Read Mizo_Old_version BU HNIHNA CHRONICLES 3 Bible Online

BU HNIHNA CHRONICLES 3 - Mizo_Old_version bible

BU HNIHNA CHRONICLES 3

¹Chutichuan, Solomona chuan Jerusalem-ah, Moria tlâng, a pa Davida hnêna LALPA inlârna, Jebus mi Ornana hruih zâwl, Davidan hmun a lo buatsaih saah chuan LALPA in chu a sa ṭan ta a.

²A lal kum li kum, thla hnihna, ni hnih niin a sa ṭan a.

³Pathian in sak dân tûr Solomonan a han rêl dân chu hetiang hi a ni: a dung lam chu tawng teh dân hluiin tawng sawmruk a ni a, a vâng lam chu tawng sawmhnih a ni.

⁴A hma lama hulhliap dung lam chu in vâng lam chen bawk, tawng sawmhnih a ni a, a sân lam chu za leh sawmhnih a ni a; a chhûng chu rangkachak hlîr hlak tîin a luan a.

⁵Tin, pindan lian zâwk bangah chuan fâr thing a bel a, chu chu rangkachak hlîr hlak tîin a luan a, chutah chuan tûm thing leh khaidiat lem a chuantîr a.

⁶Tin, a timawi tûrin in chu lunghlutein a chei a; rangkachak chu Parvaim rangkachak a ni.

⁷In chu, a kalkhang te, a bang te, a chhuat te, a kawngkhâr te chu rangkachakin a luan a; bangahte chuan cherub lemte a chuantîr a.

⁸Tin, hmun thianghlim ber a siam a; a dung lam chu in vâng lam chen bawk, tawng sawmhnih a ni a, a vâng lam chu tawng sawmhnih a ni a; rangkachak hlîr hlak tîin a luan a, talent zaruk a tling a.

⁹Tin, a kilhna rih lam chu rangkachak sekel sawmnga a ni. Tin, pindan chungnungte chu rangkachakin a luan a.

¹⁰Tin, hmun thianghlim berah chuan cherub lem pahnih a siam a; chûng chu rangkachakin a luan a.

¹¹Tin, cherub thlate chuan tawng sawmhnih a awh a; cherub pakhat thla chu tawng nga a ni a, bang a va thleng a; tin, a thla lehlam pawh chu tawng nga bawk a ni a, cherub pakhat thla chu a va thleng a.

¹²Tin, cherub pakhat thla pawh chu tawng nga a ni a, bang chu a va thleng a; tin, a thla lehlam chu tawng nga bawk a ni a; cherub pakhat thla chu a va thleng a.

¹³Chûng cherub-te chuan tawng sawmhnih awhin an thla an zâr a, an ding a, in chhûng lam hawiin an ding a.

¹⁴Tin, puanzâr tûr a dumpâwl te, a senduk te, a senlâr te, la zai sîn taktein a siam a, chutah chuan cherub lemte a chuantîr a.

¹⁵Tin, a hma lamah chuan tawng sawmthum leh tawng ngaa sâng ban pahnih a phun a, chumi chhîp chu tawng nga ve ve a ni.

¹⁶Chumi hmunah chuan khaidiat a siam a, ban chhîpte chu a zem a; tin, pawmgranet za a siam a, khaidiatah chuan a khai a.

¹⁷Tin, biak in hma lamah chuan bante chu a phun a, pakhat ding lamah, pakhat vei lamah; tin, ding lama mi chu Jakin a ti a, vei lama mi chu Boaz a ti a.