Read Mizo_Old_version Ezra 9 Bible Online

Ezra 9 - Mizo_Old_version bible

Ezra 9

¹Tin, chûng thiltih zawh chuan mi liante chuan, “Israel mite leh puithiamte leh Levi chite chu he ram mite lakah hian inthiarfihlîm chuang lovin, Kanaan-ho te, Hit-ho te, Periz-ho te, Jebus-ho te, Amon-ho te, Moab-ho te, Aigupta-ho te, Amor-hote thiltih tenawm tak an tih ang zêl an ti ve a.

²An fanute chu anmahni leh an fapaten an nei ta mai a; chutichuan, chi thianghlim chu he ram mite nên hian an chawhpawlh a. A ni, mi liante leh rorêltute chu he bawhchhiatna thu-ah hian a tûpa berte an ni,” tiin mi rawn hrilh a.

³Tin, chu thil chu ka hriat chuan ka kawr leh ka puan ka pawt thlêr a, ka sam leh ka khabe hmul ka pawt thla a, a ngaihna hre lovin ka ṭhu ta ngawih ngawih mai a.

⁴Chutichuan, sal chhuakho bawhchhiatna avânga Israel-te Pathian thua khûr apiangte chu ka hnênah an lo kal khâwm a; tlai lam inthawi hun thlengin a ngaihna hre lovin ka ṭhu ta ngawih ngawih a.

⁵Tin, tlai lam inthawi hun chuan ka lungngaihna ata ka kawr leh ka puan thlêr chung chuan ka tho va; tin, ka ṭhingṭhi a, LALPA ka Pathian lamah ka bân ka phar a.

⁶Tin, “Aw ka Pathian, i lam lo hawi hi ka zak a, ka hmai te a sen ṭâwn ṭâwn a ni, ka Pathian; kan bawhchhiatnate chu min chîm pil khawpin a pung a, kan thiam lohna chuan vân a tawng a.

⁷Kan pi leh pute chenin tûn thleng hian kan thiam lo let dêr a ni; kan bawhchhiatna avângin kan lalte, kan puithiamte nên ram dang lal man te, khandaiha thah te, sala tân te, rawk te, mualphonate kan tâwk a, vawiina kan awm ang hian.

⁸Tin, tûnah hian kan Pathian chuan kan mitte a tihvâra, sala kan awm min tihharha, a hmun thianghlimah chuan min awm ngheh tlattîrna tûrin a la awm chhunte chu min chhuahtîrin, LALPA kan Pathian khawngaihna kan dawng rih mai a ni a.

⁹Chhiah khua zawng kan ni ngei mai a; nimahsela, kan Pathian chuan chhiah khua kan nih chhûng pawhin min thlahthlam chuang lo va, min tiharh tûr leh kan Pathian in din tûr leh, Judai ram leh Jerusalem-a kulh nei tûrin, Persia lalte mit hmuhah chuan kan chungah khawngaihna a zâm zautîr ta zâwk a.

¹⁰Aw kan Pathian, tûnah hian eng nge kan sawi tâk ang? I thupêkte chu kan hawisan ta si a.

¹¹I chhiahhlawh zâwlneite hmanga, ‘In va kalna tûr, in ram luah tûr chu a rama mi awmte bawlhhlawhna avângin a bawlhhlawh a, kil tin kil tang an tenawmnain a titenawm vek a ni.

¹²Chuvângin, in fanute chu an fapate neihtîr suh ula, an fanute chu in fapate neihtîr hek suh ula, an thawvenna leh an hmuingîlna rêng rêng zawnsak hek suh ula, in lo chaka, chumi rama thil ṭha chu in eia, kumkhuaa in fate in inrochun theih nân,’ tia thu i pêkte chu.

¹³Tin, kan thil tihsual avâng leh kan thiam lohna nasa tak avânga kan chunga hetiang thil a lo awma, nang kan Pathianin kan bawhchhiatnain a phu aia nêpa min hrem hnua la awm cheute min la nei tih hre reng chung siin,

¹⁴i thupêkte chu kan bawhchhe lehin, hêng thil tenawm titute nên hian kan la inneih pawlh cheu dâwn em ni? A bâk rêng awm lo leh pumpelh rêng pawh awm lova min tiboral khawpin kan chungah i thinur hial dâwn lâwm ni?

¹⁵Aw LALPA, Israel-te Pathian, nang chu i fel a, vawiinah hian tlêm zawng min la zuah hi. Ngai teh, thiam lovin i hmaah kan awm a, hemi avâng hian tu mah i hmaa ding thei rêng rêng kan awm lo a ni,” ka ti a.