Read Mizo_Old_version Nehemia 4 Bible Online

Nehemia 4 - Mizo_Old_version bible

Nehemia 4

¹Nimahsela, heti hi a ni a, Sanbalatan kulh kan siam tih a han hriat chuan a thinur a, nasa takin a thin a tirim a, Juda-te a chêksawlh ta a.

²Tichuan, a unaute leh Samari sipaite hmaah chuan thu a sawi a, “Hêng Juda mi chhiaṭhahote hian eng nge maw an tih le? Khawpui sak ṭhat an tum em ni vei le? An inthawi tehlul ang maw? Ni khat thil thu-ah an puitlin tehlul ang maw? Bawlhhlawh awm khâwm mai mai ata lung kâng chhe tawh si an din thar leh ang maw?” a ti a.

³Tin, a kianga Amon mi Tobia chuan, “Han din teh rêng se; sihal pawh han lâwn sela an lung kulh chu a tichim mai ang chu,” a ti a.

⁴Aw kan Pathian, ngai teh, hmuhsitin kan awm hi; an mi sawichhiatna chu anmahni lu chungah lêttîr la, anni pawh khawii ramah emaw mualpho takin tântîr reng ang che!

⁵An bawhchhiatna chu khuh suh la, an sualnate chu i hma ata thai bovin awmtîr suh ang che; kulh siamtute hmaah an tihthinur che hi.

⁶Chutichuan, kulh chu kan siam a; a sân lam chanvein kulh zawng zawng chu kan zawm chhuak vek a; mipuite chuan thawh châkna rilru an pu hle mai a ni.

⁷Amaherawhchu, heti hi a ni a, Sanbalata te, Tobia te, Arab mite, Amon mite leh Asdod miten Jerusalem kulh chu siam ṭhat a ni zêl tih leh, a chhe laite kan thawm ṭan tih an hriat chuan an thinur ta hle mai a;

⁸tichuan, Jerusalem chu rawn beiha buaina rawn siam an phiar tlâng ta a.

⁹Nimahsela, anmahni avângin kan Pathian hnênah kan ṭawngṭai a, chhûn leh zânah an laka vêngtu kan dah reng a.

¹⁰Tin, Juda chuan, “Thawktute tha a chau zo tawh a, bawlhhlawh lah a nasa si a; kulh chu ka siam thei dâwn ta lo a nih hi,” a ti a.

¹¹Tin, kan hmêlmate lah chuan, “An zînga kan han kala, kan han thaha, hna chu kan han tihtâwpsak hma chuan an hre lo vang a, min hmu hek lo vang,” an lo ti bawk si a.

¹²Nimahsela, Juda mi an kianga chêngte chuan kan hnêna lo kalin kan hmêlmate min phiarna chu min hrilh fo bawk a.

¹³Chu vâng chuan kulh phên, a hniam lai ber, hmun thawthâwl takahte mipuite chu a chhûng chhûngin an khandaih te, an fei te, an thal ngulte kengin ṭanhmun ka khuartîr a.

¹⁴Tin, ka han en vêl a, ka tho va, mi ṭhate leh rorêltute leh mipui dangte hnênah chuan, “Anmahniho chu hlau hauh suh ula, Lalpa ropui tak leh hlauhawm tak mai chu hre rengin in unaute, in fapate, in fanute, in nupuite, in inte hum tûrin bei rawh u,” ka ti a.

¹⁵Tin, heti hi a ni a, kan hmêlmaten kan lo hria tih leh, an thiltih tum chu Pathianin engmahlovah a siam tih an hriatin, kulh lamah mahni hnathawhna ṭheuhvah kan kal leh ta vek a.

¹⁶Tin, heti hi a ni a, chuta chin chu kan tlangvâlho zâtvete chuan hna an thawk a; tin, a zâtvete chuan feite, phawte, thal ngulte, âwmphawte chu an kawl a; tin, rorêltu chuan Juda chhûngte, kulh siamtu zawng zawngte chu an ṭan tlat a.

¹⁷Kulh siamna tûr hmanraw phurtute pawhin an kut khing khatin hna an thawk a, khing khatin hriamhrei an keng a;

¹⁸a siamtute chuan an khandaih an pai ṭheuh va, chutiang chung chuan an siam a ni. Tin, tawtawrâwt hâmtu chu ka kiangah a awm a.

¹⁹Tin, mi ṭhate leh rorêltute leh mipuite hmaah chuan, “Hna chu a nasain a zau êm mai a, kulhah hian kan darhsarhin kan inhlat hle mai si a;

²⁰tawtawrâwt ri in hriatna lam apiangah chuan, chutah chuan kan hnênah lo tlân khâwm ula; kan Pathianin min dosak ang,” ka ti a.

²¹Chutiang chuan hna chu kan thawk a; tin, a zâtve chuan khawfîngchah aṭangin arsi lan thlengin feite chu an kawl reng a.

²²Chutiang bawkin chumi lai vêk chuan mipuite hnênah, “Zâna min vênga chhûnlâwna hnathawk atân tu pawh an chhiahhlawhte nên Jerusalem chhûngah riak vek rawh se,” ka ti a ni.

²³Chutichuan, kei pawh, ka unaute pawh, ka tlangvâlte pawh, vêngtu mi zui ṭhînte pawh, tu mah rêng rêngin kan silhfên kan hlîp lo va, hriamhrei inbel chung ṭheuhvin tui lamah chuan kan kal ta ṭhîn a.