Read Mizo_Old_version BU HNIHNA CHRONICLES 21 Bible Online

BU HNIHNA CHRONICLES 21 - Mizo_Old_version bible

BU HNIHNA CHRONICLES 21

¹Tin, Jehosaphata chu a pi leh pute hnênah a muhîl a, a pute zîngah a pu Davida khawpuiah an phûm a. Tichuan, a fapa Jehorama chu a aiah a lal ta a.

²Tin, ani chuan unau, Jehosaphata fapate a nei hlawm a, Azaria te, Jehiela te, Zekaria te, Azariahua te, Mikaela te, Sephatia te an ni. Hêng zawng zawng hi Israel lal Jehosaphata fapate vek an ni.

³Tin, an pa chuan thil ropui tak a pe a, tangkarua te, rangkachak te, thil hlu tak tak te, Judai rama kulh nei khuate nên; nimahsela, ram chu Jehorama hnênah fa u ber a nih avângin a pe a.

⁴Chutichuan, Jehoraman a pa ram a han luah chuan a lo intichak ta a, a unaute zawng zawng chu Israel-te zînga puipa tam takte nên khandaihin a tihlum vek a.

⁵Jehorama chu kum sawmthum leh kum hnih a nihin a lal ṭan a; Jerusalem-ah kum riat a lal a.

⁶Ahaba chhûngte tih angin Israel lalte kawng chu a zawh ve a, Ahaba fanu nupuiah a nei a ni; tichuan, LALPA mit hmuha thil ṭha lo tak a ti ṭhîn a.

⁷Nimahsela, LALPAN Davida chhûngkua chu a tiboral duh lo va, Davida hnêna thuthlung avâng leh amah leh a thlahte chena khâwnvâr neihtîr reng a lo tiam tawh avângin.

⁸Ama chhanah chuan Edom-ho chu Juda-te lakah an hel a, lal an insiam chawp a.

⁹Tichuan, Jehorama chu a sipai hotute leh a tawlailîr zawng zawngte nên a va thawk chhuak a, zânah a va thawk a, anmahni leh tawlailîr chunga hotute hualtu Edom-hote chu a va bei a.

¹⁰Chutichuan, Edom-hote chu tûn thlengin Juda-te lakah an la hel ta reng a ni; tin, LALPA, an pi leh pute Pathian chu a hawisan avângin, chumi lai bawk chuan Libna khua pawh a lakah an hel ve a.

¹¹Tin, Judai ram tlângahte hmun sâng a siam a, Jerusalem mite chu a uiretîr a, Juda-te chu a hruai bo va.

¹²Tin, zâwlnei Elija aṭangin a hnênah lehkha a lo thleng a, “LALPA, i pu Davida Pathian chuan heti hian a ti: ‘I pa Jehosaphata kawngte i zawh lo va, Juda-te lal Asa kawngte pawh i zawh bawk hek lo va,

¹³Israel lalte kawng i zawh zâwka, Juda-te leh Jerusalem-a awmte Ahaba chhûngte anga i uiretîra, i unau, i pa chhûngte, i aia ṭha zâwk i thah bawk avângin,

¹⁴ngai teh, LALPAN i mite - i fate, i nupuite leh i rante hripuiin a hrem ang a;

¹⁵tin, nangin rîl natna nasa tak i nei ang a, ni tin chu natna avânga i rîl chu a tlâk a tlâka, a tlâk zawh vek thlengin,’” tiin.

¹⁶Chutichuan, Ethiopia mite kiang vêla mi Philistia-ho leh Arabia-ho rilru chu Jehorama bei tûrin LALPAN a chawk tho va.

¹⁷Tichuan, Juda-te chu an han bei a, an ramah an lût a, lal ina thil zawng zawng chu an la vek a, a fapate, a nupuite pawh; chutichuan, a fapa naupang ber Jehoahaza chauh lo chu a fa pawh an hnutchhiahsak lo.

¹⁸Tin, chumi hnuah chuan LALPAN tihdam theih loh rîl natnain a hrem a.

¹⁹Tin, heti hi a ni a, a kum hnihna a lo vei hnuin a natna avâng chuan a rîl chu a tla ta a, natna râpthlâk takin a lo thi ta a. A mite chuan a pute meipui an chhehsak ang khân an chhehsak ve lo.

²⁰A lal tirhin kum sawmthum leh kum hnih a ni a, Jerusalem-ah kum riat a lal a; tu ma ui hlawh lovin a thi a, Davida khawpuiah an phûm a, lalho thlânah erawh chuan a ni lo.