Read Mizo_Old_version BU HNIHNA CHRONICLES 6 Bible Online

BU HNIHNA CHRONICLES 6 - Mizo_Old_version bible

BU HNIHNA CHRONICLES 6

¹Chutichuan, Solomonan thu a sawi a: “LALPAN, ‘Thim chhah mupah chuan ka awm ang,’ a ti tak a;

²nimahsela, i chênna tûr in, kumkhuaa i awmna tûr chu ka lo saksak ta che a nih hi,” tiin.

³Tin, lal chu a lehhawi a, Israel-ho pung khâwm zawng zawng chu mal a sâwm a; Israel-ho pung khâwm zawng zawng chu an ding ṭhup a.

⁴Tin, ani chuan, “LALPA, Israel-te Pathian, ka pa Davida hnêna ama kâ ngeia,

⁵‘Aigupta ram ata ka mi Israel-te ka hruai chhuah ni aṭangin Israel-ho hnam zînga khawii khua mah hi, ka hming awmna tûr in sak nân ka la thlang ngai lo va; ka mi Israel-te chunga hotu tûr mi tu mah ka la thlang ngai hek lo.

⁶Amaherawhchu, ka hming awmna tûrin Jerusalem hi ka lo thlang ta a, ka mi Israel-te hotu atân Davida hi ka lo thlang ta a ni,’ tia lo sawitu, ama kut ngeia rawn puitlintu hi fakin awm rawh se.

⁷Ka pa Davida khân Israel-te Pathian, LALPA hming tân in sak a rilrûk ṭhîn a.

⁸Nimahsela, LALPAN ka pa Davida hnênah, ‘Ka hming tân in sak i rilrûk ṭhîn a, hetiang rilru i lo pu hi i tiṭha e;

⁹nimahsela, nang zawngin in chu i sa lo vang a; i fapa, i ṭhâlbea la chhuak tûra chuan ka hming tân in chu a la sa zâwk ang,’ a lo ti tawh a.

¹⁰Tin, LALPAN a thusawi chu a rawn hlen ta a; LALPA lo tiam tawh ang ngeiin ka pa Davida hmun chu ka lo luah a, Israel lalṭhutthlêngah chuan ka lo ṭhu a, Israel-te Pathian, LALPA hming tân in chu ka lo sa ta a ni.

¹¹Chutah chuan Israela thlahte hnêna a lo thlun, LALPA thuthlunna bâwm chu ka dah ta a ni,” a ti a.

¹²Tin, LALPA maichâm bulah Israel pung khâwm zawng zawng hmuhah chuan a ding a, a bân a phar a

¹³(Solomona chu dâr dawhkân a sei lam tawng nga, a zau lam tawng nga, a sân lam tawng thuma siam biak in kawtlai taka a hûnah chuan a chuang a, Israel pung khâwmho zawng zawng hmaah chuan a ṭhingṭhi a, vân lam hawiin a bân a phar a),

¹⁴“Aw LALPA, Israel-te Pathian, lei leh vânah nangmah ang rêng Pathian an awm lo, an thinlung zawng zawnga i kawng zawhtu i chhiahhlawhte chungah chuan thuthlung hlenin i khawngaih ṭhîn a;

¹⁵i chhiahhlawh ka pa Davida hnêna i thutiam chu i hlen a; a ni, vawiinah hian i kaa i lo sawi tawh chu i kutin i hlawhtlintîr ta a.

¹⁶Chutichuan, aw LALPA, Israel-te Pathian, i chhiahhlawh ka pa Davida hnêna, ‘I thlahte chu i awm anga awm ve tûra an awm dâna an fîmkhur phawt chuan, ka mit hmuha Israel-te lalṭhutthlênga ṭhu tûr chu i hmai lo vang,’ tia i lo tiam tâk kha hlen ang che.

¹⁷Chutichuan, LALPA, Israel-te Pathian, i chhiahhlawh Davida hnêna i thu lo sawi chu hlawhtlintîr ngei ang che.

¹⁸“Amaherawhchu, nang Pathian chu lei mihringte zîngah i chêng takmeuh dâwn em ni le? Ngai teh, vân zau takah pawh i leng lo a ni a, he ka in sakah hian i va leng lo nasa lehzual âwm êm!

¹⁹Nimahsela, aw LALPA ka Pathian, i chhiahhlawhin a auhna che leh a ṭawngṭaina hi ngaihthlâksakin, i chhiahhlawh ṭawngṭaina leh dîlna hi rawn ngaihsak ang che:

²⁰hemi hmun lam hawia i chhiahhlawh a ṭawngṭaina chu ngaithlaa, ‘Chutah chuan ka hming chu a awm ang,’ i tihna hmun ngei in lamah hian chhûn leh zâna i mit i lên reng ṭhin theihna tûrin.

