Read Mizo_Old_version Nehemia 9 Bible Online

Nehemia 9 - Mizo_Old_version bible

Nehemia 9

¹Chutichuan, chumi thla ni sawmhnih leh ni li ni chuan Israela thlahte chu chaw ngheia saiip puan sinin, lei kai luamin an kal khâwm a.

²Tin, Israel hnam chu hnam dangte lakah an intihrang a, an ding a, an sualnate leh an pi leh pu bawhchhiatnate thupha an chawi a.

³Tin, mahni hmun hmunah an ding a, chumi ni hmun lia ṭhena hmun khat chhûng chuan LALPA an Pathian dân bu an chhiar a; tin, hmun lia ṭhena hmun khat dang chhûng chuan thupha an chawi a, LALPA an Pathian an bia a.

⁴Chutichuan, Levi-ho dawhkân sângah chuan Jesua te, Bania te, Kadmiela te, Sebania te, Bunia te, Serebia te, Bania te, Kenania te chu an ding a, ring takin LALPA an Pathian an au va.

⁵Chutichuan, Levi mi, Jesua leh Kadmiela te, Bania te, Hasabneia te, Serebia te, Hodia te, Sebania te leh Pethahia te chuan, “Ding ula, LALPA in Pathian chu chatuan ata chatuan thlengin fak rawh u,” an ti a. “Chawimawina leh fakna zawng zawngina a phâk loh, i hming ropui chu fakin awm rawh se.

⁶LALPA, nangmah chauh hi LALPA i ni a, vânte vân leh a chhûnga awm zawng zawngte nên, leilung leh a chhûnga awm zawng zawngte nên, tuifinriat leh a chhûnga awm zawng zawngte nên i siam a, a zain i vawng ṭha ṭhîn a; tin, vâna awmhote chuan chibai an bûk ṭhîn che a.

⁷Abrama chu thlanga, Kaldai ram Ur khua ata hruai chhuaka, a hminga Abrahama saksaktu LALPA Pathian i ni a;

⁸tin, a thinlung chu i hmaah rinawmin i hria a, Kanaan-hote, Hit-hote, Amor-hote, Periz-hote, Jebus-hote, Girgas-hote ram chu pe tûrin, a thlahte lam pe tûrin thu i thlung a; tin, i thu i hlen bawk a; fel tak i ni si a.

⁹“Aigupta rama kan pi leh pute hrehawmzia chu i hmu reng a, Tuifinriat Sen kama an au thâwmte chu i hria a;

¹⁰Pharaoa leh a chhiahhlawh zawng zawngte leh a rama mi zawng zawngte chungah chhinchhiahnate leh thil makte i lantîr a; chapo takin an chungah thil an ti tih i hre si a; tichuan, tûn thleng hian hming i insiam ta a.

¹¹Tin, an hmaah tuifinriat chu i tiṭhen a; tichuan, lei chârah tuifinriat chu an kal tlang a; tin, anmahni ûmtute chu tui thûk takah, tui thûk taka lung paih luh ang maiin i paih lût a.

¹²Tin, chhûnah chhûm dingin i hruai ṭhîn a, zânah pawh an kalna tûr kawnga anmahni ên tûrin meialh dingin i hruai ṭhîn a.

¹³“Sinai tlângah chuan i lo chhuk bawk a, vân aṭangin an hnênah thu i sawi a, rorêlna dik tak te, dân dik tak te, thuruat leh thupêk ṭha takte i pe a;

¹⁴tin, i Chawlhni thianghlim chu anmahni i hriattîr a, i chhiahhlawh Mosia hmangin thupêk te, thuruat te, dân te i pe a;

¹⁵tin, an rilṭâm tihreh nân vân aṭangin chhang i pe a, an tuihâl tihreh nân lungpui ata tui i tihchhuahsak a, pêk i tum ram chu luah tûrin i pe a.

¹⁶Nimahsela, anni leh kan pi leh pute chuan chapo takin thil an ti a, an intiluhlul a, i thupêkte chu an pawm lo va,

¹⁷an awih duh lo va, an zînga i thil mak tihte pawh chu an hre duh tawh hek lo; an intiluhlul a, an helin an bawih nihna lama lêt leh tûrin hotu an ruat ta zâwk a. Nimahsela, nang chu ngaidam tûra inpeih reng Pathian, mi khawngaih thei, lainatnaa khat, thinnel, ngilneihna ngah i ni a, anmahni i thlahthlam chuang lo va.

¹⁸A ni, bâwngno lem an insiam a, ‘Hei hi a ni, Aigupta ram ata hruai chhuaktu che u in pathian chu,’ an tiha, thinurthlâk tak thil an tih laite pawh khân,

¹⁹i ngilneihna nasa tak chuan thlalêrah khân i thlahthlam chuang lo va. Kawnga anmahni hruai tûra an chunga chhûm ding chuan chhûnah a kalsan lo va, anmahni ên tûr leh an kalna tûr kawng kawhhmuh tûra meialh ding pawh chuan zânah a kalsan hek lo.

