Read Mizo_Old_version BU HNIHNA CHRONICLES 5 Bible Online

BU HNIHNA CHRONICLES 5 - Mizo_Old_version bible

BU HNIHNA CHRONICLES 5

¹Tichuan, Solomona chuan LALPA in atâna a sak chu a peih ta vek a; tin, Solomona chuan a pa Davidan thil a lo hlan tawh zawng zawng chu a la lût a; tangkarua te, rangkachak te, hmanrua zawng zawngte chu Pathian ina ro dahnaah a dah ta a.

²Chutichuan, Solomona chuan Israel upaho te, an hnam puipa, Israela thlahho chhûngkaw puipa zawng zawng chu, Davida khawpui Zion ata LALPA thuthlunna bâwm zâwn chho tûrin Jerusalem khuaah a khâwm chiam a.

³Chutichuan, Israel mi zawng zawng chu thla sarihnaah kûtah chuan lal hnênah an kal khâwm chiam a.

⁴Tin, Israel upaho zawng zawng chu an lo kal a, Levi-hote chuan bâwm chu an zâwn a.

⁵Tin, LALPA bâwm leh, inbiakna puan in leh puan ina bungbêl thianghlim zawng zawng chu an zâwn chho va; chûngte chu puithiam Levi-hote chuan an zâwn chho va.

⁶Tin, Lal Solomona leh Israel-ho pung khâwm zawng zawng a hnêna rawn inkhâwmte chu bâwm hmaah an awm ho va, berâm leh bâwngpa sawi sên rual loh leh chhiar sên rual lohvin an inthawi a.

⁷Tichuan, puithiamte chuan LALPA thuthlunna bâwm chu a awmna tûrah an la lût a, in chhûnga biakna hmun, hmun thianghlim berah, cherub-te thla hnuaiah chuan.

⁸Cherub-te chuan bâwm awmna chung zâwnah chuan an thla an zâr reng a, cherub-te chuan bâwm leh a zâwnfungte chu an khuh vek a.

⁹Tin, a zâwnfungte chu a sei khawp a, a zâwnfung hmâwrte chu biakna hmunhma, hmun thianghlim aṭang chuan a hmuh theih a; amaherawhchu, pâwn lamah zawng a lang lo; tûn thleng hian chutah chuan a la awm reng a ni.

¹⁰Aigupta ram ata an chhuaha, LALPAN Israela thlahte hnêna thu a thlun laia Mosian Horeb tlânga lungphêk pahnih a dah chauh lo kha chu, chumi bâwm chhûngah chuan eng mah dang a awm lo.

¹¹Tin, heti hi a ni a, puithiamhote chu hmun thianghlim ata an lo chhuah veleh chuan (puithiam awmho zawng zawng chu an intithianghlim a, a pâwlin an insiam chuang lo va;

¹²Levi-ho hla satu zawng zawng pawh an zavaiin, Asapha te, Hemana te, Jeduthuna te, an fapate leh an unaute nên, puan zai sîna inthuamin dârbenthek te, perhkhuang te, ṭingṭangte nên, maichâm chhak lampangah an ding a, an zîngah chuan puithiam za leh sawmhnih tawtawrâwt hâmin an awm bawk a ni),

¹³heti hi a ni a, tawtawrâwt hâmtute leh hla satuten LALPA fakna leh lâwm thu sawi nâna an tum rîk chu ri khat ang maiin a hriat a; tawtawrâwt leh dârbenthek leh thil tum rîk nêna an aw an han chhuaha, “Ani chu a ṭha si a, a ngilneihna chu kumkhuain a awm dâwn a ni,” tia LALPA an han fak chuanin, LALPA in chu chhûmin a khat ta mup mup mai a;

¹⁴tichuan, chhûm avâng chuan puithiamte chuan rawng pawh an bâwl thei ta lo hial a; LALPA ropuinain Pathian in chu a khat ta vek si a.