Read Mizo_Old_version Ezra 8 Bible Online

Ezra 8 - Mizo_Old_version bible

Ezra 8

¹Hêngte hi Lal Artazerzia lal laia Babulon ram ata ka hnêna kal chhoho, chhûngkaw puipa leh an thlahte hming chu a ni:

²Phinehasa thlahte zîngah Gersoma; Ithamara thlahte zîngah Daniela; Davida thlahte zîngah Hatusa;

³Sekania thlahte, Parosa thlahte zîngah Zekaria, mipa za leh sawmnga nên;

⁴Pahath-moaba thlahte zîngah Zerahia fa Eliehoenaia, mipa zahnih nên;

⁵Sekania thlahte zîngah Jahaziela fa, mipa zathum nên;

⁶Adina thlahte zîngah Jonathana fa Ebeda, mipa sawmnga nên;

⁷Elama thlahte zîngah Athalia fa Jesaia, mipa sawmsarih nên;

⁸Sephatia thlahte zîngah Mikaela fa Zebadia, mipa sawmriat nên;

⁹Joaba thlahte zîngah Jehiela fa Obadia, mipa zahnih leh sâwm leh pariat nên;

¹⁰Selomitha thlahte zîngah Josiphia fa, mipa za leh sawmruk nên;

¹¹tin, Bebaia thlahte zîngah Bebaia fa Zekaria, mipa sawmhnih leh pariat nên;

¹²tin, Azgada thlahte zîngah Hakatana fa Johanana, mipa za leh sâwm nên;

¹³Adonikama thlahte zîngah (a hnuhnûng ber an ni a) an hming chu hêng hi a ni - Elipheleta te, Jeuela te, Semaia te, mipa sawmruk nên;

¹⁴Bigvaia thlahte zînga Uthaia leh Zabuda, mipa sawmsarih nên.

¹⁵Ahava lama luang lui kamah chuan ka awm khâwmtîr a; chutah chuan ni thum kan awm a. Tin, mipuite leh puithiamte chu ka han en vêl a, Levia thlahte rêng rêng ka hmu ve ta lo va.

¹⁶Chutichuan, puipa deuh deuh, Eliezera te, Ariela te, Semaia te, Elnathana te, Jariba te, Elnathana te, Nathana te, Zekaria te, Mesulama te ka chah a; zirtîrtu Joiariba leh Elnathana-te pawh.

¹⁷Tin, Kasiphia hmuna hotu Idova hnênah ka tîr a, kan Pathian ina rawngbâwltu tûr rawn hruai tûrin Kasiphia hmuna Idova leh a unaute Nethin-ho hnêna an han sawi tûr ka hrilh a.

¹⁸Tin, Pathian min khawngaihna avângin Issekela, Mahlia thlahte zîngah; Israela fapa, chu mi fapa Levia; Serebia, a fate leh a unau sâwm leh pariatte nên;

¹⁹Hasabia, Meraria thlahte zîngah Jesaia, a unaute leh an fate sawmhnih nên;

²⁰Nethin-ho, Davida leh an mi lianten Levi chite rawngbâwl tûra an pêkte zînga mi Nethin-ho zahnih leh sawmhnihte nên min hruaisak a. An zaa hming ziak ṭheuh a ni.

²¹Chutichuan, kan Pathian hmaa kan intihtlâwma, a hnêna keini leh kan fate leh kan bungrua zawng zawngte nêna tluang taka kal theihna dîl tûrin, Ahava luiah chuan chaw nghei thu ka puang a.

²²“Kan Pathian duhsakna chu amah zawngtute zawng zawng chungah an ṭhatna tûrin a awm zêl a; a thiltihtheihna leh a thinurna erawh chu amah hawisante chungah a awm zêl ṭhîn,” tia lal hnêna kan lo sawi tawh avângin, kalkawnga kan hmêlmate laka min ṭanpui tûra sipai leh sakawr chung chuang mite lal dîl chu zahthlâk ka ti si a.

²³Chutichuan, chaw kan nghei a, chumi chu kan Pathian kan dîl chiam a; kan dîlna chu min ngaihthlâksak a.

²⁴Chutichuan, puithiam tûpa deuh deuhte zînga mi sâwm leh pahnih, Serebia leh Hasabia leh an unaute zînga mi sâwm ka tihrang a;

²⁵tin, lal leh a rorêltute leh a mi liante leh chuta awm Israel-te zawng zawngin kan Pathian in atân an thilhlan, tangkarua te, rangkachak te, bungbêlte chu ka bûk a, ka hlân a;

²⁶ka bûka an kuta ka hlan chu tangkaraw talent zaruk leh sawmnga; tangkaraw bungbêl talent za; rangkachak talent za;

²⁷rangkachak berhbu sawmhnih, darik sângkhat ṭheuh; dâr tle mi mawi tak, rangkachak ang maia hlu bungbêl pahnih a ni a.

²⁸Tin, an hnênah, “LALPA tâna tihthianghlim in ni a, bungbêlte pawh tihthianghlim a ni; tangkarua leh rangkachakte hi LALPA, in pi leh pute Pathian tâna mahni duh thua hlan vek a ni.

²⁹Puithiam tûpa deuh deuhte leh Levi chite leh Israel mite chhûngkaw puipa hmaa Jerusalem-a LALPA ina pindana in bûk hma loh chuan vêng ula, kawl rawh u,” ka ti a.

³⁰Chutichuan, puithiamte leh Levi chite chuan Jerusalem-a kan Pathian ina ken tûrin, tangkarua leh rangkachak leh bungbêl bûkte chu an la ta a.

³¹Chutichuan, Jerusalem-a kal tûrin thla khatna, ni sâwm leh ni hnih niah Ahava lui aṭang chuan kan chhuak ta a; tin, kan Pathianin min khawngaih a, hmêlma lak ata leh kawnglaka châng rutute lak ata chu min humhim zêl a.

³²Tin, Jerusalem chu kan han thleng a, chutah chuan ni thum kan hahchâwl a.

³³Tin, a ni li ni chuan tangkarua te, rangkachak te, bungbêlte chu kan Pathian inah bûkin puithiam Uria fapa Meremotha kutah kan hlân a; tin, a hnênah chuan Phinehasa fapa Eleazara a awm a; tin, an hnênah chuan Levi chi Jesua fapa, Jozabada leh Binuia fapa Noadia te an awm a;

³⁴chhiar vek leh bûk vek a ni a. A bûk zât chu chumi lai la la chuan an ziak vek a.

³⁵Sal chhuakhote chuan Israel-te Pathian hnênah hâlral thilhlan an hlân a, Israel zawng zawng pualah bâwngpa sâwm leh pahnih, berâmpa sawmkua leh paruk, berâmno sawmsarih leh pasarih; sual thawi nân kêlpa sâwm leh pahnih. Hêng zawng zawng hi LALPA hnêna hâlral thilhlan vek a ni.

³⁶Tin, lal thuruatte chu lal upate leh lui râl ram awptute chu an hrilh a; tin, anni chuan mipuite chu ṭanpuiin Pathian in sak chu an chhunzawmpui ta a.