Read Mizo_Old_version BU HNIHNA CHRONICLES 29 Bible Online

BU HNIHNA CHRONICLES 29 - Mizo_Old_version bible

BU HNIHNA CHRONICLES 29

¹Hezekia chu kum sawmhnih leh kum nga mi a nihin a lal ṭan a, Jerusalem-ah kum sawmhnih leh kum kua a lal a; a nu hming chu Abiji, Zekaria fanu a ni a.

²Tin, a pu Davida thiltih apiang ti vein LALPA mit hmuha thil ṭha a ti ṭhîn a.

³Ani chuan a lal ṭan kum thla khatnaah LALPA in kawngkhârte chu a hawng a, a chei ṭha a.

⁴Puithiamte leh Levi-hote a hruai lût a, chhak lampang hmun zau laiah a hruai khâwm a,

⁵an hnênah, “Nangni Levi-hote u, ka thu hi ngaithla rawh u! Nangmahni intithianghlim phawt ula; tin, LALPA, in pi leh pute Pathian in hi tithianghlim ula, hmun thianghlim ata bawlhhlawhte hi paih chhuak rawh u.

⁶Kan pi leh pute chuan thil an lo tisual ta a, LALPA kan Pathian mit hmuha thil ṭha lo chu an lo ti a, an lo hawisan a, LALPA awmna chu an hawisan a, an lo hnuchhawn ta a.

⁷Hulhliap kawngkhârte chu an khâr a, khâwnvârte chu an timit a, Israel-te Pathian hmun thianghlimah chuan rimtuite an hâl lo va, hâlral thilhlante an hlân lo bawk a.

⁸Chu vâng chuan LALPA thinurna chu Juda-te leh Jerusalem chungah a awm a, in mita in hmuh ang hian, ram tin ram tanga tei tei tûr leh mak tih atân leh nuihzatbûr atân a lo siam ta a ni.

⁹Ngai teh u, kan pi leh pute chu khandaiha tihtlâwmin an lo awm a, kan fanu leh kan fapate, kan nupuite chu chûng avâng chuan salah an lo awm a.

¹⁰Ngai teh u, a thinurna nasa tak chu a kian theih nân LALPA, Israel-te Pathian hnênah thuthlun ka tum a ni.

¹¹Ka naute u, ngûrchuai suh u, LALPA chuan, a rawngbâwltu in ni a, a hmaa a rawngbâwla awm tûr leh rimtui hâltuah a thlang tawh che u a ni,” a ti a.

¹²Chutichuan, Levi mi Amasaia fapa Mahatha te, Kohath mi Azaria fapa Joela te, Meraria fapate zînga Abdia fapa Kisa te, Jehalelela fapa Azaria te, Gerson mi Zima fapa Joa te, Joa fapa Edena te,

¹³Elizaphana fapate zînga mi Simria leh Jeiela te, Asapha fapate zînga mi Zekaria leh Matania te,

¹⁴Hemana fapate zînga mi Jehuela leh Simeia te, Jeduthuna fapate zînga mi Semaia leh Uziela te chu an thawk chhuak a.

¹⁵An unaute an ko khâwm a, an intithianghlim a, LALPA thua lal thupêk anga LALPA in tifai tûrin an lût a.

¹⁶Tin, puithiamte chu a tifai tûrin LALPA in chhûngril lamah an lût a, LALPA biak ina thil bawlhhlawh an hmuh zawng zawng chu LALPA in kawtah an la chhuak a. Tin, Levi-hovin an la a, Kidron luiah an kalpui a.

¹⁷Thla khatna ni khat niah an bei ṭan a, chumi thla ni riat niah LALPA hulhliap an bei thleng a; tichuan, ni riatah LALPA in chu an tithianghlim a; thla khatna, ni sâwm leh ni ruk niah an zo vek a.

¹⁸Chutichuan, Lal Hezekia hnênah lal inah an lût a, “LALPA in chu kan tifai zo ta vek e, hâlral thilhlan hlanna maichâm te, chumia bungbêl zawng zawng te, chhang chhiahna dawhkân te, chumia hmanrua zawng zawngte pawh.

¹⁹Tin, Lal Ahazan a lal laia thil a tihsuala, a thehthang bo bungbêl zawng zawngte pawh kan din leh vek a, kan tithianghlim bawk a; tin, ngai teh, LALPA maichâm hma lamah a awm e,” an ti a.

