Read Mizo_Old_version Ezra 7 Bible Online

Ezra 7 - Mizo_Old_version bible

Ezra 7

¹Tin, chûng thil hnuah chuan Persia lal Artazerzia lal laiin Ezra chu Babulon aṭangin a chho va; chu mi chu Seraia fa a ni a, chu mi chu Azaria fa a ni a, chu mi chu Hilkia fa a ni a,

²chu mi chu Saluma fa a ni a, chu mi chu Zadoka fa a ni a, chu mi chu Ahituba fa a ni a,

³chu mi chu Amaria fa a ni a, chu mi chu Azaria fa a ni a, chu mi chu Meraiotha fa a ni a,

⁴chu mi chu Zerahia fa a ni a, chu mi chu Uzia fa a ni a, chu mi chu Bukia fa a ni a,

⁵chu mi chu Abisua fa a ni a, chu mi chu Phinehasa fa a ni a, chu mi chu Eleazara fa a ni a, chu mi chu puithiam lal Arona fa a ni.

⁶Ezra chu lehkhaziaktu, LALPA, Israel-te Pathian pêk Mosia dân thiam tak a ni a. LALPA a Pathianin a duhsakna avângin lal chuan a dîl zawng zawng chu a pe zêl a.

⁷Tin, Lal Artazerzia kum sarih a lal kum chuan Israela thlah ṭhenkhat te, puithiam ṭhenkhat te, Levi chi ṭhenkhat te chu Jerusalem-ah an chho va.

⁸Tin, lal chu kum sarih a lal kum, thla nganaah ani chu Jerusalem-ah a kal a.

⁹Thla khatna, ni khat niah Babulon aṭangin a chhuak a, a Pathianin amah chu vêng zêlin thla ngana, ni khat niah Jerusalem a thleng a ni.

¹⁰Ezra chuan LALPA dân chu hriaa zâwm tûr leh Israel-hote chu thuruatte leh rorêlte zirtîr tûrin a thinlung a siam tlat a.

¹¹Tin, hei hi Lal Artazerzian puithiam Ezra, lehkhaziaktu, LALPA thupêk thu leh Israel mite tâna a thuruatte zirtu hnêna a lehkhathawn thu chu a ni:

¹²Lalte lal Artazerzian puithiam Ezra, vân Pathian dân ziaktu chibai ka bûk e.

¹³Ka ram chhûnga Israel mi zawng zawng leh an puithiamte leh Levi chite, Jerusalem-a mahni duh thua kal châkna nei apiangte chu, i hnêna kal tûrin thu ka pe e.

¹⁴I kawl Pathian dân ang zêla Judai ram leh Jerusalem chanchin ngai chiang tûr leh,

¹⁵Jerusalem-a awm Israel-te Pathian mahni duh thua lal leh a rorêltuten an pêk, tangkarua leh rangkachak keng tûra lal leh a rorêltu pasarihin an tirh che i ni a,

¹⁶Babulon ram zawng zawnga i hmuh zât apiang tangkarua leh rangkachak, mahni duh thua mipuite leh puithiamten an pêk, Jerusalem-a an Pathian in atâna lâwm taka an pêkte nên;

¹⁷chutichuan, hêng tangka hian bâwngpa te, berâmpa te, berâmno te, ei tûr leh in tûr thilhlan tûr nên i lei nghâl ang a; tin, Jerusalem-a in Pathian ina maichâmah chuan i hlân dâwn nia.

¹⁸Tin, tangkarua leh rangkachak hman bângte chu in Pathian remtih zâwng âwmin nang leh i unauten ṭha in tih ang angin ti ang che u.

¹⁹Tin, i Pathian in rawngbâwl nâna bungbêl an pêk che chu Jerusalem-a Pathian hnênah chuan hlân ang che.

²⁰Tin, i Pathian in tâna mamawh danga hman ṭûlna a awm phawt chuan lal sum ina mi hmang ang che.

²¹Kei, lal Artazerzia ngeiin lui râla sum enkawltu zawng zawngte chu - Puithiam Ezra, vân Pathian dân ziaktuin a dîl apiang che u chu,

²²tangkarua chu talent za, buh chu bûk za, uain chu bath za, hriak chu bath za, chi chu eng zât tih pawh awm chuang lovin pe nghâl ang che u, tiin thu ka pe e.

²³Vân Pathianin thu a pêk apiang chu, chutiang chiahin vân Pathian in atân tih ni rawh se; thinurna chu lal leh a fate ram chungah hian engah tehlul nge a awm ang ni?

²⁴Tin, puithiamte, Levi chite, hla satute, kawngkhâr vêngtute, Nethin-hote, he Pathian ina rawngbâwltute hi chhiah te, thil neih man te, lei man te chu chawitîr loh tûr a nih kan hriattîr bawk a che.

²⁵Tin, nang Ezra, i kawl Pathianin finna a pêk che angin lui râla awmho zawng zawngte ro an rêlsak theih nân hotute leh rorêltute, i Pathian dân hre mite ruat la, hre lote chu zirtîr ang che u.

²⁶Tin, tu pawh i Pathian dân leh lal dân zâwm lo apiang chu thi khawpin emaw, ram ata hnawh chhuahin emaw, an bungrua lâksakin emaw, tân ina tântîrin emaw an chungah rorêlna a awm nghâl tûr a ni, a ti a.

²⁷Jerusalem-a LALPA in timawi tûra lal chu hetiang rilru puttîrtu leh, lal leh a rorêltu hma leh lal mi lian lâr tak takho hmaa ka chunga khawngaihna zâmtîrtu LALPA, kan pi leh pute Pathian chu fakin awm rawh se. Tin, LALPA ka Pathianin mi khawngaih a, mi tichak a; tichuan, ka hnêna han kal ve tûrin Israel zînga mi hotu deuh deuhte ka thlang khâwm ta a.