Read Mizo_Old_version BU HNIHNA CHRONICLES 4 Bible Online

BU HNIHNA CHRONICLES 4 - Mizo_Old_version bible

BU HNIHNA CHRONICLES 4

¹Tin, dâr maichâm, a dung lam tawng sawmhnih, a vâng lam tawng sawmhnih, a sân lam tawng sâwm a siam bawk a.

²Dâr zêm bial lian pui, a tlâng leh a tlâng inkâra tawng sâwm tla, a sân lam tawng nga a chhûng bawk a; a tlâng chu tawng sawmthum bial vêl a ni.

³A tlâng hnuai chu kuhmûm lemte hian a vêl chhuak a, tawng khatah sâwm zêl, dâr zêm vêl chuan a awm a. Kuhmûm lem chu tlar hnih a ni a, dâr zêma chhûn belhbawm a ni.

⁴Chu chu bâwngpa sâwm leh pahnih chungah a innghat a, pathumin hmâr lam an hawi a, pathumin thlang lam an hawi a, pathumin chhim lam an hawi a, pathumin chhak lam an hawi a; hnung lam an inchhawn ṭheuh va,

⁵tuizêm chu kutphah bawka chhah a ni a, ṭin sângkhat leh zahnih dawng a ni, a tlâng chu no tlâng ang, lili pâr anga siam a ni.

⁶Insilna tûr maihûn sâwm a siam bawk a, ding lampangah panga a hûng a, vei lampangah panga a hûng a; chûng chu hâlral thilhlan silna tûr a ni a; dâr zêm erawh chu puithiamte insilna tûr a ni.

⁷Tin, a siam dân tûra ruat angin rangkachak khâwnvâr dahna sâwm chu a siam a, biak in chhûngah chuan ding lamah panga, vei lamah panga a dah a.

⁸Dawhkân sâwm a siam bawk a, biak in chhûngah chuan ding lamah panga, vei lamah panga a dah a. Tin, rangkachak maihûn za a siam a.

⁹Chûng lo pawh chu kawtzâwl, puithiamho ta leh a pâwn zâwkah kawtzâwl zau a siam a, kawngkhârpui a siam bawk a, dârin a luan a.

¹⁰Tin, zêm chu in ding lampangah chhak lamah chhim chhawngin a hûng a.

¹¹Tin, Hurama chuan bêl te, vutlawh te, maihûnte a siam a. Chutichuan, Pathian in atâna Lal Solomona a siamsak chu Hurama chuan a peih ta a;

¹²ban pahnih te, bêl anga bâwk te, ban chhîpa bêl anga bâwk pahnih te, ban chhîpa bêl anga bâwk pahnih tuamna ṭial chik chek pahnih te,

¹³chumi tuamna ṭial chik chek pahnih atâna pawmgranet zali te, ban chhîpa bêl anga bâwk pahnih tuamna tûr ṭial chik chek ve ve atâna pawmgranet tlar hnih te.

¹⁴Hûnchhan te, hûnchhan chunga bêlte pawh a siam a;

¹⁵zêm pakhat leh a hnuaia sebâwngpa sâwm leh pahnihte nên.

¹⁶Bêl te, vut lawhna te, sa thurna te leh a bungbêl zawng zawngte pawh chu Hurama chuan LALPA in atân dâr nawh tlêta Lal Solomona a siamsak a ni.

¹⁷Chûngte chu Jordan phaizâwlah Sukkoth leh Zereda bellei hmunah lal chuan a chhûng a.

¹⁸Chutiang chuan Solomonan bungbêl tam tak a siam a; dâr chu bûk sên rual a ni lo.

¹⁹Tin, Solomona chuan Pathian ina bungbêl awm zawng zawng chu a siam a, rangkachak maichâm te, chhang chhiahna dawhkân te,

²⁰ruat anga hmun thianghlim hmaa chhit tûr khâwnvâr dahna te, a khâwnvâr chawpin, rangkachak hlîr hlakin a siam a;

²¹tin, pangpâr te, khâwnvâr te leh chaichehte chu rangkachak, rangkachak hlîr hlakin a siam a;

²²tin, khâwnvâr puan chehna te, maihûn te, fian te, mei lâknate chu rangkachak hlîr hlak bawkin; tin, in chhûng luhna, in chhûngril zâwk hmun thianghlim ber kawngkhârte leh a in, biak in kawngkhârte chu rangkachakin a siam a.