Read Mizo_Old_version BU HNIHNA CHRONICLES 8 Bible Online

BU HNIHNA CHRONICLES 8 - Mizo_Old_version bible

BU HNIHNA CHRONICLES 8

¹Tin, heti hi a ni a, Solomonan LALPA in leh ama in a sak chhûng kum sawmhnih a lo vei chuan,

²Huraman Solomona khua a pêkte chu Solomona chuan a din a, Israela thlahte a awmtîr a.

³Tin, Solomona chuan Hamath-zoba a bei a, a hneh a.

⁴Tin, thlalêrah Tadmor a din a, Hamath-a bungraw dahna khuate nên.

⁵Tin, Beth-horon chhakta zâwk leh thlangta zâwk pawh, kulhte, kawngkhârte, a kalhnate neiin a din bawk a;

⁶tin, Baalath khua te, a bungraw dahna khua zawng zawng te, a tawlailîr dahna khua te, a sakawr chung chuang mite awmna khua te, Jerusalem leh Lebanon leh a ram chhûng zawng zawngah Solomona chuan a duh ang angin a din a.

⁷Tin, Israela thlahte ni ve lo, Hit-ho te, Amor-ho te, Periz-ho te, Hiv-ho te, Jebus-hote thlah, Israela thlahten an tihboral loh, chu rama la awmte chu Solomonan chhiahhlawh hnathawka rawih luih pâwlah a siam a, tûn thleng hian.

⁹Israela thlahte erawh chu Solomonan a hnathawktu chhiahhlawh atân a siam ve lo va, indo mi te, a sipai hotu te, puipa te, a tawlailîr leh a sakawr chung chuang mi hotute an ni zâwk a.

¹⁰Chûngte chu mipuite ho ṭhîntu, Solomona puipa berte an ni a, zahnih leh sawmnga an ni.

¹¹Tin, Solomona chuan Pharaoa fanu chu Davida khawpui ata a puala in a saksakah chuan a hruai chho va, “Ka nupui chu Israel lal Davida inah chuan a awm tûr a ni lo, LALPA bâwm lo thlenna hmun thianghlim a ni,” a ti a ni.

¹²Chutichuan, Solomona chuan hulhliap hma lama a siam LALPA maichâmah chuan Mosia thupêk angin,

¹³ni tin atâna bituk tâwk ang zêlin Chawlhniah te, thla thar niah te, kût bi nei, kum khatah vawi thum chhang dawidim telh loh kûtah te hâlral thilhlante a hlân a.

¹⁴Tin, a pa Davida lo ruat ang khân, puithiam pâwl te leh Levi-hote chu an chanpual ṭheuhva ni tina thawh ṭûl ang zêla fak tûr te, puithiamte hmaa rawngbâwl tûr tein a ruat a; tin, kawngkhâr tinah a pâwl pâwla vêngtute a ruat bawk a; chutiang chuan Pathian mi Davida chuan a lo ruat a ni.

¹⁵Lalin puithiamhote, Levi-hote thu a pêk chu eng kawngah mah, sum thu-ah te pawh an ngaihthah ngai hauh lo.

¹⁶Tin, LALPA in an din ṭan tirh aṭanga an peih thlengin Solomona lo buatsaih ang chiah a ni. Tichuan, LALPA in chu puitlin a ni ta a.

¹⁷Chutichuan, Solomona chu Edom rama tuifinriat kama Ezion-geber-ah leh Eloth-ah a kal a.

¹⁸Tin, Hurama chuan a chhiahhlawh tuifinriata che ṭhang mite chu, lawngte nên a kaltîr a; Solomona chhiahhlawhte nên Ophir-ah an kal a, chuta mi chu rangkachak talent zali leh sawmnga an rawn hâwn a, Lal Solomona hnênah an rawn thlen a.