Read Mizo_Old_version BU HNIHNA CHRONICLES 36 Bible Online

BU HNIHNA CHRONICLES 36 - Mizo_Old_version bible

BU HNIHNA CHRONICLES 36

¹Tichuan, chumi rama mite chuan Josia fapa Joahaza chu an hruai a, Jerusalem-ah a pa aiah lalah an siam ta a.

²Joahaza chu a lal ṭan tirhin kum sawmhnih leh kum thum a ni a, Jerusalem-ah thla thum a lal a.

³Aigupta lalin Jerusalem-a a lalna a bân a, an ram chu tangkaraw talent za leh rangkachak talent khat a chawitîr a.

⁴Tin, Aigupta lal chuan a unaupa Eliakima chu Juda leh Jerusalem-a lalah a siam a, a hming chu Jehoiakima tiin a thlâksak a. Tin, Nekoa chuan a unaupa Joahaza chu Aigupta ramah a hruai a.

⁵Jehoiakima chu a lal ṭan tirhin kum sawmhnih leh kum nga a ni a, Jerusalem-ah kum sâwm leh kum khat a lal a; LALPA a Pathian mit hmuha thil ṭha lo a ti ṭhîn a.

⁶Babulon lal Nebukadnezzara chu amah bei tûrin a lo thawk a, Babulon-a hruai tûrin kawl a buntîr a.

⁷Nebukadnezzara chuan LALPA in bungbêlte pawh Babulon-ah a la a, Babulon-a a pathian biak inah a dah a.

⁸Jehoiakima chanchin dang te, a thil tenawm tih te leh a awm dânte chu, ngai teh, Israel lal leh Juda lalte chanchin buah a chuang a. Tichuan, a fapa Jehoiakina chu a aiah a lal ta a.

⁹Jehoiakina chu a lal ṭan tirhin kum riat mi a ni a, Jerusalem-ah thla thum leh ni sâwm a lal a; LALPA mit hmuha thil ṭha lo a ti ṭhîn a.

¹⁰Kum a lo vei chuan Lal Nebukadnezzara chuan mi a tîr a, LALPA ina bungbêl ṭha tak takte nên Babulon-ah a hruaitîr a, a unaupa Zedekia chu Judai ram leh Jerusalem-a lalah a siam a.

¹¹Zedekia chu a lal ṭan tirhin kum sawmhnih leh kum khat a ni a, Jerusalem-ah kum sâwm leh kum khat a lal a.

¹²LALPA a Pathian mit hmuha thil ṭha lo a ti ṭhîn a; LALPA kâ aṭanga thu sawitu zâwlnei Jeremia lakah chuan a intihnuai duh lo va.

¹³Pathian hminga chhechhamtîrtu Lal Nebukadnezzara chungah a hel bawk a; luhlul a chhuah a, LALPA, Israel-te Pathian lam hawi lo tûrin a rilru a tikhauh va.

¹⁴Puithiam hotu zawng zawng leh mipuite pawhin Pathian hre lo mite tih ang bawk thil tenawm tak takte an ti a; Jerusalem-a a tihthianghlim LALPA inte pawh chu an tibawlhhlawh a.

¹⁵Tin, LALPA, an pi leh pute Pathian chuan an hnênah theihpatâwpa ṭhahnemngaiin mi a tîr a, a mite leh a awmna hmun chu a lainat avângin.

¹⁶Nimahsela, Pathian mi tirhte chu an hmusit a, a thute chu an ngainêp a, a mite chunga LALPA thinurna chu a lo thawk a, tihlungawi lehna rêng awm lo khawp hialin a zâwlneite chu an tinawmnah a.

¹⁷Chuvângin, Kaldai lal an chungah a thawhtîr a, ani chuan an tlangvâlte chu an hmun thianghlimah khandaihin a that a, nula leh tlangvâl pawh, tar pawh, tarchhia pawh lainatna rêng rêng a nei lo va; a kutah a pe vek a.

¹⁸Tin, Pathian ina bungbêl zawng zawng, a lian pawh, a tê pawh, LALPA ina sum dah khâwm zawng zawng te, lal sum dah khâwm leh a mi liante sum dah khâwmte lamin Babulon-ah a la vek a.

¹⁹Tin, Pathian in te an hâl a, Jerusalem kulh te an tichim a, chuta in ropui zawng zawng chu an hâl a, chuta bungbêl ṭha mi zawng zawng chu an tichhe vek a.

²⁰Khandaiha thah bâng zawng zawng chu Babulon-ah a hruai a, amah leh a fapate chhiahhlawhah Persia-ho lo len thlengin an awm ta a.

²¹LALPAN zâwlnei Jeremia hmanga thu a lo sawi Chawlhni serh thei lova an awm chhûng kum sawmsarih, Chawlhni an serh leh theih thlengin, ram chu tihchhiatin a awm ang, a tih kha a lo thleng ta a ni.

²²Chutichuan, Persia lal Kura lal tirh kumin Jeremia kâa LALPA thu chu a thlen kim theih nân, a ram zawng zawnga than chhuak vek tûr leh, a ziaka ziak tûr pawhin LALPAN Persia lal Kura thinlung chu a chawk tho va,

²³“Persia lal Kura chuan heti hian a ti: ‘Khawvêl ram zawng zawng chu LALPA, vân Pathian chuan min pe ta a; tin, Judai rama Jerusalem-ah chuan a in saksak tûrin thu mi pe a ni. In zînga ama mite tawh phawt hnênah chuan LALPA a Pathian chu awm sela, han chho rawh se,’” tiin.