Read Mizo_Old_version BU KHATNA CHRONICLES 29 Bible Online

BU KHATNA CHRONICLES 29 - Mizo_Old_version bible

BU KHATNA CHRONICLES 29

¹Tin, Lal Davidan mipui zawng zawng hnênah chuan, “Pathian thlan chhuah ka fapa Solomona hi a la naupangin eng mah a la hre rih lo va; a thawh tûr lah chu a ropui si a; biak in chu mihring tân a ni lo va, LALPA Pathian tân a ni zâwk si a.

²Tichuan, ka Pathian in tân chuan rangkachak lam thil atân rangkachak te, tangkaraw lam thil atân rangkarua te, dâr lam thil atân dâr te, thîr lam thil atân thîr te, thing lam thil atân thingte chu theihtâwpin ka lo buatsaih tawh a; a zeh tûr onuk lung te, lungmawi te, a bel tûr lungmawi chi hrang hrang leh lunghlu chi tinrêng leh sailungvâr lung tam takte nên.

³Chu chauh lo pawh chu, ka Pathian in hi ka duhsak êm êm mai a, keima sum rangkachak leh tangkaruate pawh, in thianghlim tâna ka lo buatsaih zawng zawng tiam lo hian, ka Pathian in tân ka pe a ni:

⁴chu chu bangte luan nân Ophir rangkachak, rangkachak talent sângthum leh tangkaraw thianghlim talent sângsarih;

⁵hmanna kawng hrang hranga mi thiamte hman tûrin rangkachak hmanna tûra rangkachak te, tangkaraw hmanna tûra tangkarua te a ni. Vawiin hian LALPA tâna lâwm taka pe phal tu nge awm le?” a ti a.

⁶Tichuan, chhûngkaw puipate, Israel hnam hotute, sâng hotute leh za hotute, lal hnathawk hotute nên lâwm takin an pe a.

⁷Pathian in sak nân rangkachak talent sângnga leh darik sîngkhat, tangkarua talent sîngkhat leh dâr talent sîngkhat leh sângriat, thîr talent nuai khat an pe a ni.

⁸Tin, lunghlu neite chuan Gerson mi Jehiela vawn LALPA sumah an dah a.

⁹Tichuan, mipuite chu an hlim êm êm mai a, rilru hmun khat pua lâwm taka LALPA an pêk avângin; Lal Davida pawh hlim namênlovin a hlim a.

¹⁰Chutichuan, Davidan mipui zawng zawng hmaah chuan LALPA hnênah lâwm thu a sawi a: “Aw LALPA, kan pu Israela Pathian, chatuana fakin awm rawh.

¹¹“Aw LALPA, ropuina te, thiltihtheihna te, chawimawina te, hnehna te, lalna te hi i ta a ni a; lei leh vâna awm zawng zawng hi i ta a ni si a; aw LALPA, ram chu i ta a ni a, mi zawng zawnga chungnung ber i ni.

¹²Hausakna leh chawimawinate hi i hnêna mi a ni a, engkim chungah thu i nei a; tin, thiltihtheihna leh chakna i kutah a awm a; i kutah hian mi zawng zawng tihropuina leh chakna pêk theihna a awm.

¹³Chutichuan, kan Pathian, lâwm thu kan hrilh chia, i hming ropui hi kan fak e.

¹⁴Nimahsela, tu nge maw ka niha, ka mite pawh hi tute nge maw an niha, hetiang te lâwm taka kan lo hlan theih ni le? Thil zawng zawng hi i hnên aṭanga chhuak a ni a, i ta chu kan rawn pe leh mai che a ni si a.

¹⁵Kan pi leh pute ang khân keini zawng i hmaah hian mikhual, mi hnêna khawsa ve mai ang kan ni a; leilunga kan dam chhûng nite chu hlim ang chauh a ni a, beisei tûr rêng a awm lo.

¹⁶Aw LALPA kan Pathian, i hming thianghlim tâna in kan saksakna tûr chea hêng thil kan lo buatsaih zawng zawng hi nangma kutchhuak a ni a, i ta vek a ni e.

¹⁷Ka Pathian, nangin thinlungte i fiah ṭhîn a, felna te i lâwm ṭhîn tih ka hre bawk. Kei zawngin rilru tak takin hêng thil zawng zawng hi lâwm takin ka rawn hlân a; tin, heta i mite pawh lâwm taka i hnêna rawn hlântu ka hmuh hian ka lâwm êm êm a ni.

¹⁸Aw LALPA, kan pu Abrahama te, Isaaka te, Israela te Pathian, i miten hetiang rilru an put reng theihna tûrin an rilrute hi i tân tinghet la;

¹⁹tin, ka fapa Solomona hi i thupêk te, i thuhriattîr te, i dân te zâwma, chûng zawng zawng ti tûr leh ka lo buatsaih lâwk in sa tûr hian rilru famkim han puttîr ang che,” Davida chuan a ti a.

²⁰Tin, Davidan mipui zawng zawng hnênah chuan, “Khai le, LALPA in Pathian chu fak rawh u,” a ti a. Tichuan, mipui zawng zawng chuan LALPA, an pi leh pute Pathian chu an fak a, an kûn a, LALPA leh lal chu chibai an bûk a.

²¹Tin, a tûkah chuan LALPA hnênah inthawi nân leh LALPA hnêna hâlral thilhlan atân, bâwngpa sângkhat leh berâmpa sângkhat leh berâmno sângkhat, an in tûr thilhlante nên Israel-ho zawng zawng tân inthawina tam tak an hlân a.

²²Tichuan, chumi ni chuan LALPA hmaah hlim takin an ei a, an in hlawm a. Tin, Davida fapa Solomona chu lalah an siam nawn leh a, LALPA mi lian atân hriak an thih a; tin, Zadoka chu puithiam atân.

²³Chutichuan, Solomona chu LALPA lalṭhutthlêngah chuan a pa Davida aiah lalah a ṭhu ta a, hmuingîl takin a awm a; tin, Israel-ho zawng zawngin a thu an zâwm a.

²⁴Tin, hotu zawng zawng leh mi chak huaisente leh Lal Davida fapa dang zawng zawng chu Lal Solomona lakah an intulût a.

²⁵Tin, LALPAN Solomona chu Israel-ho zawng zawng mit hmuhah nasa takin a tiropui a, Israel rama a hmaa lalte zînga tu ma la chan ngai loh, lal nihna ropui tak a chantîr a.

²⁶Jesaia fapa Davida chu Israel-ho zawng zawng chungah a lal a.

²⁷Israel-ho chunga a lal chhûng chu kum sawmli a ni; Hebron khuaah kum sarih a lal a, Jerusalem-ah kum sawmthum leh kum thum a lal a.

²⁸Tin, upa tak, tarkûna damin, hausa tak leh chawimawi hlawhin a thi a; tin, a fapa Solomona chu a aiawhin a lal ta a.

²⁹Ngai teh, Lal Davida chanchin chu a tîr aṭanga a tâwp thlengin, zâwlnei Samuela lehkhabuah te, zâwlnei Nathana lehkhabuah te, zâwlnei Gada lehkhabuah te a chuang a,

³⁰a lal thu te, a thiltihtheihzia zawng zawng te, amah leh Israel-ho leh ram zawng zawng chunga thil lo awm dânte nên.