Read Mizo_Old_version Ezra 6 Bible Online

Ezra 6 - Mizo_Old_version bible

Ezra 6

¹Chutichuan, Lal Daria chuan thu a pe a, Babulon-a an ro dah khâwmna, lehkhabu dahna in chu an zawng ta a.

²Tichuan, Media rama Akametha khuaa lal inah lehkhabu zial an hmu a, chutah chuan vawn ṭhat atân hetianga ziak hi a awm a:

³“Jerusalem-a Pathian in chungchângah Lal Kura chuan a lal ṭan tirh kumin hetiang hian thu a pe a: ‘An inthawina thilhlanna in chu sak ṭhat leh ni se; a lungphûm pawh nghet taka rem ni rawh se.

⁴A sân lam tawng sawmruk, a zau lam tawng sawmruk, lung lian pui pui tlar thuma rem hnuah thingphêk tlar khat siam tûr a ni a, a sakna hi lal sum aṭanga pêk tûr a ni.

⁵Tin, Pathian ina rangkachak leh tangkaraw bungbêl Nebukadnezzaran Jerusalem biak in ata a lâk chhuaha Babulon-a a lâkte pawh pêk kîr ni sela, Jerusalem-a biak ina a hmun ngai tê vêka la kîrin, Pathian inah dah tûr a ni,’ tiin.

⁶“Chuvângin, lui râl ram awptu Tatenaia leh Sethar-bozenaia leh lui râla awm an ṭhian Apharsak-hote u, intifihlîm rawh u khai.

⁷He Pathian biak in an sa leh hi eng mah tih suh u; Juda-te awptu leh Juda upate chuan he Pathian in hi a hmun ngaiah sa rawh se.

⁸Chu bâkah, hêng Juda upaten he Pathian in an sakna tûrah hian ṭanpui tûrin thu ka pe a che u. Hna a bahlah loh nân a sakna tûr pawh Euphrates lui khawthlang bial chhiah, lal sum tûr aṭanga pêk thuai tûr a ni.

⁹Tin, vân Pathian tân hâlral thilhlan tûr an mamawh apiang, bâwngpatuai te, berâmpa te, berâmno te, buh chi te, uain te, hriak te, Jerusalem-a puithiamte thu ang zêlin ni tinin pêk ngei ngei tûr a ni;

¹⁰chutichuan, vân Pathian chu rimtuia inthawinate an hlân thei ang a, lal leh a fapate chu an dam rei nân an ṭawngṭaisak thei bawk ang.

¹¹Tu pawh he thu tidanglam apiang, chumi avâng chuan a khanchhuk phawisaka, amah chu chutah chuan khai kâna, a in chu êk dûra siam tûr a ni ang tih thu ka pe bawk a ni.

¹²Tin, chuta a hming awmtîrtu Pathian chuan Jerusalem-a Pathian in tihchhiat tuma he thu tidanglam tûra kut lek apiang, lal zawng zawng leh hnam zawng zawngte chu tiboral vek rawh se. Kei Daria hian thu ka pe a ni; zawm nghâl chiah tûr a ni.”

¹³Chutichuan, lui râl ram awptu Tatenaia leh Sethar-bozenaia leh a ṭhiante chuan Lal Daria lehkhathawn avângin chutiang chuan an ti ta nghâl a.

¹⁴Tin, zâwlnei Hagaia leh Idova fapa Zekaria thusawi avângin Juda upate chuan tluang takin an sa a. Israel-te Pathian thupêk ang leh Persia lal Kura leh Daria leh Artazerzia-te thupêk ang chuan an sa a, an zo ta a.

¹⁵Tin, in chu Lal Daria kum ruk a lal kum, Adar thla ni thum niah an zo va.

¹⁶Tin, Israela thlah, puithiam te, Levi chite leh sal chhuakho dangte chuan chumi Pathian in hlanna chu lâwm takin an hmang a.

¹⁷Tin, chumi Pathian in hlannaah chuan bâwngpa za, berâmpa zahnih, berâmno zali an hlân a; tin, Israel zawng zawng tân sual thawi nân Israel hnam zâtin kêlpa sâwm leh pahnih.

¹⁸Mosia lehkhabua chuang angin Jerusalem-a Pathian rawngbâwl tûr chuan puithiamte leh Levi chite chu an pâwl ṭheuhvah an awmtîr a.

¹⁹Tin, sal chhuakhote chuan thla khatna, ni sâwm leh ni li ni chu kalhlên kût ni atân an hmang a.

²⁰Puithiamte leh Levi chite chu an inthian ho va, an za chuan an lo thianghlim ta a; chutichuan, kalhlên kûtna tûr chu sal chhuakho zawng zawng tân leh an unau puithiamte leh anmahni tân an talh a.

²¹Tin, Israela thlah, sal ata lo chhuak lehte leh LALPA, Israel-te Pathian zawng tûra chu rama Pathian thu awih lo bawlhhlawhna ata inthiarfihlîma, anniho zâwm zawng zawng tate chuan an ei a,

²²chhang dawidim telh loh kût chu lâwm takin ni sarih an hmang a: LALPA chuan anni chu a tihlim a, Pathian, Israel-te Pathian in saknaa an kutte tihchaksak tûrin Assuria lal rilru chu an lamah a thlêktîr a ni.