Read Mizo_Old_version BU KHATNA CHRONICLES 28 Bible Online

BU KHATNA CHRONICLES 28 - Mizo_Old_version bible

BU KHATNA CHRONICLES 28

¹Tin, Davidan Israel hotu zawng zawng: hnam puipa te, lal rawngbâwla inthlâk ṭhîn pâwl hotu te, sipai sâng hotu te, za hotu te, lal leh a fapate sum leh thil neih zawng zawng chunga hotu te, mi lian leh mi chak, mi chak huaisen zawng zawng nên Jerusalem-ah a ko khâwm a.

²Tichuan, Lal Davida chu a ding a, “Ka unaute leh ka mite u, ka thu hi lo ngaithla teh u: kei chuan LALPA thuthlunna bâwm dahna leh kan Pathian ke nghahchhan tûr in sa ila tih ka lo rilrûk ṭhîn a; tin, sakna tûr pawh ka ngah tawh diam a.

³Nimahsela, Pathianin ka hnênah, ‘Nang zawng indo mi, thisen chhuah mi i nih avângin ka hming tân in i sa lo vang,’ a ti a.

⁴Amaherawhchu, LALPA, Israel-te Pathianin ka pa chhûngte zawng zawng zîng ata Israel-te lala kumkhuaa awm tûrin mi lo thlang ta a, Juda hnam chu puipa atân a lo thlang ta si a. Tin, Juda hnam zîngah pawh ka pa chhûngte leh ka pa fapate zîng ata Israel zawng zawng lalah mi lo thlang chhuak ta bîk a.

⁵Tin, ka fapa zawng zawng zîngah chuan (LALPAN fapa tam tak mi pe a) Israel-te lal atân LALPA ram lalṭhutthlênga ṭhu tûrin ka fapa Solomona hi a lo thlang ta a.

⁶“Tichuan, ka hnênah, ‘I fapa Solomonan ka in leh ka kawtlaite chu a din ang; ka fapa atân ka thlang tawh a; tichuan, a pa ka ni ang.

⁷Ka thupêkte leh ka rorêlte a pawm reng chuan tûna in tih reng ang hian a ram chu kumkhua atân ka tinghet ang,’ a ti a.

⁸Chutichuan, LALPA mipui, Israel-ho zawng zawng mit hmuhah leh kan Pathian hriatah hian, LALPA in Pathian thupêk zawng zawng hi pawm tûr leh ngaihven tûrin ka fuih a che u; tichuan, he ram ṭha tak hi in luah ang a, in hnua in thlahte kumkhua atân in rochun chhâwntîr zêl ang.

⁹“Tin, nang ka fapa Solomon, i pa Pathian hi hria la, thinlung ṭha famkim leh rilru phûr takin a rawng bâwl ang che; LALPA chuan thinlung a en ṭhîn a, rilrua suangtuah zawng zawng hi a hre vek a ni; amah i zawn chuan i hmu ang a, i hawisan erawh chuan kumkhuain a thlauthla ang che.

¹⁰Fîmkhur rawh khai; hmun thianghlim tûr in sa tûrin LALPAN a lo ruat tâk che hi; chak takin awm la, bei rawh,” a ti a.

¹¹Chutichuan, Davida chuan a fapa Solomona chu biak in hulhliap lem te, a in lem te, sum dah khâwmna in lem te, a pindan chungnung lem te, a chhûng pindan lem te, zahngaihna ṭhutphah lem te,

¹²a rilrua a suangtuah ang zawng zawng, LALPA in hung chhûng kawtlai lem te, a vêl pindan zawng zawng lem te, Pathian ina sum dah khâwmna in lem te, thil serh dah khâwmna in lem te chu a pe a;

¹³puithiamte leh Levi-hote a pâwl pâwla an awmna tûr lem te, LALPA ina rawngbâwlna lam tûr zawng zawng lem te, LALPA ina rawngbâwlna tûr bungbêl zawng zawng lemte pawh;

¹⁴rawngbâwlna lam atâna bungbêl chi tin, rangkachak bungbêl tûr, rangkachak hman zât tûr te, rawngbâwlna lam atâna tangkaraw bungbel tûr, rangkachak hman zât tûr te,

¹⁵rangkachak khâwnvâr dahna leh a khâwnvâr tûr rangkachak hman zât tûr te, khâwnvâr dahna leh a khâwnvâr tûr zêl atâna hman zât tûr te, khâwnvâr dahnaa hman ṭûlna ṭheuh ang zêla tangkaraw khâwnvâr dahna tûr zêl atâna hman zât tûr te nên;

¹⁶chhang chiahna dawhkân tûr, pakhat zêl atâna rangkachak hman zât tûr te, tangkaraw dawhkân atâna tangkaraw hman zât tûr te,

¹⁷rangkachak hlîr hlak sa thurna thîr kawm te, maihûn te, note nên; rangkachak berhbu tûr, berhbu pakhat zêl atâna hman zât tûr te, tangkaraw berhbu tûr, berhbu pakhat zêl atâna hman zât tûr te;

¹⁸rangkachak thianghlima siam, rimtui hâlna maichâm tûr te; cherub-te an thla zâra LALPA thuthlunna bâwm tuam chuanna lem ang siamna tûr rangkachak te nên.

¹⁹Davida chuan, “Hêngte hi tih dân tûr rem a ruat sa tichiang tûra LALPAN ama kut ngeia a ziak ang kha a ni,” a ti a.

²⁰Tin, Davidan a fapa Solomona hnênah chuan, “Chak tak leh huai takin awm la, bei rawh; hlau suh la, zâm hek suh; LALPA Pathian, ka Pathian hi i hnênah a awm e. LALPA in lam hna zawng zawng hi peih vek a nih hma loh chuan a kalsanin a thlahthlam lo vang che.

²¹Tin, ngai teh, Pathian in hna tinrêng thawktu pâwl puithiamte leh Levi-hote an awm a, eng hna pawha kawng tinrênga hna thiam, châk tak ṭheuhva ṭanpuitu tûr che i hnênah an awm zêl ang a; hotute leh mipui zawng zawng pawhin i thupêk apiang chu an zâwm zêl bawk ang,” a ti a.