Read Mizo_Old_version Nehemia 3 Bible Online

Nehemia 3 - Mizo_Old_version bible

Nehemia 3

¹Chutichuan, puithiam lal Eliasiba chu a unau puithiamte nên chuan an tho va, Berâm Kawngka chu an siam a; an tithianghlim a, a kawngkhârte an siam a; Hamea in sâng thlengin an tithianghlim a, Hananela in sâng thleng chuan.

²Tin, a dawt chu Jeriko miten an siam a. Tin, anmahni dawt chu Imria fapa Zakuran a siam a.

³Tin, Sangha Kawngka chu Hasena fapaten an siam a; a relte an dah a, a kawngkhârte an rel a, a kalhnate leh a bahnate an rem a.

⁴Tin, anni dawt chu Hakoza fa Uria fapa Meremothan a siam ṭha a. Tin, anni dawt chu Mesezabela fa Berekia fapa Mesulaman a siam ṭha a. Tin, anni dawt chu Baana fapa Zadokan a siam ṭha a.

⁵Tin, anni dawt Teko-hovin an siam ṭha a; nimahsela, an mi liante chuan an hotu hnaah chuan an ring an rawlh ve duh lo.

⁶Tin, Kawngka Hlui chu Pasea fapa Joiada leh Besodeia fapa Mesulaman an siam ṭha a, a relte an dah a, a kawngkhârte an rel a, a kalhnate leh a bahnate an rem a.

⁷Tin, anni dawt chu Gibeon mi Melatia leh Meronoth mi Jadonan lui râl ram awptu thuhnuaia awm Gibeon mi leh Mizpa mite nên an siam ṭha a.

⁸A dawt chu rangkachak chhertu zînga mi Harhaia fapa Uzielan a siam ṭha a. Tin, a dawt lehah chuan rimtui siamtu zînga mi Hananian a siam ṭha a, Kulh Chhah thlengin Jerusalem chu an siam ṭha a.

⁹Tin, anni dawt chu Jerusalem bial chanve hotu Hura fapa Rephaian a siam ṭha a.

¹⁰Tin, anni dawt chu Harumapha fapa Jedaian a in zâwn a siam ṭha a. Tin, a dawt chu Hasabneia fapa Hatusan a siam ṭha a.

¹¹Harima fapa Malkija leh Pahath-moaba fapa Hasuba-te chuan hmun dang leh Meipui Chhehna In sâng an siam ṭha a.

¹²Tin, a dawt chu Jerusalem bial chanve hotu Hallohesa fapa Saluman a fanute nên an siam ṭha a.

¹³Ruam Kawngka chu Hanuna leh Zanoa-hoten an siam ṭha a; an siam a, a kawngkhârte an rel a, a kalhnate leh a bahnate an rem a; tin, Bawlhhlawh Kawngka thlengin kulh tawng sângkhat an siam bawk a.

¹⁴Bawlhhlawh Kawngka erawh chu Beth-hakkerem bial hotu Rekaba fapa Malkijan a siam ṭha a; a siam a, kawngkhârte a rel a, a kalhnate leh a bahnate a rem a.

¹⁵Tin, Mizpa bial hotu Kol-hozea fapa Sallunan Tuikhur Kawngka chu a siam ṭha a; a siam a, a khuh a, a kawngkhârte a rel a, a kalhnate leh a bahnate a rem a; tin, Lal Huan kianga Sela Dîl hungna chu Davida khua aṭanga chhuk thla kailâwn thlengin a siam ṭha bawk a.

¹⁶Tin, a dawt chu Azbuka, Beth-zur bial chanve hotu fapa Nehemia chuan Davida thlân zâwn leh dîl khuah leh mi huaisente in thlengin a siam ṭha a.

¹⁷A dawt chu Levi-hovin an siam ṭha a, Bania fapa, Rehuma te hovin. A dawt chu Keila bial chanve hotu Hasabia chuan ama bial hmingin a siam ṭha a.

¹⁸A dawt chu an unauten an siam ṭha a, Keila bial chanve hotu Henadada fapa Bavaia-tehovin.

¹⁹Tin, a dawt chu Mizpa hotu Jesua fapa Ezera chuan hmun dang, kulh kawi ṭannaa râlthuam dahna pan chhohna zâwn a siam ṭha a.

²⁰A dawt chu Zabaia fapa Baruka chuan ṭhahnemngai takin hmun dang, kulh kawi ṭanna aṭanga puithiam lal Eliasiba in kawngkhâr thlengin a siam ṭha a.

²¹A dawt chu Hakoza fa, Uria fapa Meremothan hmun dang, Eliasiba in kawngkhâr aṭanga Eliasiba in tâwp thlengin a siam ṭha a.

²²Tin, a dawt chu a chhehvêla puithiamhovin an siam ṭha a.

²³Anni dawt chu Benjamina leh Hasuban an in zâwn chu an siam ṭha a. An dawt chu Anania fa Maaseia fapa Azarian a in kiang a siam ṭha a.

²⁴A dawt chu Henadada fapa Binuian hmun dang, Azaria in aṭanga kulh kawi ṭanna, a kil thlengin a siam ṭha a.

²⁵Uzaia fapa Palala chuan kulh kawi ṭanna zâwn leh tân in kianga lal in chungnung zâwk aṭanga lawr in sâng zâwn a siam ṭha a. A dawt chu Parosa fapa Pedaian a siam ṭha a.

²⁶(Nethin-ho chu chhak lampanga Tui Kawngkhâr zâwn thleng leh in sâng lawr thlengin Ophel-ah an awm a.)

²⁷A dawt chu Teko-hovin hmun dang, in sâng lian pui lawr zâwn leh Ophel kulh thlengin an siam ṭha a.

²⁸Sakawr Kawngka chung lam chu puithiamhoten mahni in zâwn ṭheuh an siam ṭha a.

²⁹Anni dawt chu Imera fapa Zadokan a in zâwn a siam ṭha a. Tin, a dawt chu chhak lam kawngkhâr vêngtu Sekania fapa Semaian a siam ṭha a.

³⁰A dawt chu Selemia fapa Hanania leh Zalapha fapa parukna Hanuna-te chuan hmun dang an siam ṭha a. A dawt chu Berekia fapa Mesulaman a awmna zâwn a siam ṭha a.

³¹A dawt chu rangkachak chhertu zînga mi Malkija chuan Hamipkad Kawngkhâr zâwn Nethin-ho in leh sumdâwngho in thleng leh a kil pan chhohna thlengin a siam ṭha a.

³²Tin, a kil pan chhohna leh a Berâm Kawngka inkâr chu rangkachak chhertu leh sumdâwnghoten an siam ṭha a.