Read Mizo_Old_version BU HNIHNA CHRONICLES 28 Bible Online

BU HNIHNA CHRONICLES 28 - Mizo_Old_version bible

BU HNIHNA CHRONICLES 28

¹Ahaza chu a lal ṭan tirhin kum sawmhnih mi a ni a, Jerusalem-ah kum sâwm leh kum ruk a lal a; a pu Davida angin LALPA mit hmuha thil ṭha a ti ve lo va.

²Israel lalte kawng a zawh zâwk a, Baala-te tân milem chhûn chawpte a siam bawk a.

³Hinoma fapa ruamah rimtui te a hâl a LALPAN Israela thlahte hmaa a hnawh chhuah tâk hnamten thil tenawm tak an tih ṭhin angin a fate meiah a luhtîr a.

⁴Tin, hmun sângah te, tlângah te, thing hring tin hnuaiah te a inthawi a, rimtuite a hâl ṭhîn a.

⁵Chuvângin, LALPA a Pathianin Suria lal kutah a pe a; an bei a, a mite tam tak salah an hruai a, Damaska-ah an kalpui a. Tin, Israel lal kutah pêk a ni bawk a, ani chuan tam tak a that a.

⁶Remalia fapa Peka chuan Judai ramah nuai khat leh sînghnih ni khatah a that a, an za chuan mi huaisen ṭheuh an ni; an pi leh pute LALPA Pathian chu an hawisan vâng a ni.

⁷Tin, Ephraim mi chak Zikrian lal fapa Maaseia leh in chhûng puipa Azrikama leh Elkana, lal dawttu chu a that a.

⁸Tin, Israela thlahten an unaute nuai hnih, hmeichhia te, an fapa te, an fanute salah an hruai a; râllâk tam tak an lâksak bawk a, râllâk chu Samari-ah an thlen a.

⁹Nimahsela, chutah chuan LALPA zâwlnei a lo awm a, a hming chu Odeda a ni; Samari-a lo kal tûr sipaite chu a va hmuak a, an hnênah, “Ngai teh u, LALPA, in pi leh pute Pathian chu Juda-te chungah a thinur a, in kutah a pe che u a ni a, thinrima in thahna chuan vân a han tawng ta a.

¹⁰Tin, Juda leh Jerusalem mite chu bawihnu leh bawihpaa siam in tum a; nimahsela, nangni ngei pawh hian LALPA in Pathian chungah in tisual ve a ni lâwm ni?

¹¹Chuvângin, ka thu hi pawm ula, in unau sala in mante hi hâwntîr leh rawh u, LALPA thinurna nasa tak mai chu in chungah a awm a ni,” a ti a.

¹²Tichuan, Ephraim-ho hotu ṭhenkhat, Johanana fapa Azaria te, Mesilemotha fapa Berekia te, Saluma fapa Jehizkia te, Hadlaia fapa Amasa te chuan indona aṭanga lo hawte chu an lo kalh ve bawk a,

¹³an hnênah, “Salte chu in rawn hruai lût tûr a ni lo, kan sual leh kan bawhchhiatna belhchhahin LALPA chungah bawhchhiatna min thlensak dâwn a ni; kan sualna chu a nasa hle si a, Israel mite chungah thinurna nasa tak a awm a ni,” an lo ti a.

¹⁴Chutichuan, sipaite chuan mi liante leh mipui hmaah chuan salte leh râllâk sumte chu an hnutchhiah ta a.

¹⁵Tin, an hming lam tâkhote chu an lo tho va, salte chu an hruai a, râllâk thil chuanin saruaka awm zawngte chu silhfên an bân a, an tuam a, pheikhawkte an buntîr a, ei tûr leh in tûr an pe a, hriak te an thih a, a chhiaṭhate zawng zawng chu sabengtungah an chuantîr a, tûm khua Jeriko-a an unaute hnênah an kaltîr ta a; tin, anni chu Samari-ah an haw leh ta a.

¹⁶Chumi lai chuan Lal Ahaza chuan Suria lalte ṭanpuia sâwm tûrin mi a tîr a;

¹⁷Edom-ho chuan Juda-ho chu an han beiha, salah te an rawn man leh avângin.

¹⁸Tin, Philistia-hote pawhin phai lam khuate leh Juda Chhim te an rawn la a, Beth-semes te, Aijalon te, Gederoth te, Soko te a khawperte nên; tin, Timna leh a khawper te, Gimzo pawh a khawperte nên an la a, chûngah chuan an awm a.

¹⁹Juda lal Ahaza [1] khan Juda-te dik lo takin a timualpho fo va, LALPA chungah thil sual nasa tak a tih avâng khân LALPAN Juda-te chu a titlâwm a ni.

²⁰Tin, Suria lal Tilgath-pilnesera a hnênah a kal a, tihchak ahnêkin a timangang zâwk a.

²¹Ahaza chuan LALPA in leh lal in leh mi lian ina mi thilte a la a, Suria lal a pe a; nimahsela, a sâwt chuang si lo.

²²A mangan lai tak te pawh chuan he Lal Ahaza hian LALPA chungah thil a la tisual deuh deuh ta mai a.

²³Amah beitu Damaska-ho pathian hnênah te a inthawi a; “Suria lalte pathian chuan anmahni a puih avângin mi puih ve theih nân an hnênah ka inthawi dâwn a ni,” te a ti a. Nimahsela, amah leh Israel mi zawng zawng chhiatna a ni si a.

²⁴Tin, Ahaza chuan Pathian ina bungbêlte chu a khâwm vek a, Pathian ina bungbêlte chu a tisawm vek a, LALPA in kawngkhârte chu a khâr tlat a; tin, Jerusalem kil tinah maichâm a siam a.

²⁵Tin, Juda khaw tam takah chuan pathian dangte tân rimtui hâl nân hmun sângte a siam a, LALPA, a pi leh pute Pathian a tithinur a.

²⁶A thiltih dang zawng zawng leh a awm dân zawng zawng, a bul aṭanga a tâwp thlengin, ngai teh, Juda leh Israel lalte chanchin buah a chuang a.

²⁷Tin, Ahaza chu a pi leh a pute hnênah a muhîl a, Jerusalem khawpuiah chuan an phûm a; Israel lalte thlânah chuan an dah lo a ni. Tichuan, a fapa Hezekia chu a aiah a lal ta a.