Read Mizo_Old_version BU KHATNA CHRONICLES 17 Bible Online

BU KHATNA CHRONICLES 17 - Mizo_Old_version bible

BU KHATNA CHRONICLES 17

¹Tin, heti hi a ni a, Davida chu a ina a awm laiin zâwlnei Nathana hnênah Davida chuan, “Hei, kei chu sidar thing inah ka awm a; nimahsela, LALPA thuthlunna bâwm chu puan zâr hnuai maiah a awm a,” a ti a.

²Tin, Nathana chuan Davida hnênah, “I rilrua i vei ang tak chuan ti ta che; Pathian i hnênah a awm si a,” a ti a.

³Tin, chumi zân vêk chuan heti hi a ni a, Nathana hnênah Pathian thu a lo thleng a,

⁴“Ka chhiahhlawh Davida chu va hrilh rawh, ‘LALPA chuan heti hian a ti: Ka awmna tûrin nangin in mi saksak tûr a ni lo.

⁵Israela thlahte Aigupta ram ata ka hruai chhuah aṭangin tûn thlengin inah ka awm lo va; puan in leh biakbûkah ka awm zêl zâwk ṭhîn a.

⁶Israel-ho zawng zawngte nêna kan kalna rêng rêngah pawh, ka mite châwm tûra thu ka pêk Israel-ho rorêltute hnênah, “Engati nge sidar thingin in mi sak loh?” ka ti ngai em ni?’

⁷“Chuvângin, ka chhiahhlawh Davida hnênah heti hian sawi rawh, ‘Sipaihote LALPA chuan heti hian a ti a ni, “Berâm tlatna hmun ata i berâm vêng lai chu ka mi Israel-te chunga lal tûrin ka la chia;

⁸i kalna apiangah i hnênah ka awm zêl a, i hmêlmate ka tihbosak zêl chia, leia mi ropui takte angin hming ropui tak ka siamsak dâwn che a ni.

⁹Tin, ka mi Israel-te tân hmun ka ruat ang a, insuan tawh lova anmahni pual hmuna an awm reng theih nân anni chu ka phun ang a; tûn hmaa ka mi Israel-te chunga rorêltute ka ruat laia suahsualna faten an ti ṭhîn ang khân, an tirethei tawh hek lo vang a; i hmêlma zawng zawngte pawh ka titlâwm bawk ang. Tin, chu lo pawh chu LALPA chuan chhûngkua a dinsak ang che tih ka hrilh che a ni.

¹¹“ ‘ “Tin, i ni a kina, i pi leh pute hnêna i kal hunah chuan, heti hi a ni ang a, i hnuan i thlah, i fate zînga mi chu ka tungding ang a; tin, a ram chu ka tinghet ang.

¹²Ani chuan in mi saksak ang a; tin, a lalṭhutthlêng chu kumkhuain ka tinghet ang.

¹³Tichuan, a pa ka ni ang a, ani chu ka fapa a ni ang a; ka zahngaihna i hmaa mi ka lâk bosak ang khân, ani zawng ka lâk bosak lo vang;

¹⁴ka inah leh ka ramah ani chu kumkhuain ka din nghet ang a; tin, a lalṭhutthlêng chu kumkhuaa tihngheh a ni ang,” ’ ” tiin.

¹⁵Chûng thu zawng zawng leh chu inlârna ang chiah chuan Nathana chuan Davida hnênah a sawi a.

¹⁶Chutichuan, Lal Davida chu a lût a, LALPA hmaah chuan a ṭhu a, “Aw, LALPA Pathian, tu nge maw ka niha, ka chhûngte pawh tu nge maw an niha, heti chen chen mi hruai?

¹⁷Aw Pathian, chûng pawh chu nanga mit hmuhah chuan thil tê tham zawng a ni a; nimahsela, aw LALPA Pathian, i chhiahhlawh chhûngkaw lo awm dân tûr thu chu kum tam tak chhûng atân i lo sawi tawh a, mi lian angah mi ngai bawk a, aw LALPA Pathian.

¹⁸I chhiahhlawh chawimawia a awm chungchâng thu-ah hian Davidan i hnênah eng nge a sawi leh cheu vang? I chhiahhlawh hi i hre chiang hle si a.

¹⁹Aw LALPA, i chhiahhlawh avângin nangma rilrua chhuak ang zêlin hêng thil ropui tak hi hriattîr tûrin thil ropui tak takte i ti ta a.

²⁰Aw LALPA, kan beng hriatah chuan nangmah ang rêng rêng an awm lo va, nangmah lo chu Pathian rêng rêng an awm hek lo.

²¹Aigupta ram ata i tlan chhuah i mite hmaa hnam dangte titlâwma, thil ropui tak leh hlauhawm takte tia hming ropui tak siamsak tûr chea Pathianin ama mite atâna a tlan chhuah, i mi Israel-te ang rêng rêng hi khawvêlah hnam dang tu nge awm?

²²I mi Israel-te chu kumkhuaa i mite atân i lo siam ta si a; nang LALPA chu an Pathian i lo ni ta a.

²³“Tichuan, aw LALPA, i chhiahhlawh chungchâng thu leh a chhûngte chungchâng thu i sawi chu kumkhua atân tinghet la, i sawi tawh ang khân ti ang che.

²⁴Tin, ‘Sipaihote Pathian chu Israel-te Pathian, Israel-te tan ngeia Pathian a ni,’ tiin i hming chu kumkhuaa tihngheha chawimawiin awm sela; i chhiahhlawh Davida chhûngte chu i hmaa tihnghehin awm rawh se.

²⁵Aw nang ka Pathian, i chhiahhlawh hnênah chhûngkua i dinsak ang tih i lo puang tawh si a; chuvângin, i chhiahhlawh hi i hnênah ka la ṭawngṭai ngam ta a ni.

²⁶Aw LALPA, nang chu Pathian i ni a, he thil ṭha hi i chhiahhlawh chu i lo tiam tawh a,

²⁷i chhiahhlawh chhûngte chu i hmaa kumkhuaa an awm reng theih nân mal i lo sâwm ta a; aw LALPA, nangin mal i sâwm chu kumkhaw malsâwmna a ni,” a ti a.