Read Mizo_Old_version Nehemia 13 Bible Online

Nehemia 13 - Mizo_Old_version bible

Nehemia 13

¹Chumi ni chuan mipui beng hriatah Mosia lehkhabu an han chhiar a; tin, chumiah chuan Amon mite leh Moab mite chu, Pathian mite inkhâwmnaah chuan eng tikah mah an tel ve hauh lo tûr a ni tih a chuang a;

²Israela thlahte chhang leh tuia hmuak lova, anmahni ânchhe lawh tûra Balaama an rawih avâng khân. Nimahsela, kan Pathianin ânchhia chu malsâwmnaah a chantîr ta zâwk a.

³Tin, heti hi a ni a, dân chu an han ngaihthlâk zawh chuan Israel mite zîng ata a chawhpawlhtu hnam dang mite chu an tihrang ta a.

⁴Chumi hma chuan kan Pathian in pindantea hotu atâna ruat, puithiam Eliasiba, Tobia lamhnai chuan

⁵tûn hma lama Levi-hote, hla satute, kawngkhâr vêngtute chanvo, chhangphut thilhlan te, rimtui te, bungbêl te, buh sâwma pakhat te, uain leh hriak leh puithiamte tâna thên thilhlante an dah ṭhinna pindan zau tak Tobia a buatsaihsak a.

⁶Nimahsela, chûng thil zawng zawng awm laite chuan Jerusalem khuaah ka awm lo va; Babulon lal Artazerzia kum sawmthum leh kum hnih a lal kumin lal hnênah ka kal a, ni eng emaw zât hnuah phalna ka dîl leh a;

⁷tin, Jerusalem khuaah ka va kal a, Pathian in hung chhûng kawtlaitea pindan buatsaihsaka, Tobia tâna Eliasiban thil ṭha lo a tih chu ka han hre ta a.

⁸Mi tilungni lo êm êm mai a; chuvângin, Tobia in chhûng bungrua zawng zawng chu chumi pindan ata chu ka theh chhuak vek a.

⁹Tin, thu ka pe a, pindante chu an thian fai a; tichuan, Pathian in bungbêlte chu chhangphut thilhlan te leh rimtui te nên ka la lût leh a.

¹⁰Tin, Levi-hote leh hla satute chu an chan ai pêk an nih loh avângin mahni lo lam ṭheuhvah an tlân darh vek a ni tih ka hre leh ta bawk a.

¹¹Tichuan, rorêltute ka khak a, “Engati nge Pathian in chu thlahthlam a nih reng mai le?” ka ti a. Tin, anni chu ka ko khâwm vek a, an hmun ṭheuhvah ka awmtîr leh a.

¹²Chutichuan, Juda mi zawng zawng chuan buh sâwma pakhat te, uain te, hriak te chu thawhlâwm dah khâwmnaahte chuan an rawn la a.

¹³Tin, puithiam Selemia leh lehkhaziaktu Zadoka leh Levi-ho zînga mi Pedaia-te chu thawhlâwm dah khâwmnate hotu atân ka siam a; anmahni puibâwmtuah chuan Matania fa Zakura fapa Hanana a awm a; rinawma ngaih an ni a, an hnathawh chu an unaute hnêna thil sem vêl a ni.

¹⁴Aw ka Pathian, hemi thu-ah hian min hre reng la, ka Pathian in leh a rawngbâwlna atâna ka thiltih ṭhatte chu thai bo lul suh ang che.

¹⁵Chûng lai chuan Judai ramah Chawlhnia uain sâwr khurtea rap sâwr te, buhphal rawn phur te, uain te, grêp te, theipui te leh phurrit tinrêng phurhtîr tûra sabengtung siam laite ka hmu a; chûng chu Chawlhniah Jerusalem-ah an rawn phur lût a; ei tûr zawrh nite chuan a dik lohzia ka hriattîr a.

¹⁶Tura rama mi chuta chêng vete pawhin sangha leh bungraw tinrêng an rawn la a, Chawlhniah Juda mite hnênah Jerusalem-ah an zuar a.

