Read Mizo_Old_version Nehemia 8 Bible Online

Nehemia 8 - Mizo_Old_version bible

Nehemia 8

¹Tin, mi zawng zawng chu thu khat vuain Tui Kawngkhâr hmazâwn hmun zau laiah chuan an kal khâwm a; tin, lehkhaziaktu Ezra chu LALPAN Israel-hote zawm tûra thu a pêk, Mosia dân bu chu rawn keng tûrin an hrilh a.

²Chutichuan, thla sarihna ni khat niah puithiam Ezra chuan pung khâwmho, nutling patling leh a hre thiam thei chin zawng zawng hmaah chuan dân chu a rawn keng a.

³Tin, chuta mi chu Tui Kawngkhâr hmazâwn hmun zau laiah chuan, nutling patling leh a hre thiam thei chinte hmaah chuan zîng tak aṭangin chhûn thlengin a chhiar a; tin, mi zawng zawng chuan dân bu thu-ah chuan an beng an chhi ṭhup mai a.

⁴Tin, chutiang atâna an siam rêng thing dawhkân sângah chuan lehkhaziaktu Ezra chu a ding a; tin, a sîr ding lamah chuan Matithia te, Sema te, Anaia te, Uria te, Hilkia te, Maaseia te an ding a; tin, a vei lamah chuan Pedaia te, Misaela te, Malkija te, Hasuma te, Hasbadana te, Zekaria te, Mesulama te.

⁵Tin, Ezra chuan mi zawng zawng mit hmuhah chuan lehkhabu zial chu a han phelh a (mi zawng zawng aia sânga ding a ni a); tin, a han phelh chuan mi zawng zawng chu an ding ta vek a;

⁶tichuan, Ezra chuan LALPA, Pathian ropui tak chu a fak a. Tin, mipui zawng zawng chuan an bân pharin, “Amen, Amen!” tiin an lo chhâwn a. Tin, an kûn a, an hmaia lei siin LALPA chu chibai an bûk a.

⁷Tin, Jesua te, Bania te, Serebia te, Jamina te, Akuba te, Sabethaia te, Hodija te, Maaseia te, Kelita te, Azaria te, Jozabada te, Hanana te, Pelaia te, Levi-hote chuan mipuite chu dân an hrilhfiah a; mipuite chu an dinhmunah chuan an awm reng a.

⁸Tin, lehkhabu, Pathian dân bua mi chu fiah takin an chhiar a; a awmzia an hrilhfiah a; tichuan, an chhiar chu an hriat chiantîr zêl a.

⁹Tin, ram awptu Nehemia leh, puithiam leh lehkhaziaktu ni fâwm Ezra leh mipuite zirtîrtu Levi-hote chuan mipui zawng zawng hnênah chuan, “Vawiin hi LALPA in Pathian tâna ni thianghlim a ni a; lungchhe suh ula, ṭap hek suh u,” an ti a. Dân thu chu an hriatin mipui zawng zawng chu an ṭap an ṭap mai si a.

¹⁰Chutichuan, ani chuan an hnênah, “Kal ula, thil thau eiin thil thlum in ula, eng mah buatsaih nei lote tân chanpual thawn ang che u; vawiin hi kan LALPA tâna ni thianghlim a nih hi. Lungngaiin awm suh u; LALPA chunga lâwmna chu in chakna a ni si a,” a ti a.

¹¹Chutichuan, Levi-hote chuan, “Ngawi hle hle rawh u, vawiin hi ni thianghlim a ni si a; lungngaih pawh lungngai duh suh u,” tiin mipui zawng zawng chu an tingawi ta ṭhuap mai a.

¹²Tichuan, thu a hrilhfiah chu an hriat thiam avângin mipui zawng zawng chu ei tûr te, in tûr te, mi dang chanpual thawn tûr te, hlim taka awm tûr tein an ṭîn ta vek a.

¹³Tin, a ni hnih ni chuan mipui zawng zawng zînga chhûngkaw puipa te, puithiam te, Levi-hote chu dân thu zir tûr bawk chuan lehkhaziaktu Ezra hnênah an kal khâwm a.

¹⁴Tin, LALPAN Mosia hmanga zawm tûra thu a pêk dânah chuan, thla sarihna kût laia Israela thlahte chhâwlbûka an awm tûr thu ziak an hmu a,

¹⁵“Tlângah kal ula, olive zâr te, olive suak zâr te, lênhmui zâr te, tûm kau te, thing lian tak tak zârte chhâwlbûk sak nân va la rawh u,” tiin, an khua zawng zawngah leh Jerusalem khuaa an tlângthantîr tûr leh puan vêl tûr a nih thute an chhiar a.

¹⁶Chutichuan, mipuite chu an va kal a, an va la a, mi zawng zawngin an in chungah te, an kawtah te, Pathian in kawtah te, Tui Kawngkhâr hmun zau laiah te, Ephraim kawngkhâr hmun zau laiah te chhâwlbûk an insiam ṭheuh va.

¹⁷Tin, sal chhuak pung khâwmho zawng zawng chuan chhâwlbûk an siam a, chhâwlbûkahte chuan an awm a. Nuna fapa Josua hun aṭanga chumi ni thleng chuan Israela thlahte chuan chutiang tak chuan an ti ngai lo va. Tichuan, lâwmna nasa tak a lo awm ta a.

¹⁸Ni tin, a ṭan tirh ni aṭanga a tâwp thlengin Pathian dân bua mi a chhiar bawk a. Tin, ni riat ni chu kût ṭiak ni a ni a, thupêk angin inkhâwmna urhsûn takin an titâwp ṭhîn.