Read Mizo_Old_version BU KHATNA CHRONICLES 22 Bible Online

BU KHATNA CHRONICLES 22 - Mizo_Old_version bible

BU KHATNA CHRONICLES 22

¹Tichuan, Davidan, “Hei hi LALPA Pathian in a lo ni a, hei hi Israel-te hâlral thilhlanna maichâm a lo nih hi le,” a ti a.

²Chutichuan, Davidan Israel rama hnam dang awmte chu koh khâwm thu a pe a; tin, Pathian in sakna tûrin lungchhertute chu lung a chhertîr a.

³Tin, Davida chuan kawt hung kawngkhâr leh a vuah nân a kilhna tûr thîr tam tak a lo siam khâwl a, dâr tam tak bûk sên loh nên,

⁴sidar thing chhiar sên loh nên; Zidon mi leh Tura miten Davida hnênah chuan sidar thing tam tak an rawn la a ni.

⁵Tin, Davidan, “Ka fapa Solomona hi a la naupangin, eng mah a la hre rih lo va, LALPA in sak tûr chu ropui tak, a hming leh a ropuina chu ram tina thang chhuak tûr a ni a; chuvângin, ka lo buatsaih lâwk dâwn e,” a ti a. Chutichuan, Davida chuan a thih hmain a lo buatsaih lâwk nasa hle a.

⁶Tichuan, a fapa Solomona a ko va, LALPA, Israel-te Pathian in sa tûr chuan thu a pe a.

⁷Tin, Davidan a fapa Solomona hnênah chuan, “LALPA ka Pathian tân hian in sak ka lo rilrûk ṭhîn a.

⁸Nimahsela, ‘Nang zawngin thisen i chhuah nasa êm a, indote i uar êm êm a; lei chungah hian ka mit hmuha thisen i chhuah nasat avângin, ka tân in i sa lo vang.

⁹Ngai teh, fapa i la nei ang a, ani chu remna duh mi a ni ang a, a vêl rama a hmêlmate zawng zawng lakah chuan râlmuanna ka pe ang; a hming chu Solomona a ni ang a, ama chhanah chuan Israel-hote chu râlmuang leh thlamuang takin ka awmtîr ang.

¹⁰Ani chuan ka tân in a sa ang a, ani chu ka fapa a ni ang a, kei a pa ka ni ang; tin, Israel-te chunga a ram lalṭhutthlêng chu kumkhua atân ka tinghet ang,’ tiin LALPA thu ka hnênah a lo thleng a ni.

¹¹“Chutichuan, ka fapa, LALPA chu i hnênah awm sela; hmuingîl zêl la, i chungchâng thu a lo sawi lâwk tawh ang khân, LALPA i Pathian in chu sa ang che.

¹²LALPAN finna leh hriatnate neihtîr phawt che sela, Israel-te chunga thuneihna pe che rawh se; tichuan, LALPA i Pathian dân chu i zâwm thei dâwn nia.

¹³Tichuan, Israel-te chungchâng thua thuruatte leh rorêlnate LALPAN Mosia a pêk kha i zawm chuan, i hmuingîl zêl ang. Chak takin awm la, huai takin awm rawh; hlau suh la, zâm hek suh.

¹⁴Ngai teh, ka mangan laiin LALPA in atân rangkachak talent nuai khat leh, tangkaraw talent maktaduai khat ka lo buatsaih tawh a; tin, dâr leh thîrte pawh bûk sên loh, tam tak a ni; thing leh lung pawh ka buatsaih lâwk tawh a; chûng chu i chhunzawm thei tawh ang chu.

¹⁵Tin, hnathawktu, thing zaitute leh lung chhertute leh themthiam hna tinrêng thawk thei i ngah bawk a;

¹⁶chhiar sên rual loh rangkachak te, tangkarua te, dâr te, thîrte pawh. Bei nghâl mai rawh khai, LALPA chu i hnênah awm rawh se,” a ti a.

¹⁷Davida chuan Israel-ho puipate zawng zawng chu a fapa Solomona ṭanpui tûrin thu a pe a,

¹⁸“LALPA in Pathian chu in hnênah a awm lâwm ni? Kil tin kil tangah râlmuanna a pe lo che u em ni? He rama mite hi ka kutah a rawn hlân ta a, ram chu LALPA hmaah leh a mite hmaah lâk a ni ta a.

¹⁹Tichuan, in thinlung leh in rilruin LALPA in Pathian lam hawi ula; bei nghâl ula, LALPA thuthlung bâwm leh Pathian bungbêl thianghlimte chu LALPA tâna in in sak tûra in lâk luh theih nân LALPA Pathian hmun thianghlim chu siam rawh u,” tiin.