Read Mizo_Old_version BU HNIHNA CHRONICLES 16 Bible Online

BU HNIHNA CHRONICLES 16 - Mizo_Old_version bible

BU HNIHNA CHRONICLES 16

¹Asa kum sawmthum leh kum ruk a lal kumin Israel lal Baasa chuan Juda-te a han bei a, Juda lal Asa hnêna lût tûr leh chhuak tûr dan nân Rama khua a siam a.

²Chutichuan, Asan LALPA in leh lal ina ro tangkarua leh rangkachakte chu a la chhuak a, Damaska-a Suria lal Ben-hadada hnênah,

³“Ka pa leh i pa kârah thuthlung a awm a, ngai teh, tangkarua leh rangkachakte ka thawn a che; ti teh, Israel lal Baasa hian mi ṭînsanna tûrin a hnêna i thuthlun kha ṭhiat leh teh mai,” tiin a thawn a.

⁴Tin, Ben-hadada chuan Lal Asa thu chu a lo pawm a; tichuan, Israel khuate chu bei tûrin sipai hotute a tîr a; Ijon khua te, Dan khua te, Abel-maim khua te, Naphtali rama bungraw dahna khua zawng zawngte an bei a.

⁵Tin, heti hi a ni a, Baasan chumi thu chu a lo hriat veleh Rama khua a siam lai chu a chawlhsan a, a thiltih tum chu a ṭhulh ta a.

⁶Chutichuan, Lal Asa chuan Juda mi zawng zawng chu a hruai a, Baasan Rama khaw siam nâna lung leh thing a hmante chu an la vek a, chu chuan Geba leh Mizpa khua a siam a.

⁷Tin, chumi lai chuan zâwlnei Hanania chu Juda lal Asa hnênah a lo kal a, a hnênah, “LALPA i Pathian ring lovin Suria lal i ring a; chuvângin, Suria lal sipai rualte chu i chhuah ta a ni.

⁸Ethiopia-ho leh Lub-hote chu sipai rual lian tak, tawlailîr leh sakawr chung chuang mite tam tak an ni lâwm ni kha? Nimahsela, LALPA i rin avâng khân i kutah a pe a nih kha.

⁹A lama rilru dik tak putute chunga a chakzia tilang tûrin khawvêl zawng zawngah LALPA mit chu a lêng ruai ruai ṭhîn a ni. Atthlâk takin thil i ti a nih hi; tûn achinah chuan do i nei reng tawh ang,” a ti a.

¹⁰Chutichuan, Asa chu zâwlnei chungah chuan a thinrim a, tân inah a khung ta a; a thusawi avângin a thinrim ta hle mai a ni. Tin, Asa chuan mi ṭhenkhat pawh a tiduhdah leh ta nghâl zêl a.

¹¹Tin, ngai teh u, Asa chanchin chu a bul aṭanga a tâwp thlengin Juda leh Israel lalte chanchin ziakna buah a chuang a ni.

¹²Tin, kum sawmthum leh kum kua a lal kumin Asa chu a ke a lo na ta a, a nâ chu nasa tak a ni; nimahsela, a natnaah chuan LALPA râwn lovin damdawi thiamte a râwn zâwk a.

¹³Tin, Asa chu a pi leh pute hnênah a muhîl a, kum sawmli leh kum khat a lal kumin a thi a.

¹⁴Tin, Davida khawpuia ama puala a ker, ama thlânah an phûm a, rimtui tui tak, rimtui siamtuten rimtui chi hrang hrang an siama khat khumah an zalh a, a pualah meipui nasa tak an chhep a.