Read Mizo_Old_version Ezra 1 Bible Online

Ezra 1 - Mizo_Old_version bible

Ezra 1

¹Persia lal Kura lal tirh kumin zâwlnei Jeremia hmanga a lo sawi tawh chu LALPAN a thlen kimtîr ta a. He thupêk pe tûr leh a ram zawng zawnga chhiar vek tûra thawn chhuak tûrin LALPA chuan Kura thinlung chu a chawk tho va.

²“Persia lal Kura chuan heti hian a ti: ‘Khawvêl ram zawng zawng chu LALPA, vân Pathian chuan mi pe ta a; tin, Judai rama Jerusalem-ah chuan a in saksak tûrin thu mi pe a ni.

³In zînga ama mite tawh phawt hnênah chuan a Pathian chu awm rawh se; tichuan, Judai rama Jerusalem-ah chuan han chho sela, LALPA, Israel-hote Pathian in, Jerusalem-a awm chu han sa rawh se; amah chu Pathian a ni.

⁴Tin, tu pawh, khawii hmunah pawha an awmnaa la châmbang apiangte chu, an awmna hmuna mite chuan Jerusalem-a awm Pathian in tân anmahni duh thua an thawh tiam lovin, tangkarua te, rangkachak te, bungrua te, ran tein lo ṭanpui rawh se,’ ” tiin.

⁵Chutichuan, Juda leh Benjamin chia chhûngkaw puipa deuh deuhte, puithiamte, Levi-hote, Jerusalem-a LALPA in han sa tûra Pathianin an thinlung a chawh thawh zawng zawngte chu an thawk ta a.

⁶Tin, anmahni duh thua thawh tiam lovin, an vêla mi zawng zawngte chuan tangkaruaa siam bungbêl te, rangkachak te, bungrua te, ran te, thil hlu tak takte an pein, an ṭanpui a.

⁷Lal Kura pawhin Nebukadnezzaran LALPA ina bungbêl Jerusalem aṭanga a lâk chhuaha, a pathiante ina a dahte chu a la chhuak leh a;

⁸chûng ngei chu Persia lal Kura chuan a vawngtu Mithredatha a lâk chhuahtîr a, a chhiar a, Juda puipa Sesbazzara a hlân a.

⁹Tin, hêng hi a zât chin chu a ni: rangkachak maihûn sawmthum, tangkaraw maihûn sâng, chemtê sawmhnih leh pakua;

¹⁰rangkachak no sawmthum, tangkaraw no chi dang zali leh sâwm, bungbêl dang sângte nên.

¹¹Rangkachak leh tangkaraw bungbêl zawng zawng chu sângnga leh zali a ni. Salte chu Babulon ata Jerusalem-a an hruai chhoh lai khân Sesbazzaran hêng zawng zawng hi a keng chho va.