Read Mizo_Old_version BU KHATNA CHRONICLES 23 Bible Online

BU KHATNA CHRONICLES 23 - Mizo_Old_version bible

BU KHATNA CHRONICLES 23

¹Tin, Davida chu a dam reiin a lo upa ta hle a; tichuan, a fapa Solomona chu Israel-te lalah a siam a.

²Tin, Israel-ho puipa zawng zawng chu puithiamte leh Levi-hote nên a ko khâwm a.

³Tin, Levi-hote chu kum sawmthum achin chung lam chhiar an ni a; an tam lam chu patling sîngthum leh sângriat an ni.

⁴Chûng zînga sînghnih leh sângli chu LALPA in satuho hotu tûr an ni a, sângrukte chu hotute leh rorêltu tûrte an ni a,

⁵sânglite chu kawngkhâr vêngtu tûrte an ni a; tin, sânglite chu, “Fakna tûra thil tum rîk chi ka siam,” Davidan a tihte hmanga LALPA faktu tûrte an ni.

⁶Tin, Levia fa Gersona te, Kohatha te, Meraria te zâtin Davidan pâwl a siam a.

⁷Gerson mite chu Ladana leh Simeia an ni.

⁸Ladana fate chu puipa ber Jehiela te, Zethama te, Joela te, pathum an ni.

⁹Simeia fate chu Selomotha te, Haziela te, Harana te, pathum an ni. Hêngte hi Ladana thlah chhûngkaw puipate chu an ni.

¹⁰Tin, Simeia fate chu Jahatha te, Ziza te, Jeusa te, Beria te an ni. Hêng palite hi Simeia fate chu an ni.

¹¹Tin, Jahatha chu a upa ber a ni a, Ziza chu a chhang a ni. Jeusa leh Beria erawh chuan fa an ngah lo va; chuvângin, chhûngkaw pakhat anga chhiar an ni.

¹²Kohatha fate chu Amrama te, Izara te, Hebrona te, Uziela te, pali an ni.

¹³Amrama fate chu Arona leh Mosia an ni; Arona chu, amah leh a thlahte chu kumkhua atâna thil thianghlim takte tithianghlima, kumkhuaa LALPA hmaa rimtui hâla, a rawng bâwla, a hminga malsâwmtu tûra tihhran an ni.

¹⁴Pathian mi Mosia erawh chu, a fate chu Levi hnam zînga chhiar an ni.

¹⁵Mosia fate chu Gersoma leh Eliezera an ni.

¹⁶Gersoma fate zînga upa ber chu Sebuela a ni.

¹⁷Eliezera fate zînga upa ber chu Rehabia a ni. Eliezera chuan fapa dang rêng rêng a nei lo; Rehabia erawh chuan fapa tam tak a nei.

¹⁸Izara fate zîng upa ber chu Selomitha a ni.

¹⁹Hebrona fatea upa ber chu Jeria a ni a, a chhang chu Amaria, a chhang leh chu Jahaziela, a chhang leh chu Jekameama a ni.

²⁰Uziela fatea upa zâwk chu Mika a ni a, a chhang chu Isia a ni.

²¹Meraria fate chu Mahlia leh Musia an ni. Mahlia fate chu Eleazara leh Kisa an ni.

²²Tin, Eleazara chu a thi a, fapate nei lovin fanute chauh a nei a; tin, Kisa fapa, an nuṭaten nupuiah an nei a.

²³Musia fate chu Mahlia te, Edera te, Jeremotha te, pathum an ni.

²⁴Chûngte chu Levia thlah, an chhûngkua ang zêla hming ziaka an chhiar chhûngkaw puipa, LALPA in saka thawk, kum sawmhnih achin chung lama chhiar zawngte chu an ni.

²⁵Davidan, “LALPA, Israel-te Pathianin a mite chu râlmuang takin a awmtîr ta a, Jerusalem-ah hian a awm ta reng a;

²⁶Levi-hote pawh hian biakbûk leh a rawngbâwl nân bungbêl zawng zawng hi an zâwn a ngai tawh lo ve,” a ti a ni.

²⁷Davida thupêk hnuhnûng avângin Levi-hote chu kum sawmhnih achin chung lam thlengin chhiar an ni si a.

²⁸An hnathawh chu Pathian ina rawngbâwla Arona fapate ṭanpuia, kawt hung chhûng leh pindan chhûnga thil thianghlim zawng zawng tihthianghlima, LALPA ina rawngbâwl a ni si a;

²⁹chhang chhiah tûr te, chhangphut thilhlan atâna chhangphut dip tak, dawidim telh loh chhangpêr pan emaw, bêla ur emaw, kan emaw, a teh leh a lenzia ang zawng zawng tûr buatsaih vêl te nên;

³⁰tin, tûk tina LALPA hnêna lâwm thu sawi leh amah fak te nên, tlaiah pawh chuti bawk;

³¹tin, Chawlhniah te, thla tharah te, kût bi neiah te, a tih tûra ruat ang zêla LALPA hnêna hâlral thilhlan zawng zawng LALPA hmaa hlan reng te nên;

³²tin, inbiakna puan in enkawl te, hmun thianghlim enkawl te, LALPA ina rawngbâwla an unau Arona fapaten tih tûr an ruat apiang tih te nên.