Read Mizo_Old_version BU HNIHNA CHRONICLES 1 Bible Online

BU HNIHNA CHRONICLES 1 - Mizo_Old_version bible

BU HNIHNA CHRONICLES 1

¹Tin, Davida fapa Solomona chu a ram chhûngah chuan tihchakin a awm a, LALPA a Pathian chu a hnênah a awm a, nasa takin a tiropui a.

²Tin, Solomona chuan Israel-ho zawng zawng, sipai sâng hotu te, za hotu te, rorêltu te, Israel ram zawng zawnga mi lian, chhûngkaw puipa zawng zawng chu a bia a.

³Chutichuan, Solomona leh inkhâwmho zawng zawng chu Gibeon khuaa hmun sângah chuan an kal a; chutah chuan LALPA chhiahhlawh Mosian thlalêra a siam Pathian biakna bûk kha a awm a ni.

⁴Pathian bâwm erawh chu Davidan a lo buatsaih tawhna hmunah Kiriath-jearim aṭangin Davida chuan a lo la chho tawh a; Jerusalem-ah a dahna tûr puan in a lo zâr sa tawh rêng a.

⁵Tin, Hura fa Uria fapa Bezalela siam dâr maichâm kha LALPA biakna bûk bulah chuan a awm bawk a; tin, Solomona leh mipuihote chuan an va pan a.

⁶Solomona chu inbiakna puan in bula dâr maichâm awmna LALPA hmaah chuan a han chho va, hâlral thilhlan sângkhat a han hlân a.

⁷Chumi zân chuan Solomona hnênah Pathian a inlâr a, a hnênah, “Eng nge ka pêk ang che, mi dîl rawh,” a ti a.

⁸Tin, Solomona chuan Pathian hnênah, “Ka pa Davida hnênah khân khawngaihna nasa tak i lantîr a, a aiawhin lalah mi lo siam ta a.

⁹Tichuan, aw LALPA Pathian, ka pa Davida hnêna i thutiam kha tipuitling ang che; nangin vaivut zât zet mipuite lalah mi lo siam ta a.

¹⁰Tichuan, hêng mipuiho hmaa lût leh chhuaka ka awm theih nân finna leh hriatna mi han pe ang che; i mi heti zozai hi tuin nge rorêlsak thei ang le?” a ti a.

¹¹Tin, Pathianin Solomona hnênah, “Hetiang rilru i puta, sum leh pai te, hausakna te, chawimawina te, nangmah hawtu che nunna te dîl lova, dam reina te pawh dîl lova, an chunga lala ka siamna che ka mite ro i rêlsak theihna tûra finna leh hriatnate mi dîl zâwk avângin,

¹²finna leh hriatna chu pêk i ni tawh e; tin, i hmaa lalte pawhin an la neih ngai loh, i hnu pawha an neih hauh loh tûr sum leh pai te, hausakna te, chawimawinate ka pe bawk ang che,” a ti a.

¹³Chutichuan, Solomona chu hmun sâng bula biakbûk awmna Gibeon khuaa a zin chu Jerusalem-ah a haw a, Israel-te chungah ro a rêl ta a.

¹⁴Tin, Solomona chuan tawlailîrte leh sakawr chung chuang mite a khâwm chiam a; tawlailîr sângkhat leh zali leh sakawr chung chuang mi sîngkhat leh sânghnih a nei a, chûng chu tawlailîr dahna khuaah te, Jerusalem khuaa lal awmnaah te chuan a dah a.

¹⁵Tin, lal chuan Jerusalem khuaah chuan rangkachak leh tangkaruate chu lung ang maia ngaih khawpin a dah ṭeuh va, sidar thingte chu phaia theipui thing ang leka ngaih khawpin a dah bawk a.

¹⁶Tin, Solomona neih sakawrte chu Aigupta ram ata rawn tawlh chhuah a ni a; lal sumdâwngtute chuan chûng chu a rual rualin an lo khâr ṭhîn a, a ruala lei zêl a ni.

¹⁷Aigupta rama mi tawlailîrte chu tangkarua sekel zaruk zêlin an tithleng ṭhîn a; tin, sakawrte chu tangkarua sekel za leh sawmnga zêlin; chutiang bawk chuan Hit-ho lal zawng zawng leh Suria lalte pawh an tihthlensak ṭhîn a ni.