Read Mizo_Old_version BU HNIHNA CHRONICLES 26 Bible Online

BU HNIHNA CHRONICLES 26 - Mizo_Old_version bible

BU HNIHNA CHRONICLES 26

¹Tin, Juda mi zawng zawng chuan kum sâwm leh kum ruk mi Uzia chu an hruai a, a pa Amazia aiah lalah an siam ta a.

²Ani chuan lal chu a pi leh pute hnênah a muthilh hnuah Eloth khua chu a siam ṭha a, Judai ramah a telh leh a.

³Uzia chu a lal ṭan tirhin kum sâwm leh kum ruk mi a ni a, Jerusalem-ah kum sawmnga leh kum hnih a lal a, a nu hming chu Jekoli, Jerusalem mi a ni a.

⁴Tin, a pa Amazia thiltih ang apiang ti vein LALPA mit hmuha thil ṭha tak a ti ṭhîn a.

⁵Pathian inlârna hre thiam Zekaria dam chhûng chuan Pathian zawng tûrin a insiam tlat a; Pathian a zawn chhûng zawng chuan Pathianin a tihmuingîl zêl a.

⁶Philistia-ho rûn tûrin a thawk chhuak a, Gath kulh te, Jabne kulh te, Asdod kulh te a tichim a; tin, Asdod ramah leh Philistia-ho zîngahte khua a siam a.

⁷Tin, Pathianin Philistia-hote lakah leh Gur-baal-a awm Arabia-ho leh Meun-ho lakahte a ṭanpui a.

⁸Tin, Amon-hote chuan Uzia lakah chhiah an chawi ṭhîn a; tichuan, a lo chak tâk êm avângin Aigupta ram thlengin a hming a thang ta a.

⁹Tin, Uzia chuan Jerusalem-ah Kil Kawngkaah te, Ruam Kawngkaah te, kulh kawina lai kawngkaah te in sâng a sa bawk a, kulhin a hung a.

¹⁰Tin, thlalêrah pawh in sâng a sa a, ran tam tak a neih avângin tui te a lai chhuak thluah mai a, phai lam leh phaizâwlahte pawh; tin, lo nei mite leh uain sâwr mite tlâng lamah leh ram ṭhaahte chuan a nei a, thlawhhma lam ngaina mi tak a ni.

¹¹Tin, Uzia chuan sipai indo mi, lal sipai hotu Hanania hnuaia mi, lehkhaziaktu Jeiela leh hotu Maaseia-ten an ruat ang zêla a pâwl pâwla râl kâp mi a nei bawk a.

¹²Mi chak huaisen ṭhiau, an chhûngkaw puipa zawng zawng chu sînghnih leh sângruk an ni a.

¹³Tin, an hnuaiah chuan sipai zir thiam sa ṭhiau nuai thum leh sângsarih leh zanga hmêlma laka lal ṭanpuitu râl bei mi tak tak an awm a.

¹⁴Tin, Uzia chuan sipai zawng zawng tân phaw te, thalngul te, virvawm atân lungte a buatsaih a.

¹⁵Tin, Jerusalem-ah in sâng leh kulh kil tina daha thal lo kahna leh lung lian fe fea lo denna tûr, mi fingte hriat chhuah khâwlte a siam a. A hming chu ram tin ram tangah a thang ta a; a lo chak hle thlengin a mak a maka ṭanpuiin a awm a.

¹⁶Nimahsela, a lo chak tâk hnu chuan a rilru a lo sâng ta a, ṭha lo takin thil a ti a, LALPA a Pathian chungah thil a tisual ta a; maichâma rimtui hâl tûrin LALPA biak inah a lût ta mai a.

¹⁷Tin, puithiam Azaria chuan a zui a, mi huai tak tak LALPA puithiam sawmriat an tel ve a.

¹⁸Tin, Lal Uzia chu an khap a, a hnênah, “Uzi, LALPA tâna rimtui hâl hi i tih tûr a ni lo va, rimtui hâl tûra tihhran Arona fapa puithiamte tih tûr a ni zâwk e. Hmun thianghlim ata hi chhuak rawh, thil i tisual a nih hi! LALPA Pathian laka i ropuina tûr pawh a ni hek lo,” an ti a.

¹⁹Chutichuan, Uzia chu a thinur ta a; rimtui hâlna tûr mei lâkna a keng a. Tin, chutia puithiamte chunga a thinur lai tak chuan LALPA inah, rimtui hâlna bulah puithiamte hmaah chuan a chalah a lo phâr chhuak ta a.

²⁰Tin, puithiam hotu Azaria leh puithiam zawng zawng chuan an han en a, ngai teh, a chalah chuan a lo phâr a; chuta ṭang chuan an nam chhuak ta thuai a. A ni, LALPAN a hrem avângin amah pawh hmanhmawh tak bawkin a chhuak ta a.

²¹Tichuan, Lal Uzia chu a thih ni thlengin a lo phâr ta a. A phâr avângin in hrangah a awm ta a; LALPA in ata chu tihchhuah a ni a. Tichuan, a fapa Jothama chu an rama mite rorêlin lal ina awptuah a awm ta a.

²²Tichuan, Uzia thiltih dang zawng zawngte chu a bul aṭanga a tâwp thlengin Amoza fapa zâwlnei Isaian a ziak a.

²³Chutichuan, Uzia chu a pi leh a pute hnênah chuan a muhîl a, lal inphûmna hmuna a pi leh a pute zîngah an phûm a, “Ani zawng phâr a ni si a,” an ti a. Tichuan, a fapa Jothama chu a aiah a lal ta a.