Read Mizo_Old_version Ezra 4 Bible Online

Ezra 4 - Mizo_Old_version bible

Ezra 4

¹Juda mi leh Benjamina mite hmêlmate chuan sal chhuakhovin LALPA, Israel-te Pathian biak in an saksak tih an lo hriat chuan,

²Zerubabela leh an chhûngkaw puipate hnên lamah an va kal a, an hnênah, “Kan sakpui ve ang che u; keini pawhin in zawn ang hian in Pathian chu kan zawng ve a; heta min hruai chhotu Assuria lal Esar-haddona a lal lai aṭang khân a hnênah kan inthawi ṭhîn asin,” an ti a.

³Nimahsela, Zerubabela leh Jesua leh Israel-te chhûngkaw puipa dangte chuan an hnênah, “Kan Pathian in saksaknaah hian in tel vena kawng rêng rêng a awm lo ve; Persia lal Kura thu min pêk angin keimahniho ngawtin LALPA, Israel-te Pathian kan saksak dâwn a ni,” an ti a.

⁴Chutichuan, chumi rama mite chuan Juda mite kut chu an tihchauhsak a, an in sa chu an tibuai a.

⁵Persia lal Kura lal chhûng zawng, Persia lal Daria lal thleng hialin an thiltih tumte engmahlova siam tûrin sawipuitute an ruai a.

⁶Chutichuan, Ahasuera lal lai, a lal ṭan tirh laiin Judai ram leh Jerusalem-a awmte hêkna lehkha an phuah a.

⁷Tin, Artazerzia lal lai chuan Bislama te, Mithredatha te, Tabeela te leh an ṭhian dangte nên chuan Persia lal Artazerzia chu lehkha an thawn a; an lehkha ziak chu Aramaik ṭawngin Aramaik hawrawpa ziak a ni.

⁸Hotu Rehuma leh lehkhaziaktu Simsaia chuan Jerusalem-a mite hêkin Persia lal Artazerzia hetiang lehkha hi an thawn a:

⁹Lehkha thawntute chu: Hotu Rehuma leh lehkhaziaktu Simsaia leh a ṭhiante - rorêltute leh ram awptute, Persia mi te, Elam rama awm ṭhîn Erek mi te, Babulon mi te leh Susan mi te;

¹⁰mi ropui Asurbanipalan sala a hruai Samaria khuaah leh Euphrates lui thlang lama a awmtîr tâkte an ni.

¹¹Lal Artazerzia chu hetiangin lehkha an thawn a: “Lalber Artazerzia chu i chhiahhlawh Euphrates lui khawthlang lam ram miten chibai kan bûk e.

¹²I hnên aṭanga Juda mi lo chhote chu kan hnênah Jerusalem-ah an lo kal a; khaw hel hmang leh sual chu an din ṭha a, a kulh chu an peih tawh a, a lungphûm chu an siam ṭha tawh tih lal chuan lo hre rawh se.

¹³Hemi khua hi an dina, a kulhte an siam zawh chuan, chhiah te, thil neih man te leh lei mante an chawi duh lo vang a, a tâwpah chuan lalte tân chhiatna a lo ni mai ang tih lalin lo hre rawh se.

¹⁴Lal ina chi liak kan nih avângin lal mawi lohna hmuh hi kan tân a fel lo hle si a;

¹⁵chuvângin, i pi leh pute thil chhinchhiah ziakna buah i zawna, chumi ziakna buah chuan i hmuha, hemi khua hi hel hmang khua a nih leh lalte leh an ramte tâna thil hlauhawm tak a niha, an hel kumkhuaa, chumi avâng chuan he khua hi a lo chhia a ni tih i hriat nân lehkha kan thawn a, lal kan hriattîr a ni.

¹⁶Hemi khua hi an dina, a kulhte an peih vek chuan lui râl lamah rêng rêng chuan chan i neih loh phah ang tih lal kan hriattîr a ni,” an ti a.

¹⁷Chutichuan, lalber chuan chhânna a thawn a, “Hotu Rehuma te, lehkhaziaktu Simsaia te leh an ṭhian dang Samaria ram leh Euphrates lui thlang lama awmte chibai ka bûk a che u.

¹⁸Kan hnêna in lehkha rawn thawn kha ka hmaah fiah takin an chhiar a.

¹⁹Tin, thu ka pe a, an zawng a, he khua hi hmân aṭangin lal chungah an hel ṭhîn a, chutah chuan helna leh buaina a awm ṭhîn tih chu kan hmu chhuak a ni.

²⁰Jerusalem-ah khân lal thiltithei tak tak, lui râl lehlam ram thlenga rorêlte pawh an lo awm tawh a; chhiah te, thil neih man te, lei mante an la ṭhîn a.

²¹Khâng mite kha chawlhtîr ula, thu ka pêk hma loh chuan khua chu din suh se.

²²Muang hauh suh u; engah tehlul nge lalte tâna chhiatna thil pawi tak a lo zualkai ang?” a ti a.

²³Chutichuan, Lal Artazerzia lehkha chu Rehuma leh lehkhaziaktu Simsaia leh an ṭhiante hmaa an chhiar zawh chuan, hmanhmawh takin Jerusalem-a Juda-te hnênah an kal a, thuneihnain an bân luihtîr a.

²⁴Chutichuan, Jerusalem-a Pathian in an beih chu an chawlhsan ta a; Persia lal Daria lal kum hnihna thlengin chawlhsan a ni ta a.