Read Mizo_Old_version BU HNIHNA CHRONICLES 34 Bible Online

BU HNIHNA CHRONICLES 34 - Mizo_Old_version bible

BU HNIHNA CHRONICLES 34

¹Josia chu a lal ṭan tirhin kum riat mi a ni a, Jerusalem-ah kum sawmthum leh kum khat a lal a.

²Tin, LALPA mit hmuhah thil ṭha a ti ṭhîn a, a pu Davida kawngte a zawh a, ding lamah emaw, vei lamah emaw a pênsan lo va.

³Kum riat a lal kum, naupang tak a la nih lai aṭang rêngin a pu Davida Pathian a zawng ṭan a; tin, kum sâwm leh kum hnih a lal kumin Judai ram leh Jerusalem-a hmun sâng te, Aseri te, milem siam chawp te, milem chhûn chawpte a thian fai a.

⁴Baala maichâmte chu a mit hmuhah an tichim a; tin, chûng aia sânga ni lemte chu a kit a; Aseri te, milem siam chawp te, milem chhûn chawpte chu a tisawm dep a, an hnêna inthawi ṭhînte thlân chungah a theh darh vek a.

⁵Puithiamte ruh chu an maichâmahte a hâl a, Judai ram leh Jerusalem chu a thian fai a.

⁶Tin, chutiang bawk chuan Manase te, Ephraim te, Simeon te, Naphtali khuate lamin a ti vek a.

⁷Tin, maichâmte a tichim a, Aseri te, milem siam chawpte chu a tisawm dep a, Israel ram zawng zawnga ni lemte chu a kit vek a, Jerusalem-ah a haw leh a.

⁸Tin, a lal kum sâwm leh kum riat kum, a ram leh inte a then fai kum chuan Azalia fapa Saphana te, khaw awptu Maaseia te, Joahaza fapa lehkhaziaktu Joa te chu LALPA a Pathian in siam ṭha tûrin a tîr a.

⁹Tin, puithiam Hilkia hnênah an kal a, kawngkhâr vêngtu Levi-hoten Manase mi te, Ephraim mi te, Israel-ho la awm chhun te, Juda mi leh Benjamin mi te, Jerusalem-a mite hnên ata an lo lâk khâwm, Pathian ina an rawn dah tangka chu an pe a.

¹⁰Tin, LALPA in satu hnathawktute an pe a; tin, LALPA in hnathawktute chuan in siam ṭhatute leh cheitute an pe a;

¹¹Juda lalten an lo tihchhiat tâk in siam ṭhat nân lung chher te, a zawmna te leh a khanchhukte atâna thing lei nân themthiamte leh in satute chu an pe a.

¹²Tin, mite chuan hna chu rinawm takin an thawk a; an hotu, hnathawh rêlbâwltute chu, Meraria fapate zînga Levi mi Jahatha leh Obadia te, Kohath mi fapate zînga mi Zekaria leh Mesulama-te an ni a; tin, Levi mi mi dang, thil tum thiam zawng zawngte nên.

¹³A phurha phur mite hotu pawh an ni a, hna tinrêng thawktute thawh tûr rêlbâwltu an ni. Lehkhaziaktu te, hotu te, kawngkhâr vêngtute chu Levi mite zînga mi an ni.

¹⁴Tin, LALPA ina an rawn dah sumte an han phawrh chuan, puithiam Hilkia chuan Mosia hmanga pêk LALPA dân bu chu a hmuchhuak a.

¹⁵Tin, Hilkia chuan lehkhaziaktu Saphana hnênah chuan, “LALPA inah dân bu kan hmuchhuak ta,” a ti a. Tin, Hilkia chuan lehkhabu chu Saphana a pe a.

¹⁶Tin, Saphana chuan lehkhabu chu lal hnênah a kalpui a, “I chhiahhlawhten tih tûra ruat zawng zawng chu an ti a.

¹⁷LALPA ina tangka awm chu an bun chhuak a, hotute leh hnathawktute chu an pe a,” tiin thu a thlen a.

¹⁸Tin, lehkhaziaktu Saphana chuan, “Puithiam Hilkia chuan lehkhabu mi pe,” tiin lal chu a hrilh bawk a. Tin, Saphana chuan lal hmaah a chhiar a.

