Read Mizo_Old_version Nehemia 2 Bible Online

Nehemia 2 - Mizo_Old_version bible

Nehemia 2

¹Tin, heti hi a ni a, Lal Artazerzia kum sawmhnih a lal kum, Nisan thlaah uain an rawn hlui hnuin uain chu ka la a, lal chu ka pe a. Tûn hma lam chuan a hmaah lungngai hmêl ka pu ngai lo va.

²Tin, lal chuan ka hnênah, “I damlo pawh a ni si lo va, engtizia nge lungngai hmêl i put chu le? Thil dang a ni lo vang, i rilru lam a lungngai a nih hi maw,” mi ti a. Chutichuan, ka hlau ta êm êm mai a.

³Tin, kei chuan lal hnênah, “Lal chu kumkhuain dam reng rawh se! Mi thlahtute thlân awmna khua chu a ramin a kawngkhârte chu a kâng vek si a, lungngai hmêl pu lo thei em ka nih ang?” ka ti a.

⁴Chutichuan, lal chuan ka hnênah, “Eng nge ni i dîl?” a ti a. Chutichuan, vân Pathian hnênah ka ṭawngṭai ta a.

⁵Tin, lal hnênah chuan, “Lal remtih zâwng a niha, i chhiahhlawh hian i mit ka lo tlun ṭhin chuan, Judai ramah mi thlahtute thlân awmna khuaah mi kaltîr la, khua chu ka va din leh ang e,” ka ti a.

⁶Tin, lal chuan ka hnênah (lalnu pawh a kiangah chuan a ṭhu a), “Eng chen nge i thang ang a, eng tikah nge i lo haw leh ang?” a ti a. Chutichuan, lal chuan lâwm takin mi kaltîr ta a; tin, keiin hunbi ka tiam a.

⁷Chu chauh chu ni lovin lal hnênah chuan, “Lal remtih zâwng a nih chuan, lui râla rorêltute hmuh atân Judai ram ka thlen thlenga mi kaltîr zêl phalna tûrin lehkhate mi pe la;

⁸tin, lal ngaw hâk vêngtu Asapha hmuh tûrin in vênna kulhbîng kawngkhâr rel atân te, khawpui kulh atân te, ka va luah tûr in atân te thing mi pêk theihna tûrin lehkha mi pe bawk rawh,” ka ti a. Tin, ka Pathianin mi duhsak avângin lal hnêna ka dîl ang zêlin mi pe a.

⁹Chutichuan, lui râla rorêltute hnên chu ka han thleng a, lal lehkhate chu ka han pe a. Tin, lal chuan ka hnênah sipai hotute leh sipai sakawr chung chuang mite a kaltîr ve a ni.

¹⁰Tin, Horon mi Sanbalata leh Amon mi, chhiahhlawh Tobia-ten an lo hriat chuan, Israela thlahte thawvenna ngaihtuah tûrin mi an lo kal zu nia, tiin an lo lungni lo hle mai a.

¹¹Chutichuan, Jerusalem ka han thleng a, ni thum ka han awm phawt a.

¹²Tin, zânah chuan ka tho va, kei leh mi dang tlêm tête nên; Jerusalem tâna ka tih tûr ka Pathianin ka rilrua a dah chu tu mah ka hrilh lo va, ka chuanna sa ngawt lo chu sa dang kan keng lo va.

¹³Tin, zânah chuan Ruam Kawngkaah ka chhuak a, Dragon Tuichhunchhuah lam leh Bawlhhlawh Kawngka lamah ka kal a, Jerusalem kulh chim leh a kawngkhâr kângte chu ka en vêl a.

¹⁴Tin, Tuichhunchhuah Kawngka leh Lal Dîl thlengin ka kal zêl a; nimahsela, ka chuanna sa kal tlang theihna rêng rêng a awm lo va.

¹⁵Chutichuan, zânah lui ka zawh chho va, kulh chu ka en a; tin, ka lêt leh a, Ruam Kawngkaah chuan ka lût a, chutiang chuan ka haw leh ta a.

¹⁶Rorêltute chuan khawiah nge ka kala, eng nge ka tih pawh an hre lo; tin, Juda-te, puithiamte, mi ṭhate, rorêltute leh mi dang hnathawktu tûr rêng rêng pawh ka la hrilh rih lo bawk a.

¹⁷Chutichuan, an hnênah, “Kan chan a chhiatzia hi in hmu a, Jerusalem a ram tih te, a kawngkhârte a kâng tih te pawh in hria a; hawh u, sawichhiat kan nih tawh loh nân Jerusalem kulh chu i din leh ang u,” ka ti a.

¹⁸Tin, ka Pathian mi duhsak thu te ka hrilh a, ka hnêna lal thusawite pawh. Tin, anni chuan, “I tho vang u khai; i din teh tak ang u,” an ti a. Chutichuan, chu hna ṭha thawk tûr chuan an kut an tichak a.

¹⁹Amaherawhchu, Horon mi Sanbalata leh Amon mi, chhiahhlawh Tobia leh Arab mi Geseman an hriat chuan, min nuihzatbûr a, min hmusit a, “In thiltih hi engtizia nge ni? Lal chungah in hel elo ni?” te min ti a.

²⁰Chutichuan, anni chu ka chhâng a, an hnênah, “Vân Pathian chuan mi tihmuingîl ang a; chutichuan, keini a chhiahhlawhte chu kan tho vang a, kan din ang a; nangni erawh chuan Jerusalem-ah hian chanvo emaw, thuneihna emaw, hnuhma emaw in nei lo rêng rêng,” ka ti a.