Read Mizo_Old_version BU HNIHNA CHRONICLES 20 Bible Online

BU HNIHNA CHRONICLES 20 - Mizo_Old_version bible

BU HNIHNA CHRONICLES 20

¹Tin, chumi hnuah chuan heti hi a ni a, Moaba thlahte leh Amona thlahte chu Meun-ho ṭhenkhatte nên Jehosaphata bei tûrin an lo thawk a.

²Chutichuan, tuten emaw Jehosaphata hnênah, “Nangmah bei tûrin mipui tam tak mai, tuifinriat râl Suria aṭangin an lo thawk chiam mai; ngai teh, Hazazon-tamar-ah an awm tawh,” tiin an hrilh a (chu chu En-gedi an ti bawk ṭhîn).

³Tin, Jehosaphata chuan a hlau va, LALPA zawng tûrin a inpe a; Judai ram zawng zawngah chaw nghei tûr thu a than vêl a.

⁴Tichuan, Juda-te chu LALPA ṭanpuina zawngin an pung khâwm a; Juda khaw tin aṭangin LALPA zawng tûrin an lo chhuak a.

⁵Tin, Jehosaphata chu LALPA inah, kawt hung chhûng thar bulah Juda-ho leh Jerusalem-ho pung khâwm zîngah chuan a ding a;

⁶“Aw LALPA, kan pi leh pute Pathian, vâna Pathian i ni lâwm ni? Hnam tin chunga rorêltu i ni lâwm ni? I kutah chuan thiltihtheihna leh chakna a awm a, tu ma chelh rual i ni lo va.

⁷Aw kan Pathian, he rama chêngte hi i mi Israel-te i hnawh chhuahsak a, i ṭhian Abrahama thlahte chatuan atân i pe a ni lâwm ni?

⁸Tin, he ramah hian an lo awm ta a, ‘Kan chungah thil ṭha lo, khandaiha rorêlna te emaw, hri te emaw, ṭâm te emaw a lo thlen chuan he in bulah leh i hmaah kan lo ding ang a (he inah hian i hming a awm si a), kan mangannaah chuan kan au vang chia, nangin min ngaihthlâksakin min chhandam ang chu,’ tiin i hming tân hmun thianghlim an dinsak chia.

¹⁰“Tichuan, ngai teh, Amona thlahte leh Moab-ho leh Seir tlânga mi, Israel-ho Aigupta ram ata an lo chhuah laia beih i phal lohva, an kîrsana an tihboral tâk lohhoten,

¹¹kan luah atâna i ram min pêk ata hnawh chhuaha mi rawn thungrulh an tum dân hi lo hre teh.

¹²Aw kan Pathian, an chungah ro i rêl dâwn lâwm ni? Mi chu zozai, mi rawn bei tûra lo thawkte chu han bei thei ziazâng kan ni si lo va; a tih ngaihna rêng rêng kan hre bawk hek lo, i lam kan lo hawi mai zâwk a ni e,” a ti a.

¹³Tin, Juda-te zawng zawng chu an fanau tê tê, an nupuite leh an fate nên LALPA hmaah an ding a.

¹⁴Chutichuan, mipui zînga Jahaziela chungah chuan LALPA thlarau a lo thleng a, chu mi chu Zekaria fapa a ni a, chu mi chu Benaia fapa a ni a, chu mi chu Jeiela fapa a ni a, chu mi chu Asapha thlah Levi mi Matania fapa a ni a.

¹⁵Tin, ani chuan, “Nangni Judai rama mi zawng zawng leh Jerusalem-a awm zawng zawngte leh nang, Lal Jehosaphat, lo ngaithla rawh u! LALPAN in hnênah heti hian a ti: ‘Hlau suh ula, chûng mipui tam tak avâng chuan zâm hek suh u; indona chu nangni indona a ni lo va, Pathian indona a ni zâwk si a.

¹⁶Naktûkah zuk bei rawh u; ngai teh u, Ziz pan chhohnaah an lo chho va, Jeruel thlalêr bul ruam tâwp lamah chuan in zu hmu ang a.

¹⁷He indona hi in beih a ngai lo vang. Inzâr ula, ding ngawt mai ula, in lama ṭang LALPA chhandamna chu en reng mai rawh u, aw Juda mite leh Jerusalem mite u!’ tiin. Hlau suh ula, zâm hek suh u. Naktûkah bei tûrin thawk rawh u, LALPA chu in lamah a ṭang si a,” a ti a.

¹⁸Chutichuan, Jehosaphata chu a hmaia lei siin a kûn a; tin, Juda mite zawng zawng leh Jerusalem mi zawng zawng chu LALPA chibai bûkin LALPA hmaah an kûn a.