²⁰Chutichuan, Lal Hezekia chu zîng takah a tho va, khuaa mi lianhote chu a ko khâwm a, LALPA inah chuan an chho va.

²¹Tin, ram leh hmun thianghlim leh Juda-hote tâna sual thawina tûr, bâwngpa pasarih leh berâmpa pasarih leh berâmno pasarih leh kêlpa pasarih an kai chho va. Tin, Arona fapa puithiamte chu LALPA maichâma hlân tûrin thu a pe a.

²²Chutichuan, bâwngpate chu an talh a, puithiamte chuan thisen chu an la a, maichâm chu an theh a; tin, berâmpate pawh chu an talh a, a thisen chuan maichâm chu an theh a; tin, berâmnote pawh chu an talh a, a thisen chuan maichâm chu an theh a.

²³Tin, kêlpate chu sual thawi nân lal leh mipuiho kiangah chuan an rawn kai hnai a, an chungah chuan an kut an nghat a.

²⁴Tin, puithiamte chuan an talh a, an thisen chuan Israel mi zawng zawng tâna remna siam nân maichâmah sual thawina an hlan a; Israel mi zawng zawng tân hâlral thilhlan leh sual thawina siam tûrin lal chuan thu a pe a.

²⁵Tin, Davida leh lal zâwlnei Gada leh zâwlnei Nathana thupêk angin, LALPA inah chuan Levi-ho chu dârbenthek te, perhkhuang te, ṭingṭangte tum tûrin a dah a; thupêk chu a zâwlneite hmanga LALPA pêk a ni si a.

²⁶Tin, Levi-ho chu Davida siam thil tum rîk mi nên an ding a, puithiamte chu tawtawrâwt nên.

²⁷Tin, Hezekia chuan maichâma hâlral thilhlan hlân tûr chuan thu a pe a. Tin, hâlral thilhlan an han hlan ṭan chuan LALPA hla chu tawtawrâwt leh Israel lal Davida siam thil tum rîk nên an sa ṭan bawk a.

²⁸Tin, mipuite chuan Pathian chibai an bûk a, hla satute chuan hla an sa a, tawtawrâwt hâmtute chuan an hâm a, hâlral thilhlan hlan zawh hma loh chuan chutiang chuan an ti reng a.

²⁹Tin, thilhlan an hlan zawh chuan lal leh a hnêna awm ve zawng zawngte chuan kûnin Pathian chibai an bûk a.

³⁰Tin, Lal Hezekia leh mi liante chuan Levi-hote chu Davida leh zâwlnei Asapha phuah fakna hla sa tûrin thu an pe a. Tin, hlim takin fakna hla an sa a, an kûn a, Pathian chibai an bûk a.

³¹Chutichuan, Hezekia chuan, “LALPA tân in intithianghlim ta a, lo hnai ula, LALPA inah inthawina leh lâwm thu sawina thilhlan rawn hlân rawh u khai,” a ti a. Tîn, mipuite chuan inthawina te, lâwm thu sawina thilhlante an rawn hlân a, a duh apiangin hâlral thilhlan an rawn hlân a.

³²Tin, mipuiin hâlral thilhlan an rawn hlan zât chu bâwngpa sawmsarih leh berâmpa za leh berâmno zahnih a ni; hêng zawng zawng hi LALPA tâna hâlral thilhlan vek a ni.

³³Thilhlan zawng zawng chu bâwngpa zaruk, berâmpa sângthum a ni.

³⁴Amaherawhchu, puithiam an tlêm lutuk a, hâlral thilhlan chu an lip sêng lo va; chuvângin, an unau Levi-hote chuan, an peih hma chuan puithiamte chu an intihthianghlim thlengin an puibâwm a (Levi-hote chu puithiamhote ai mahin intihthianghlim thu-ah an khermei zâwk si a).

³⁵Tin, hâlral thilhlante chu a tam êm a, hâlral thilhlan tin atâna remna thilhlan thau te, in tûr thilhlan atân te pawh a tam êm êm bawk a. Chutichuan, LALPA in rawngbâwl dân an tifel a.

³⁶Mipuite tâna Pathianin a buatsaih thil avâng chuan Hezekia leh mi zawng zawng chu an lâwm êm êm a; rin loh taka thil lo awm thut a ni lehnghâl si a.