Read Mizo_Old_version BU HNIHNA CHRONICLES 35 Bible Online

BU HNIHNA CHRONICLES 35 - Mizo_Old_version bible

BU HNIHNA CHRONICLES 35

¹Tin, Josia chuan Jerusalem-ah LALPA tân kalhlên kût a nei a; kalhlên kûtna tûr chu thla khatna, ni sâwm leh ni li niah an talh a.

²Tin, puithiamte chu an hnathawh a ruatsak a, LALPA ina rawngbâwl hna thawk tûrin a fuih a.

³Tin, Israel mite zirtîrtu, Pathian tâna tihhran Levi-hote hnênah chuan, “Israel lal Davida fapa Solomona in sakah chuan bâwm thianghlim chu dah rawh u; in kokia zâwn a ngai tawh lo vang; LALPA in Pathian leh a mi Israel-te rawng bâwl tawh rawh u khai.

⁴Tin, Israel lal Davida ziak ang leh a fapa Solomona ziak angin, in chhûngkaw puipa zir zêlin a pâwl pâwlin inbuatsaih rawh u.

⁵Tin, in unauteho chhûngkaw puipa zir zêlin Levi-hote puala chanvo neiin hmun thianghlimah chuan awm rawh u.

⁶Kalhlên kûtna tûr talh ula, intithianghlim ula, Mosia hmanga LALPA sawi anga ti tûrin in unaute tân buatsaih rawh u,” a ti a.

⁷Tin, Josian chuta mi awm zawng zawng chu kalhlên kûta hlan tûrin ran rual zînga mi berâmno leh kêlno sîngthum leh bâwngpa sângthum a pe a; chûngte chu lal sum zînga mi a ni.

⁸Tin, a mi liante chuan mipui te, puithiam te, Levi-hote chu mahni duh thua hlan atân an pe a. Pathian in hotu Hilkia te, Zekaria te, Jehiela te chuan kalhlên kûta hlan tûrin ran no sânghnih leh zaruk leh bâwngpa zathum puithiamte an pe a.

⁹Tin, Konania te, a unau Semaia leh Nethanela te, Levi-hote hotu Hasabia te, Zeiela te, Jozabada te pawhin kalhlên kûta hlan atân Levi-hote chu ran no sângnga leh bâwngpa zanga an pe a.

¹⁰Tichuan, rawngbâwlna chu an buatsaih a, lal thupêk angin puithiamte chu an hmunah an ding a, Levi-hote chu an pâwl dân ang zêlin.

¹¹Tin, kalhlên kûtna tûr chu an talh a, puithiamte chuan thisen chu an theh a, Levi-hote chuan an lip a.

¹²Tin, Mosia lehkhabua chuang anga an chhûngkaw ṭhen dân zir zêla LALPA hnêna hlan atâna pêk tûrin, hâlral thilhlante chu an la sawn a. Bâwngpate pawh chu chutiang bawk chuan an ti a.

¹³Tin, kalhlên kûtna tûr chu dân angin an hem hmin a; tin, thilhlan thianghlim sa chu bêl te, bêl khaina nei te, bêl rawng zautein an chhûm kawi a, mi zawng zawng hnênah an kalpui a.

¹⁴Tin, chumi zawhah chuan anmahni leh puithiamte tân an buatsaih a; Arona fa puithiamte chu hâlral thilhlan leh sa thau hlânin zân thlengin an buai si a; chuvângin, Levi-hote chuan anmahni leh Arona fa puithiamte tân an buatsaih a ni.

¹⁵Tin, Davida leh Asapha leh Hemana leh lal zâwlnei Jeduthuna-te thupêk angin, hla satu Asapha fapate chu an hmunah an ding a; tin, kawngkhâr vêngtute chu kawngkhâr tinah an awm a; an unau Levi-hoten an buatsaihsak avângin an hna kalsan a ngai lo va.

¹⁶Chutichuan, Lal Josia thupêk anga kalhlên kût nei tûr leh LALPA maichâma hâlral thilhlan hlân tûrin, chumi ni vêk chuan LALPA rawngbâwlna thil zawng zawng chu an buatsaih a.

¹⁷Tin, Israela thlah chuta awmte chuan chumi ni chuan kalhlên kût an nei a, chhang dawidim telh loh kût pawh ni sarih an nei bawk a.

¹⁸Zâwlnei Samuela dam lai ata Israel ramah kalhlên kût chutiang rêng rêng chu an nei ngai lo va; Israel lal tu mahin Josia leh puithiamte leh, Levi-hote leh Juda zawng zawng leh, Israel-te leh Jerusalem-a miten an neih anga nei an awm hek lo.

¹⁹Kum sâwm leh kum riat Josia a lal kumin chu kalhlên kût chu an nei a ni.

²⁰Chûng zawng zawng hnua Josian biak in a buatsaih zawh chuan, Aigupta lal Nekoa chu Karkhemis bei tûrin Euphrates luiah a han chho va; tin, Josia chuan a han bei a.

²¹Nimahsela, ani chuan, “Nang Juda lal, kei leh nang eng nge kan intihna tûr awm? Nang bei tûrin ka lo kal lo va, ka do laite bei tûr zâwkin asin ni ka lo kal; Pathianin hmanhmawh tûrin thu min pe a, ka lama ṭang Pathian chu dodâl suh khai, a tiboral dah ang che,” tiin palai a tîr a.

²²Nimahsela, Josia chuan a kîrsan duh lo va, a do theih nân a inbâwl danglam a, Pathian kâ aṭanga Nekoa thusawi chu a pawm lo va, Megido ruamah lo bei tûrin a kal a.

²³Tin, thal kâp mite chuan Josia chu an han kâp a; tin, lal chuan a chhiahhlawhte hnênah, “Min kal bopui rawh u, hliam nasa tak ka tâwk ta,” a ti a.

²⁴Chutichuan, a chhiahhlawhte chuan tawlailîr ata chu an la chhuak a, a tawlailîr dangah chuan an dah a, Jerusalem-ah an kalpui a, a thi a, a pi leh pute thlânah an phûm ta a. Juda mi zawng zawng leh Jerusalem-a miten Josia chu an sûn a.

²⁵Jeremia chuan Josia chu a ṭah a. Tin, hla satu hmeichhia leh mipate chuan tûn thlengin Josia an ṭah hla chu an la chham a. Israel ramah chuan dânah an neih a, ngai teh, ṭah hlaah chuan a chuang ta a.

²⁶Josia thiltih dang zawng zawng, LALPA dâna chuang anga a thiltih ṭha te,

²⁷a hmasa ber leh a hnuhnûng berte pawh, ngai teh, Israel lal leh Juda lalte chanchin buah a chuang a.