Read Mizo_Old_version Ezra 3 Bible Online

Ezra 3 - Mizo_Old_version bible

Ezra 3

¹Tin, thla sarihna a lo thlena, Israel mite chu khuaahte an awm lai chuan, mite chu thukhat vuain Jerusalem khuaah an inkhâwm a.

²Chutichuan, Jozadaka fapa Jesua leh a unau puithiamte leh Sealtiela fapa Zerubabela leh a unaute chu an tho va, Pathian mi Mosia dâna chuang angin hâlral thilhlan nân Israel-te Pathian maichâm an siam a.

³Tin, maichâm chu a hmun ngaiah chuan an din a; chûng rama awmte chu an hlau hle nâ a, maichâmah chuan LALPA tân hâlral thilhlante an hlân a, zîng lam leh tlai lamah hâlral thilhlan chu an hlân ṭhîn a ni.

⁴An ziak ang khân bâwkte kût chuan an kût a, ni tina tih tûr chin ruat, a bi tâwk thliah ang zêlin ni tina hâlral thilhlan chu an hlân a;

⁵chumi hnuah chuan an ni tin hâlral thilhlan te, thla thar thilhlan te, LALPA tâna kût ni an ruata an serh apianga thilhlan te; tin, mahni duh thua thilhlan, LALPA hnêna lâwm taka hlan ṭhinte chu an hlân a.

⁶Thla sarihna, ni khat aṭangin hâlral thilhlante LALPA hnênah an hlân ṭan a; nimahsela, LALPA biak in lungphûm chu an la phûm lo va.

⁷Lung chhertu leh themthiamte pawh tangka an pe a; tin, Persia lal Kuran a phal dân ang zêlin, sidar thing Lebanon aṭanga tuifinriat, Jopa thlenga rawn la tûrin Zidon mite leh Tura mite chu ei tûrte leh in tûrte leh hriak te an pe a.

⁸Tin, Jerusalem-a Pathian in an thlenna kum hnihna, thla hnihnaah chuan Sealtiela fapa Zerubabela te, Jozadaka fapa Jesua te, an unau puithiam leh Levi chi dangte leh sala chhuak Jerusalem-a chho zawng zawng nên chuan an bei ṭan a; Levi chite chu kum sawmhnih mi aṭanga a chung lam mite chu LALPA in saka hotu atân an ruat a.

⁹Chutichuan, Jesua chu a fapate leh a unaute nên, Kadmiela, a fapate nên, Juda fapate nên chuan Pathian in satute chu an ho tlâng ta a: Henadada fapate, an fapate leh an unau Levi chite nên.

¹⁰Tin, a satuten LALPA in lungphûm an han rem chuan puithiamte chu an thuam inbela tawtawrâwt kengin, Levia chi Asapha fapate chu Israel lal Davida tih dân ruat anga LALPA fak tûrin an dintîr a.

¹¹“Ani chu a ṭha si a, a ngilneihna chu Israel mite chungah a awm kumkhua dâwn a ni,” tiin, LALPA fak leh a hnêna lâwm thu sawiin hlain an inchhâwn a. LALPA in lungphûm an phûm tâk avânga LALPA an faknaah chuan mipui zawng zawng chu an au dur dur mai a.

¹²Puithiam leh Levi chi leh chhûngkaw puipa tam tak, a in hmasa hmutu putarhote erawh chu an mit hmuhah, hemi in lungphûm an phûm chuan an ṭap vak vak mai a. Tin, mi tam tak chu lâwm avângin an au vak vak bawk a;

¹³chutichuan, mite chuan lâwm avânga au thâwm leh mipui ṭap thâwm chu an thlei thei chuang lo va; mipui chu ring takin an au vak vak mai a, an thâwm chu hla tak aṭangin an hria a ni.