¹⁹Tin, heti hi a ni a, lalin dân thute chu a han hriat chuan a puan a pawt thlêr a.

²⁰Tin, lal chuan, “Kal ula, dân thu in hmuhchhuah chungchâng thu-ah hian, keimah leh Israel leh Judai rama mite tân LALPA min va râwnsak teh u; kan pi leh puten he dân bua chuang ang hian LALPA thu chu an lo zawm loh avâng hian, kan chungah LALPA thinurna chu a lo awm nasa ta a ni si a,” tiin Hilkia te, Saphana fapa Ahikama te, Mika fapa Abdona te, lehkhaziaktu Saphana te, lal chhiahhlawh Asaia te chu thu a pe a.

²²Tichuan, lalin thu a pêkate leh Hilkia chu, silhfên enkawltu Hasra fa Tokhatha fapa Saluma nupui zâwlnei Huldi hnênah chuan an va kal a, chumi thu-ah chuan an va bia a (Ani chu Jerusalem Misne-a awm a ni).

²³Tin, ani chuan an hnênah, “LALPA, Israel-te Pathian chuan heti hian a ti: Ka hnêna rawn tîrtu che u chu hrilh ula,

²⁴‘LALPA chuan heti hian a ti: Ngai teh u, he hmun leh a chhûnga awmte chungah hian thil ṭha lo ka thlentîr ang a, Juda lal hmaa an chhiar chhuah tâk lehkhabua chuang ânchhia zawng zawngte pawh;

²⁵an kut thiltiha min tihthinur nâna min hawisana, pathian dangte tâna rimtui an hâl avângin he hmun chungah hian ka thinurna leih a ni a, tihdaih a ni lo vang,’ tiin.

²⁶Amaherawhchu, LALPA râwn tûra rawn tîrtu che u Juda lal hnênah chuan hetiang hian sawi ang che u, ‘LALPA, Israel-te Pathian chuan heti hian a ti: Chûng thu i hriatte chuan i thinlung a tihnêm avânga Pathian hmaa i intihhniama, he hmun chungchâng thu leh a chhûnga awmte chungchâng thu i hriata, ka hmaa i intihhnuaia, i puan i pawh thlêra, ka hmaa i ṭah avângin kei pawhin i thu chu ka lo ngaithla a.

²⁸Ngai teh, i pi leh i pute hnênah ka kaltîr ang chia, i thlânah thlamuang takin i kal ang a, he hmun leh a chhûnga awmte chunga ka rawn thlentîr tûr thil ṭha lo zawng zawngte chu i mitin a hmu lo vang,’ tiin, ti rawh u,” a ti a. Tin, lal hnênah thu chu an thlen ta a.

²⁹Tichuan, lal chuan mi a tîr a, Judai ram leh Jerusalem-a upa zawng zawng chu a ko khâwm a.

³⁰Tin, lal leh Juda mi zawng zawng, Jerusalem-a mi zawng zawng te, puithiam leh Levi-ho te, mipuiho zawng zawng a lian a têin LALPA inah an chho va; LALPA ina an hmuhchhuah thuthlung bua thu zawng zawng chu an beng hriatah a chhiar a.

³¹Tin, lal chu a hmunah a ding a, chumi lehkhabua chuang thuthlung thu chu tinghet tûrin, a thinlung zawng zawng leh thlarau zawng zawnga LALPA zui tûr leh a thupêk te, a thuhriattîr te, a thuruatte pawm tûrin LALPA hmaah chuan thu an thlung a.

³²Tin, Jerusalem leh Benjamin mi zawng zawng chu chutianga awm tûrin a ti a. Tin, Jerusalem-a mite chuan Pathian, an pi leh pute Pathian thuthlung ang chuan an ti a.

³³Tin, Josia chuan, Israel ramin a huam zawng zawng ata thil tenawm zawng zawng chu a thehthang bo va, Israel rama awm zawng zawng chu LALPA an Pathian rawng a bâwltîr a. Tin, a dam chhûng chuan LALPA, an pi leh pute Pathian an zui chu an pênsan lo.