Read Mizo_Old_version BU HNIHNA CHRONICLES 19 Bible Online

BU HNIHNA CHRONICLES 19 - Mizo_Old_version bible

BU HNIHNA CHRONICLES 19

¹Tin, Juda lal Jehosaphata chu thlamuang takin Jerusalem-a a inah a haw leh ta a.

²Tin, zâwlnei Hanania fapa Jehua chuan a lo hmuak a, Lal Jehosaphata hnênah, “Mi suaksual chu i ṭanpuiin LALPA hawtute chu i hmangaih dâwn a ni maw? Hemi avâng hian LALPA thinurna i chungah a lo awm ta a ni.

³Amaherawhchu, he ram ata Aseri i thehthang bova, LALPA i zawn avâng hian ṭhatna kawng eng emaw zawng i la nei cheu a ni,” a ti a.

⁴Tin, Jehosaphata chu Jerusalem-ah a awm a; tin, Beer-seba aṭanga Ephraim tlâng ram thlengin a mite zîngah a kal leh a, LALPA, an pi leh pute Pathian lamah a hruai kîr leh hlawm a.

⁵Tin, khaw tinah Judai ram kulh nei khua zawng zawngahte chuan rorêltute a dah a,

⁶rorêltute hnênah chuan, “In thiltih chu ngun taka ngaihtuahin ti rawh u; mihring tâna rorêl in ni lo va, LALPA tân a ni zâwk si a; rorêlnaah chuan in hnênah a tel zêl a ni.

⁷Chuvângin, LALPA hlau ula, fîmkhur takin ti rawh u; LALPA kan Pathianah chuan khawlohna leh thlei bîk neihna leh tham einate a awm lo a ni,” a ti a.

⁸Tin, Jehosaphata chuan Jerusalem-ah LALPA rorêl tûr leh thubuaite remtu atân Levi-hote, puithiamte, Israel chhûngkaw puipate a dah bawk a.

⁹Tin, “LALPA ṭih chungin rinawm takin, rilru dik tak puin in ti tûr a ni.

¹⁰Khawii khuaa mi pawhin thubuai an rawn sawia, tualthah te, dân leh thupêk thu-ah te, thuruat leh rorêl thu-ah te an rawn inkhin chuan, LALPA chungah thil an tihsual loh nân fimkhur tûrin hrilh ang che u, nangmahni leh in unaute chungah thinurna a lo thleng dah rual ang e; chutiang chuan ti ula, thiam loh in chang dâwn lo nia.

¹¹Tin, ngai teh u, LALPA lam thu zawng zawngah chuan puithiam lalber Amaria chu in hotu a ni a; tin, lal lam thu zawng zawngah chuan Juda-te chhûngkaw chunga rorêltu chu Ismaela fapa Zebadia a ni; Levi-hote pawh in hotute an ni ve ang. Huai takin ti ula, mi ṭhate hnênah chuan LALPA chu awm rawh se,” a ti a.