¹⁹Tin, Kohatha thlah leh Kora thlah Levi-hote chu aw ring taka LALPA, Israel-te Pathian fak tûrin an lo ding a.

²⁰Tin, a tûkah chuan zîng takah an tho va, Tekoa thlalêrah an lût a; tin, an kal lai chuan Jehosaphata chu a ding a, “Aw, Juda mite leh Jerusalem mite u, ka thu hi ngaithla rawh u; LALPA in Pathian chu ring ula, nghet takin in awm dâwn nia; a zâwlneite chu ring ula, hmuingîl takin in awm dâwn nia,” a ti a.

²¹Tin, mipuite a fuih zawh chuan sipaite hmaa kal chunga LALPA chawimawina leh a thianghlim mawizia fak tûra hla satu tûrte a ruat a, “LALPA hnênah lâwm thu sawi rawh u, a ngilneihna chu kumkhuain a awm dâwn si a, ti rawh u,” a ti a.

²²Tin, hla an saka an han fak veleh chuan Amona thlah te, Moaba thlah te, Seir tlânga mite, Juda-ho bei tûra lo thawkte châng rutu tûr LALPAN a dah a; tichuan, an tlâwm ta a.

²³Amona thlahte leh Moaba thlahte chuan Seir tlânga awmte chu thah chimih vek leh tihboral dêr tumin an bei ta mai a; tin, Seir tlânga mite an tihboral zawh chuan anmahni leh anmahni chu intihboral tumin an inbei ta chiam mai a.

²⁴Tin, Juda-te chuan thlalêr thlîrna hmun sâng an han thlen chuan mipui lam chu an han en a; tin, ngai teh, mitthi ruang chu leiah chuan a lum rum mai a, pakhat tê mah tlân chhuak an awm lo va.

²⁵Tichuan, Jehosaphata leh a hote chu râllâk sum la tûrin an va kal a, an zîngah chuan sum leh pai te, silhfên te, lunghlu te an va hmu ta ṭeuh mai a, an phurh zawh loh khawpin an la a; a tam khawp a, ni thum zet râllâk sum chu an chhêk a.

²⁶Tin, a ni li ni chuan Beraka ruamah an inkhâwm a, chutah chuan LALPA chu an chawimawi a; chumi avâng chuan tûn thleng hian chumi hmun hmingah chuan Beraka ruam an ti ta a ni.

²⁷Chutichuan, Juda mi leh Jerusalem mi zawng zawng chu an haw leh ta a; tin, Jehosaphata chuan Jerusalem-a hlim taka haw tûrin an hma a hruai a; LALPAN an hmêlmate chungthuah hlim taka a awmtîr tâk avângin.

²⁸Tichuan, perhkhuang te, ṭingṭang te, tawtawrâwtte nên Jerusalem-a LALPA in chu an han thleng ta a.

²⁹Tin, LALPAN Israel-te hmêlma a bei tih an han hriat chuan ram tina mite chuan Pathian chu an hlau ta a.

³⁰Tichuan, Jehosaphata ram chu râlmuangin a awm ta a; a Pathianin an vêla mite laka râlmuanna a pêk avângin.

³¹Chutichuan, Jehosaphata chu Juda-te chungah a lal ta a; kum sawmthum leh kum nga mi a nihin a lal ṭan a; tin, Jerusalem-ah kum sawmhnih leh kum nga a lal a; a nu hming chu Azubi, Silhia fanu a ni.

³²LALPA mit hmuha thil ṭha tiin a pa Asa kawng chu pênsan hauh lovin a zawh a.

³³Amaherawhchu, hmun sângte chu thehthang bo a ni lo va, mipuite pawhin an pi leh pute Pathian chungah an thinlung an la nghat bawk hek lo.

³⁴Tin, ngai teh u, Jehosaphata thiltih zawng zawng chu a bul aṭanga a tawp thlengin, Hanania fapa Jehua chanchin ziaknaah a chuang a, chu chu Israel lalte chanchin buah a chuang a ni.

³⁵Chumi hnuah chuan Juda lal Jehosaphata chuan Israel lal Ahazia a thurualpui a; chu mi chuan ṭha lo takin thil a ti ṭhîn a.

³⁶Tin, Tarsis lama kal tûr lawng an siam tlâng a, Ezion-geber-ah lawngte chu an siam a.

³⁷Chutichuan, Maresa mi Dodavahua fapa Eliezeran Jehosaphata hnênah, “Ahazia i thurualpui avângin LALPAN i thiltih tum hi a tihkhawlohsak ta che a ni,” a ti a. Tichuan, lawngte chu a chhe ta vek a, Tarsis-ah chuan an kal thei ta lo va.