Read Mizo_Old_version Ezra 5 Bible Online

Ezra 5 - Mizo_Old_version bible

Ezra 5

¹Chutih lai chuan zâwlnei pahnih, Hagaia leh Idova fapa Zekaria-te chuan, Judai ram leh, Jerusalem-a Juda awmte hnênah Israel-te Pathian hmingin thu an sawi a.

²Chutichuan, Sealtiela fapa Zerubabela leh Jozadaka fapa Jesua chuan Jerusalem-a Pathian in chu an han bei ṭan leh ta a; tin, an hnênah chuan anmahni ṭanpuiin Pathian zâwlneite chu an awm a.

³Chu veleh chuan lui râl ram awptu Tatenaia leh Sethar-bozenaia leh an ṭhiante chu an hnênah chuan an kal a, an hnênah chuan heti hian an sawi a, “He in sa tûr leh he kulh tizo tûr hian tuin nge thu pe che u?” an ti a.

⁴Tin, hetiang hian an hnênah, “Hemi in satute hming hi tute nge ni?” kan ti a.

⁵Nimahsela, an Pathian mit chu Juda upate chungah chuan a fu a, Daria hnênah an thu chu thlena, chhânna a lo thlen hma loh chuan ram awptute chuan an bântîr chuang lo.

⁶Lui râl lehlam awptu Tatenaia leh Sethar-bozenaia leh a ṭhian, lui râla awm Apharsak-hoten Lal Daria hnênah lehkha an thawn a,

⁷hetiang hian an ziak a: “Lal Daria hnênah thlamuanna kim awm rawh se.

⁸Hei hi lalin lo hre rawh se. Judai ramah Pathian ropui tak in, lung lian tak taka sak leh bang thinga rem, taima tak leh tluang taka an lo beih tawhnaah chuan kan kal a.

⁹Chutichuan, ‘He in sa tûr leh he kulh tizo tûr hian tuin nge thu pe che u?’ tiin an upate kan zâwt a.

¹⁰An hotu hmingte chu kan ziak a, kan hriat fiahtîr theih nân che an hmingte pawh chu kan zâwt a.

¹¹“Tin, anni chuan heti hian mi chhâng a, ‘Lei leh vân Pathian chhiahhlawhte kan ni a, kum kha leh chena sak, Israel lal ropui tak pakhat lo sak zawh tawh in chu kan sa ṭha leh a ni.

¹²Amaherawhchu, kan pi leh puten vân Pathian chu thinrim khawpa an tihlungawi loh avângin, Kaldai mi Babulon lal Nebukadnezzara kutah a pe a, ani chuan he in hi a tichhia a, mite chu Babulon lamah a hruai a.

¹³Nimahsela, Babulon kal Kura lal tirh kumin, Lal Kura chuan he Pathian in hi sak ṭhat leh thu a pe a.

¹⁴Tin, Pathian ina rangkachak leh tangkaruaa siam bungbêl, Jerusalem-a Pathian ina mi Nebukadnezzaran a lâk chhuah, Babulon-a biak ina a lâk luhte chu Lal Kura chuan Babulon biak in ata a la chhuak a, mi pakhat a hming Sesbazzara, ram awptu atâna a siama chu a pe a.

¹⁵Tin, a hnênah, “Hêng bungbêl hi la la, kal la, Jerusalem-a biak inah dah la; tin, biak in chu a hmun ngaiah sak ni rawh se,” a ti a.

¹⁶Chutichuan, Sesbazzara ngei chu a kal a, Jerusalem-a biak in lungphûm chu a phûm a; chuta chin chu tûn thleng hian sak a ni ta reng a; nimahsela, la peih loh a la ni reng a,’ tiin.

¹⁷Chutichuan, lal ṭha tih zâwng a nih chuan, chutiang chu a ni ngei emaw, Babulon-a lal sum ina mi chu han zawng sela; tin, lal Kura chuan Jerusalem-a biak in sak chungchâng thu-ah hian a duh dân min han hrilh rawh se,” tiin.