Read Mizo_Old_version BU HNIHNA CHRONICLES 9 Bible Online

BU HNIHNA CHRONICLES 9 - Mizo_Old_version bible

BU HNIHNA CHRONICLES 9

¹Tin, Solomona hmingthanzia Seba lalnuin a lo hriat chuan Solomona chu thu khirh tak taka fiah tumin hnung zuitu tam tak hruaiin, sanghâwngseitea englo rimtuite leh rangkachak tam tak leh lunghlute phurin, Jerusalem-ah a han kal a; tin, Solomona hnên a han thlen chuan, a rilrua awm zawng zawng chu phawrh fai vekin a bia a.

²Tin, Solomona chuan a thu zawh zawng zawng chu a chhâng vek a; Solomona chuan a chhân theih loh rêng rêng a awm lo va.

³Tin, Solomona finzia te, a in sak te, a dawhkâna ei tûr te, a puipateho ṭhut dân te, a rawngbâwltuteho rawngbâwl dân te, an inchei dân te, a no hlântute leh an inchei dân te, LALPA ina a han chhohna te Seba lalnuin a han hmuh chuan rilru ahleih a nei ta lo va.

⁵Lal hnênah chuan, “I thiltihte leh i finzia thuthang ka rama ka lo hriat chu a dik ngei a lo nih hi le;

⁶nimahsela, keima mit ngeia ka rawn hmuh hma loh chuan an sawi mai chu ka awih ṭhîn lo va, ngai teh, i finna ropuizia zâtve pawh mi lo hrilh hlei nêm le; i hmingthan ka lo hriat dân chu i khûm daih mai a.

⁷I mite chu an va nihlawhin, hêng i chhiahhlawh i bula awm fova, i finna thu ngaithla fo ṭhînte hi an va nihlawh êm!

⁸LALPA i Pathian, i chunga lâwm, a lal atâna a lalṭhutthlênga ṭhuttîrtu che LALPA i Pathian chu fakin awm rawh se; i Pathianin Israel-ho hi kumkhuaa tihngheh atân a hmangaih a; chuvângin, fel taka rorêl tûrin an lalah a siam che a nih hi,” a ti a.

⁹Chutichuan, lal chu rangkachak talent za leh sawmhnih leh englo rimtui tam tak mai leh lunghlute a pe a, Seba lalnuin Lal Solomona englo rimtui a pêk ang rêng rêng hi a awm lo.

¹⁰Tin, Solomona chhiahhlawhte leh Hurama chhiahhlawhte, Ophir aṭanga rangkachak va phurte pawh chuan algum thing leh lunghlute an rawn phur a.

¹¹Tin, lal chuan algum thing chu LALPA in leh lal in hung nân leh hla satute tâna ṭingṭang leh perhkhuangah a siam a; chutiang chu Judai ramah tûn hma lam chuan an la hmu ngai lo.

¹²Tin, Seba lalnu hnênah chuan a duh apiang, lal hnêna a rawn ken aia tam zâwk fe chu Lal Solomona chuan a pe bawk a. Chutichuan, a ram lamah a hote nên an haw leh ta a.

¹³Mi inawmpawlhho leh sumdâwnghote rawn lâk luh tiam hauh lovin, Solomona hnêna kum khat chhûnga rangkachak lo lût rih lam chu rangkachak talent zaruk leh sawmruk leh paruk bûk a ni; tin, Arabia lal zawng zawng leh ram awptute chuan Solomona hnênah rangkachak te, tangkarua te an rawn la ṭhîn a.

¹⁵Tin, Lal Solomona chuan rangkachak den phêkin phaw lian mi zahnih a siam a: phaw lian pakhatin rangkachak sekel zaruk a duh a.

¹⁶Tin, rangkachak den phêkin phaw zathum a siam a; phaw pakhatin rangkachak sekel zathum a duh a; chûng chu Lebanon ngawpui inah chuan a dah a.

¹⁷Tin, lal chuan saingho lalṭhutthlêng ropui tak a siam bawk a, rangkachak hlîr hlakin a luan a.

¹⁸Lalṭhutthlêngah chuan a kai chhohna rahka paruk te, lalṭhutthlêng nêna zawm, rangkachak ke nghahchhan te, ṭhutthlêng sîr tuaka bân nghahna te, a bân nghahna bula ding sakeibaknei lem pahnih te a awm a.

¹⁹Tin, rahka paruk sîr tuak chungah chuan sakeibaknei sâwm leh pahnih a ding a; chutiang chu khawii ramah mah an siam ngai lo.

²⁰Lal Solomona no zawng zawng chu rangkachak vek a ni a; tin, Lebanon ngawpui ina bungbêl zawng zawng pawh rangkachak hlîr hlak vek a ni a; Solomona dam lai chuan tangkarua chu engah mah an ngai lo.

²¹Lal chuan lawng rual, Hurama chhiahhlawhte Tarsis-a kal ṭhîn kawppui a nei a, kum thum dan zêlah Tarsis lawng rual chuan rangkachak te, tangkarua te, saingho te, zâwng te, ârâwn te a rawn phur ṭhîn a.

²²Chutichuan, Lal Solomona chuan khawvêl lal zawng zawng chu hausakah leh finah a khûm vek a ni.

²³Tichuan, Pathianin a thinlunga a dah, a finna thu chu ngaithla tûrin khawvêl lal zawng zawng chuan Solomona chu an pan huai huai ṭhîn a.

²⁴Tin, kum tin pêk bi neiin tangkaraw bungbêl te, rangkachak bungbêl te, puan te, râlthuam te, englo rimtui te, sakawr te, sabengtungte an rawn pe ṭheuh ṭhîn a.

²⁵Tin, Solomona chuan sakawr leh tawlailîr dahna hmun sângli a nei a; tin, sakawr chung chuang mi sîngkhat leh sânghnih a nei a, chûngte chu tawlailîr dahna khuaah te, Jerusalem-a lal hnênahte a awmtîr a.

²⁶Tin, Lui aṭanga Philistia ram leh Aigupta ram thlenga lal zawng zawng chungah a lal a.

²⁷Tin, lal chuan Jerusalem khuaah chuan a tam êm avângin tangkaruate chu lung ang maia ngaih khawpin a awmtîr a, sidar thingte chu phaia theipui thing ang leka ngaih khawpin a awmtîr a.

²⁸Tin, Solomona tân sakawrte Aigupta aṭangte leh ram tin aṭangtein an rawn la ṭhîn a.

²⁹Solomona chanchin dangte chu a bul aṭanga a tâwp thlengin zâwlnei Nathana ziak chanchin buah te, Silo mi Ahija hrilh lâwkna buah te, Nebata fapa Jeroboama chungchâng thua zâwlnei Idova inlârna buah te a chuang lo vem ni?

³⁰Tin, Solomona chu Jerusalem-ah Israel mi zawng zawng chungah kum sawmli a lal a.

³¹Tin, Solomona chu a pi leh pute hnênah a muhîl a, a pa Davida khuaah an phûm a, a aiah a fapa Rehoboama a lal ta a.