²¹Tin, i chhiahhlawh leh i mi Israel-te hian hemi hmun lam hawia an ṭawngṭai hunin, an dîlnate lo ngaihthlâksak ṭhîn ang che; a ni, i chênna hmun vânan lo ngaithla la; tin, lo ngaithlain ngaidam ang che.

²²“Mi tu pawhin a vêngte chungah thil tisualin, chhechhamtîr hial lo ṭûl sela, hemi ina i maichâm hmaah hian rawn chham sela,

²³nangin vânan lo ngaithla la, che la, mi sual chu a sual mana thiam loh chantîrin, mi fel chu a fel mana thiam chantîrin i chhiahhlawhte rorêlsak ang che.

²⁴“I mi Israel-te hian i chunga thil an tihsual avânga hmêlmate laka an lo tlâwma, i lam an lo hawi leha, i hming an ṭana, hemi ina ṭawngṭaia thil an rawn dîl che chuan,

²⁵nangin vânan lo ngaihthlâksak la, i mi Israel-te sualna chu ngaidam la, anmahni leh an pi leh pute i pêk ramah chuan hruai leh ang che.

²⁶“I chunga thil an tihsual avânga vân a lo pina, ruah te a lo sûr lohva, hemi hmun lam hawia an ṭawngṭaia, i hming an ṭana, anmahni i tihhrehawm avânga an sualte an sim chuan,

²⁷nangin vânan lo ngaithla la, an kalna tûr kawng ṭha kawhhmuhin i chhiahhlawhte leh i mi Israel-te sualna hi ngaidamin, i mite an rochan atân i pêk i ramah hian ruah han sûrtîr ang che.

²⁸“Kan ramah hian ṭâm te a lo tlâka, hri te a lo lêna, rona emaw, ṭawihna emaw, khaukhuap emaw, pangang emaw a lo awma, an hmêlmaten an khuate an rawn huala, hri eng pawh, natna eng pawh a lo thlen chuan,

²⁹an hri vei emaw, an lungngaihna emaw hria apiangin, he in lam hawia bân phara, i mi Israel-te zînga tu pawhin ṭawngṭaina leh dîlna an rawn thlen chu,

³⁰i awmna vânan lo ngaithla la, ngaidam la, mi tin an awm dân ang ṭheuh zêlin hlawhtlintîr ang che, an thinlung i hre ṭheuh si a (Nangmah chauh hi mihring fate thinlung hretu i ni si a);

³¹kan pi leh pute i pêk rama an awm chhûng zawnga i kawng zawh theihna tûra an ṭihna tûr chein.

³²“Tin, i mi Israel-te ni lo, hnam dang mi, i hming ropui tak leh i kut chak tak leh i bân phar avânga ram hla tak ata lo kala, hemi in lam hawia an rawn ṭawngṭai hunin,

³³nangin i awmna vânan lo ngaithla la, hnam dangte pawh an koh dân che ang zêlin an chungah ti ang che; tichuan, i mi Israel-te ang bawkin khawvêla hnam tinin i hming an hria ang a, an ṭih ang chia, he in ka sak hian i hming a pu tih an hre dâwn nia.

³⁴“I miten an hmêlmate chu i tirhna lam apianga an beihin, i khawpui thlan leh i hming tâna in ka lo sak lam hawia i hnêna an ṭawngṭai chuan,

³⁵nangin an ṭawngṭaina leh an dîlna chu vânan lo ngaithla la, an thu-ah chuan pui zêl ang che.

³⁶“I chunga an lo suala (tu mah sual lo an awm si lo), an chunga i thinura, hmêlma kuta i pêka, ram hla takah emaw, hnai deuhvah emaw sala an hruai emaw pawha,

³⁷sala an hruaina rama an inngaihtuah chhuaha, an inchhîra, ‘Kan lo sual ta a, dik lo tak leh suahsualthlâk takin thil kan lo ti ta a ni,’ tia,

³⁸an tânna rama dîlna an rawn thlena, sala hruaituten an hruaia an tânna rama an thinlung tak leh an rilru tak taka i lam an lo hawia, an pi leh pute ram lam leh i khawpui thlan leh i hming tâna ka in sak lam hawia i hnêna an ṭawngṭai chuan,

³⁹an ṭawngṭaina leh an dîlna chu nangin i awmna vânan lo ngaithla la, an thu-ah chuan pui zêl la, i chunga lo sual ta i mite chu ngaidam ang che.

⁴⁰“Aw ka Pathian, khawngaih takin i mit lo meng la, he hmuna ṭawngṭainaah hian i beng lo chhi ang che.

⁴¹Aw LALPA Pathian, i awmna hmunah chuan chho rawh, nang leh i chakna bâwm nên; aw LALPA Pathian, i puithiamte chu chhandamnain thuam la, i mi thianghlimte chu ṭhatnain tihlim rawh.

⁴²Aw LALPA Pathian, i hriak thiha hmêl chu hawi kîrtîr suh la, i chhiahhlawh Davida thil ṭha tihte chu hre reng ang che,” a ti a.