Read Mizo_Old_version Nehemia 6 Bible Online

Nehemia 6 - Mizo_Old_version bible

Nehemia 6

¹Tin, heti hi a ni a, Sanbalata leh Tobia leh Arab mi Gesema leh kan hmêlma dang rêng rêngten kulh te ka siam a, a pawp lai rêng rêng a awm ta lo tih an han hriat chuan (amaherawhchu, chumi lai chuan kawngkaah chuan kawngkhârte ka la rel lo va),

²Sanbalata leh Gesema chuan, “Lo kal la, Ono phaia khaw pakhatah i intâwk khâwm teh ang u,” tiin thu min rawn thawn a. Nimahsela, ka chunga thil ṭha lo tih an tum a lo ni reng a.

³Tin, keiin an hnênah, “Hna ropui tak ka thawk a, ka lo chhuk thei lo. Engah nge in hnêna ka rawn chhuksan hlânin hna chu a chawlh ang?” tiin mi ka tîr a.

⁴Tin, chutiang hlîr chuan vawi li thu mi rawn thawn a, chutiang hlîr chuan ka chhâng bawk a.

⁵Chutichuan, Sanbalata chuan chutiang bawkin a vawi nganaah chuan a chhiahhlawh lehkha châr loh kengin ka hnênah a rawn tîr a.

⁶Chumiah chuan, “Nang leh Juda-ho chuan hel in rilrûk a, chu vâng chuan kulh chu i siam a ni tih thu hnam dangte zîngah a thang a, Gaasmu-an a sawi bawk a; tin, an sawi dân hmangah chuan nang hi an lal nih i tum a.

⁷Tin, ‘Judai ramah chuan lal a awm,’ tia i chanchin Jerusalem-a puang vêl tûrin zâwlnei pawh i ruat tawh hial bawk a. Hêng thu hi lal hnênah an sawi thuai ngei ang a. Chuvângin, lo kal la, i lo inrâwn ang hmiang,” tih a chuang a.

⁸Chutichuan, a hnênah, “I sawi ang rêng rêng hian eng mah tih a awm lo, i phuah chawp mai a ni,” tiin a hnênah mi ka tîr a.

⁹“An hnathawh chu an puitlin theih loh nân an kutte chu tihchak lohvin a awm ang,” tia mi sawiṭhaih duh vek an ni a. Chutichuan, aw Pathian, ka kutte hi min tihchaksak teh ang che.

¹⁰Chumi zawhah chuan Mehetabela fa Delaia fapa Semaia, chhuakvâk thei lova inah chuan ka kal a; tin, ani chuan, “Pathian inah, biak in chhûng ngeiah inhmu ang khai, biak in kawngte i khâr tlat ang, nangmah that tûrin an lo kal dâwn a ni; zânah rawn thah che an tum a ni,” a lo ti a.

¹¹Tin, kei chuan, “Keini ang hi han tlânchhe tûr em kan nih? Mahni nun humhim tûr pawhin biak inah tu nge lût duh ang? Ka lût tawp lo vang,” ka ti a.

¹²Tin, ka han hre chhuak a, Pathian tirh a lo ni hauh lo mai a, keimah mi dodâlin chûng thu chu a sawi a lo ni zâwk a, Tobia leh Sanbalatan an rawih a lo ni reng a.

¹³Ka hlauhva, chutianga ka tiha, thil ka tihsuala, mi tihhmingchhiatna tûr an neih theiha min sawichhiat nân an rawih a ni a.

¹⁴Aw ka Pathian, Tobia leh Sanbalata hi an thiltih ang zêl hian hre reng ang che, zâwlneinu Noadii leh zâwlnei dang, mi tihhlauh tum zawng zawng nên hian.

¹⁵Chutichuan, kulh chu mi sawmnga leh ni hnihah, Elul thla, ni sawmhnih leh ni nga niah peih a ni ta a.

¹⁶Tin, heti hi a ni a, kan hmêlma zawng zawngten chu chu an lo hriat chuan kan vêla hnam dangte chuan an hlau ta a, chan chhe ta hlein an inhria a, hna chu kan Pathian thawh a ni tih an hre ta si a.

¹⁷Chu lo rêngah pawh, chûng lai chuan Juda mi ṭhate chuan Tobia chu lehkha tam tak an thawn ṭhîn a; tin, Tobia lehkha pawh an hmu bawk ṭhîn a.

¹⁸Ani chu Ara fapa Sekania mâkpa a nih avângin Judai rama mi tam tak chhechhama amah thurualpui an awm a; tin, a fapa Jehohanana chuan Berekia fapa Mesulama fanu chu nupuiah a nei a ni a.

¹⁹Ka hriatah a thiltih ṭhatte an sawi ṭhîn a, ka thusawite a hnênah an thlen bawk ṭhîn. Tichuan, Tobia chuan min tihṭhaih tûrin lehkhate a rawn thawn ṭhîn a ni.