¹⁷Chutichuan, Juda mi liante chu ka khak a, an hnênah, “Chawlhni tibawrhbânga in thil ṭha lo tih hi engtizia nge ni?

¹⁸In pi leh pute pawh khân hetiang hi an ti a ni lâwm ni? Tin, kan Pathian chuan hêng thil ṭha lo zawng zawng hi kan chungah leh he khaw chungah hian a rawn thlentîr ta a ni lâwm ni? Chuti chung pawhin Chawlhni tibawrhbângin Israel mite chunga thinurna in la thlen belhtîr cheu mai ka ti,” ka ti a.

¹⁹Tin, heti hi a ni a, Chawlhni dâwna Jerusalem kulh kawngkhâr a thim deuh veleh kawngkhârte khâr tûrin thu ka pe a; tin, Chawlhni a ral hma loh chuan hawn loh tûrin thu ka pe bawk a. Chawlhnia thil phurh rêng rêng an lâk luh loh nân ka tlangvâl ṭhenkhat chu kawngkhâr ka vêntîr a.

²⁰Chutichuan, sumdâwng mite leh bungraw tinrêng zuar mite chu vawi khat emaw, vawi hnih emaw chu Jerusalem pâwn lamah an riak a.

²¹Chutichuan, a dik lohzia ka hriattîr a, an hnênah, “Engati nge kulh bulah in riah? Hetianga in tih leh chuan in chungah ka kut ka thlâk ang,” ka ti a. Chuta chin chu Chawlhni chuan an lo kal leh ta lo va.

²²Tin, Levi-hote chu inthian faia, Chawlhni tihthianghlimna tûra kulh kawngkhâr rawn vêng tûrin thu ka pe a. Aw ka Pathian, hemi thu-ah pawh hian min hre reng la, i khawngaihna nasa tak avângin min zuah ang che.

²³Chûng lai chuan Juda mi, Asdod hmeichhia te, Amon hmeichhia te, Moab hmeichhiate nupuia neite chu ka hmu a.

²⁴An fate zînga a zâtve chu Asdod ṭawngin an ṭawng a, chûngho ṭawng dân ang ang chauh lo chuan Juda ṭawngin an ṭawng thei lo va.

²⁵Tichuan, anni chu ka ko khawm a, ânchhia ka lawh a, ṭhenkhat chu ka vua a, an sam te ka pawh thlâksak a, an fanute chu chûngho fapate neihtîr lo tûr leh chûngho fanute chu an fapate tân emaw, anmahni tân emaw nei lo tûrin Pathian chhâlin chhia ka chhamtîr a.

²⁶“Israel lal Solomona pawh kha hetiang thilahte hian a sual a ni lâwm ni? Chuti chung pawhin hnam tam tak zingah chuan amah ang lal an awm lo va, a Pathian mi duh tak a ni a, Pathianin Israel ram zawng zawng chunga lalah a siam bawk a; nimahsela, ani meuh pawh chu ram dang hmeichhiain a tisual ta mai a ni a.

²⁷Chutichuan, ram dang hmeichhiate neia kan Pathian chunga thil ṭha lo tak mai hi ti tûrin in thu kan zâwm dâwn em ni?” ka ti a.

²⁸Tin, puithiam lal Eliasiba fa, Joiada fapa pakhat chu Horon mi Sanbalata mâkpa a ni a; chuvângin, ka hnên aṭangin ka tlân botîr ta a.

²⁹Aw ka Pathian, puithiamna hna leh puithiamna hna thuthlung leh Levi-ho thuthlung an tihbawlhhlawh avângin hre reng hlawm ang che.

³⁰Chutiang chuan ram dang mite lakah ka tithianghlim a, puithiamte, Levi-hote tân an hnathawhna ṭheuhva an rawngbâwl dân tûr ka ruatsak a;

³¹a hun ruat ṭheuhva thing hlan atân leh thlai thar hmasa ber atânte nên. Aw ka Pathian, a ṭha lamin min hre reng ang che.