Read Mizo_Old_version BU HNIHNA CHRONICLES 31 Bible Online

BU HNIHNA CHRONICLES 31 - Mizo_Old_version bible

BU HNIHNA CHRONICLES 31

¹Tin, chûng zawng zawng chu an tih zawh chuan chuta Israel mi awm zawng zawng chuan, Judai ram zawng zawng leh Benjamin ram leh Ephraim leh Manase rama mi lungphunte an tisawm a, Aseri-te an kit a, hmun sângte leh maichâmte an tihchim vek hma loh chuan Judai ram khuaahte an kal zêl a. Tin, Israela thlahte zawng zawng chu an ramah mahni khaw lam ṭheuhvah an haw leh ta a.

²Tin, Hezekia chuan puithiamte leh Levi-hote chu an pâwl dân ang zêlin mi tin puithiamte leh Levi-hoten an thawh ṭheuh tûrin, hâlral thilhlan leh remna thilhlan hlântu atân te, rawngbâwltu atân te, lâwm thu sawitu leh LALPA awmna kawngkaa vêngtu tûrte pâwl a siamsak hlawm a.

³Tin, LALPA dâna chuang angin zîng lam leh tlai lam hâlral thilhlan atân te, Chawlhni leh thla thar leh hunbi nei kût atânte lal chanvo atân ran a ruat bawk a.

⁴Tin, Jerusalem-a mipuite chu LALPA dâna an intihchak nân puithiamte leh Levi-hote chanpual pe tûrin thu a pe bawk a.

⁵Tin, thupêk chu a han darh veleh chuan Israela thlahte chuan an buh te, uain te, hriak te, khawizu te, an lova thil haw hmasa berte an rawn pe chiam a; tin, an engkim sâwma pakhat an rawn pe chiam bawk a.

⁶Tin, Israela thlahte leh Juda thlahte, Juda khuatea awmho chuan an bâwng leh berâm sâwma pakhat te, LALPA an Pathian puala an voh sâwma pakhat te an rawn pe a, an dah khâwm ṭeuh mai a.

⁷Thla thumnaah an dah khâwm ṭan a, thla sarihnaah an dah khâwm zo va.

⁸Tin, Hezekia leh an mi lianten an han hmuh chuan LALPA leh a mi Israel-te chu an fak a.

⁹Chutichuan, Hezekian an thil dah khâwm chungchâng thu chu puithiamho leh Levi-hote chu a zâwt a.

¹⁰Tin, Zadok mi, puithiam hotu Azarian a chhâng a, “Miten LALPA ina thilpêk an rawn lâk tirh aṭangin kan ei zêl a, kan khawpkham hle a, a la awm rui mai a; LALPAN a mite mal a sâwm zêl a, hemi la awm rui hi kan ei bâng a nih hi,” a ti a.

¹¹Chutichuan, Hezekian LALPA inah chuan pindante siam tûrin thu a pe a; tichuan, an siam ta a.

¹²Tin, thilpêk te, sâwma pakhat te, Pathian pualte chu rinawm takin an thiar lût a; an hotu chu Levi mi Konania a ni a, a unau Simeia chu a dawttu a ni.

¹³Tin, Konania leh a unau Simeia hnuaiah chuan Lal Hezekia leh Pathian ina hotu Azaria ruatin endiktu Jehiela te, Azazia te, Nahatha te, Asahela te, Jerimotha te, Jozabada te, Eliela te, Ismakia te, Mahatha te, Benaia te an awm a.

¹⁴Tin, Levi mi Imna fapa Korea, chhak lam kawngkhâr vêngtu chu Pathian hnêna mahni duh thua thilpêk enkawltu leh LALPA tân thilpêk leh thil thianghlim semtu a ni a.

¹⁵Tin, ama hnuaiah, puithiam awmna khuaahte chuan Edena te, Miniamina te, Jesua te, Semaia te, Amaria te, Sekania te an awm leh a, chûng chuan an unaute chu a pâwl pâwlin a lian leh a tête hnênah an chanvo tûr an sem bawk a;

¹⁶thlahtua ngaih mipa kum thum achin chung lam, ni tina LALPA ina thawh tûr mamawh nei an pâwl dân ang zêla kal ṭhînte tiam lovin.

¹⁷Puithiamte hna inchhâwk dân tûr chu a chi chiin an ruat a, Levia chite erawh chu kum sawmhnih achin chung lam a pâwl pâwlin an ruat a.

¹⁸Puithiamte chu an nupui te, an fapa te, an fanu te leh an chhûngkuaa mi dangte nên rinawm taka an intihthianghlim reng avângin chhinchhiah vek an ni a.

¹⁹Tin, Arona thlah, khaw tin daifêma awm puithiamte leh Levi-ho thlahte ziaknaa chuang apiangte chanvo pe tûrin mi ruat bîk an awm.

²⁰Tin, chutiang chuan Judai ram zawng zawngah Hezekian a ti a. LALPA a Pathian mit hmuha ṭha leh dik leh rinawm thil a ti ṭhîn a.

²¹Pathian ina rawngbâwl lam thu-ah te, dân lam thu-ah te, thupêk lam thu-ah te, a Pathian zawn thu-ah te, a tih apiangah a rilru zawng zawngin a ti a, a hmuingîl ta zêl a.