an hâm reng a.

⁷Tichuan, chumi ni chuan Davidan LALPA hnêna lâwm thu hril tûrin Asapha leh a unaute chu a hmang ṭan ta a, he fakna hla hi a hlân a:

⁸Aw, LALPA hnênah lâwm thu hril ula, Hnamte zîngah chuan a thiltihte chu hriattîr rawh u.

⁹Amah chawimawiin hla sa ula, amah fakin zai rawh u; A thil mak tih zawng zawng thu chu hril rawh u.

¹⁰A hming thianghlim chu chhuang rawh u; LALPA zawngtute thinlung chu hlim rawh se.

¹¹ LALPA leh a chakna chu zawng ula; A hmêl chu zawng fo rawh u.

¹²A thil ropui tak tihte hre reng ula, A thiltihte leh a kâa a rorêlte chu,

¹³Aw, a chhiahhlawh Israela thlahho, Jakoba thlah, a thlante u!

¹⁴Ani chu LALPA kan Pathian chu a ni a; A thupêkte chu khawvêl pum huap a ni.

¹⁵A thuthlun chu kumkhuain hre reng ula, Chhuan sâng thlenga a thu lo pêk,

¹⁶Abrahama hnêna a thuthlun leh, Isaaka hnêna a chhechham chu;

¹⁷Chu vêk chu Jakoba hnênah thuruatah, Israela hnêna kumkhaw thuthlung atân a tinghet a,

¹⁸“Kanaan ram hi ka pe ang che, I ro chanpual tûr ram chu,” tiin.

¹⁹Mi tlêm tê chauh in niha, A ni, tlêm tê, khualzin ang mai in nih lai khân;

²⁰Hnam hrang hrang hnênah an kal lâwr a, Ram hrang hrang aṭangin mi hrang hrang hnênah.

²¹Tu ma hnehchhiah a phal lo va; A ni, anmahni avângin lalte pawh a zilhhau va,

²²“Ka hriak thihate chu tawk suh ula, Ka zâwlneite pawi rêng rêng khawih suh u,” tiin.

²³Leilung luah zawng zawngte u, LALPA chawimawiin hla sa ula; Ni tin a chhandamna thu chu hriattîr rawh u.

²⁴Hnam tin zîngah a ropuizia hril ula, Mi tinrêngte zîngah a thil mak tihte chu hril rawh u.

²⁵ LALPA chu a ropui a, nasa taka fak tûr a ni si a; Pathian zawng zawng aia ṭih tûr a ni.

²⁶Hnamte pathian chu milem an ni si a; LALPA erawh chuan vânte khi a siam a ni.

²⁷Chawimawina leh ropuina a hmaah a awm a; Chakna leh hlimna a hmun thianghlimah a awm.

²⁸Mi tina chi tinrêngte u, LALPA chu bel ula, LALPA chu ropuina leh chakna bel rawh u.

²⁹ LALPA chu a hming ropuina bel ula; Thil hlan tûr keng ula, a hmaah lo kal rawh u; Thianghlim mawina inbelin LALPA chu chibai bûk rawh u.

³⁰Leilung zawng zawngte u, a hmaah khûr rawh u! Khawvêl hi a nghîn theih lohna tûrin tihnghehin a awm.

³¹Vânte khi lâwm takin awm sela, lei pawh hi hlim takin awm rawh se; Hnam tin zîngah chuan, “LALPA chuan ro a rêl,” ti rawh se.

³²Tuifinriat leh a chhûnga thil awm zawng zawng hi ri hum hum sela; Lo leh a chhûnga awm zawng zawng hi lâwm takin awm rawh se!

³³Chutih hunah chuan ramhnuaia thing zawng zawng hi LALPA hmaah chuan hlimin an zai ang, Lei ro rêl tûrin a lo kal dâwn si a.

³⁴Aw, LALPA hnênah lâwm thu hril rawh u, ani chu a ṭha si a; A ngilneihna pawh kumkhuain a awm dâwn si a.

³⁵“Aw, kan chhandamna Pathian, min chhandam la, I hming thianghlim fak tûr leh, I fakawmna chhuang tûrin, Hnam tin zîng ata min hruai khâwm la, min chhanhim ang che,” ti rawh u.

³⁶Israel-te Pathian LALPA chu fakin awm rawh se, Chatuan ata chatuan thleng pawhin. Tin, mipui zawng zawng chuan, “Amen,” an ti a, LALPA chu an fak a.

³⁷Chutichuan, chuta LALPA thuthlunna bâwm hmaa ni tin a ṭûl dân ang anga rawngbâwl tûrin, Davida chuan Asapha leh a unaute a dah ta a;

³⁸Obed-edoma leh Hosa, an unau sawmruk leh pariatten an pui tûr a ni a, Jeduthuna fapa Obed-edoma leh Hosa-te chu kawngkhâr vêngtu tûr an ni;

³⁹LALPAN Israel-hote thu a pêk, LALPA dâna ziak zawng zawng anga hâlral thilhlan maichâm chunga tûk leh zâna, Gibeon hmun sânga LALPA biakbûk hmaa hâlral thilhlante hlân reng tûr atân erawh chuan, puithiam Zadoka leh, a unau puithiamhote ruat an ni a;

⁴¹an zînga tela, a khawngaihna chu kumkhua atân a nih avânga LALPA hnêna lâwm thu sawi tûrin Hemana leh Jeduthuna leh mi dang, an hming lama thlan chhuahte chu ruat an ni a.

⁴²Hemana leh Jeduthuna-te chu tawtawrâwt te, dârbenthek te leh thil tum chi dangte ruala tum tûr kawltu an ni a. Jeduthuna leh a fate chu kawngkhâr vêngtu tûr an ni.

⁴³Tichuan, mipui zawng zawng chu mahni in lam ṭheuhvah an haw ta a; tin, Davida pawh chu a chhûngte malsâwm tûrin a haw ve ta a.