²⁰Anmahni zirtîr tûrin i thlarau ṭha tak chu i pe bawk a, i manna chuan i châwm a, an tuihâl tihreh nân tui i pe a.

²¹A ni, thlalêrah khân kum sawmli i châwm a, eng mah an tlachham lo va; an silhfênte a hlui lo va, an kete chu a vûng lo va.

²²Tin, ram leh hnamte i pe a, chûng chu an chanpual i sem ṭheuh va. Chutichuan, Sihona ram, Hesbon lalram leh Basan lal Oga ram chu an luah a.

²³An thlahte chu vâna arsi zâtin i tipung bawk a, an luah tûra an pi leh pute hnêna i lo sawi tawh ramah chuan i hruai lût ta a.

²⁴Chutichuan, an thlahte chuan ram chu an luah ta a; tin, nangin chumi rama awm Kanaan mite chu an hmaah i titlâwm a, an duh duha tih atân an lalte leh chumi rama mite nên an kutah i pe a.

²⁵Kulh nei khawpuite, ram ṭha tak takte an la a, thil ṭha tinrênga khat inte an luah a, tuikhur hiah sa te, grêp huan te, olive huan te, theikûng tam takte an nei a. Tichuan, an ei a, an puar a, an lo thau va, i ṭhatna nasa takah chuan nuam an chên a.

²⁶Nimahsela, an tihmawh a, i chungah an hel a, i dân chu an hnuchhawn daih a, i lam hawi lehtîr tuma zilhtu i zâwlneite chu an that a, thinurthlâk tak tak thil an ti a.

²⁷Chu vâng chuan anmahni tihrehawmtu an hmêlmate kutah chuan i pe a; an mangan laia an auh che khân vân aṭangin i lo ngaithla a; tin, i ngilneihna nasa tak chuan an hmêlmate laka chhanchhuaktu tûr chhandamtute i pe a.

²⁸“Nimahsela, râlmuanga an han awm hnu chuan, i mit hmuhah thil ṭha lo an ti leh mai a. Chuvângin, an hmêlmate kutah i pe a; tichuan, an chungah thu an nei a; mahse, an inlamlêta an auh che khân vân aṭangin i lo ngaithla a; vawi tam tak i ngilneihna chuan i chhanchhuak a.

²⁹I dâna i hruai luh leh theih nân i zilh ṭhîn a; nimahsela, chapo takin thil an ti a, i thupêkte an pawm lo va, i rorêlna kalhin thil an tisual a (miin an zawma an nunpui tûr chu); tin, tukkhum chhah an chhawn a, an intiluhlul a, an ngaithla duh lo va.

³⁰Nimahsela, kum tam tak anmahni i dawh a, i thlarauva i zâwlneite hmangin i zilh ṭhin a; nimahsela, an beng an chhu ngawng a; chuvângin, chûng rama mite kutah chuan i pe ta a.

³¹“Nimahsela, i ngilneihna nasa tak chuan an tâwp hlenna hlauh chu i thlensak lo va, i thlahthlam hek lo; Pathian, mi khawngaih thei tak, lainatnaa khat i ni si a.

³²Chuvângin, kan Pathian, Pathian ropui, engkim ti thei leh hlauhawm, thuthlung hlena khawngaihna tilangtu chuan kan chung leh kan lalte, kan mi liante, kan puithiamte, kan zâwlneite, kan pi leh pute leh i mite zawng zawng chunga Assuria lalte lal lai aṭanga tûn thlenga hrehawmna lo thleng zozaite hi, thil tê thamah ngai suh ang che.

³³“Eng pawh ni sela, kan chunga thil lo thleng zawng zawngah hian nang chu i fel a; nang chuan dik takin thil i ti a, keini erawh chuan ṭha lo takin kan ti a ni.

³⁴Kan lalte, kan mi liante, kan puithiamte, kan pi leh pute pawhin i dân chu an zâwm lo va, i thupêk leh i thu hriattîr, anmahni i zilhnate chu an pawm hek lo.

³⁵An chunga i ṭhat ṭhin tehlul nên, an ramah, ram zau tak leh ram ṭha tak i pêkah chuan i rawng an bâwl lo va, an thil tihsual an bân chuang hek lo.

³⁶“Ngai teh, tûnah hi chuan bawih kan ni ta a, a chhûnga thil rah leh thil ṭha kan pi leh pute ei atân i pêk ramah hian bawih kan ni.

³⁷Kan sual avânga kan chunga lal atâna i ruatte lah chuan an neihnun phah a; kan taksa chungah leh kan ran chungahte lam pawh an duh duhin thu an nei a; kan mangang êm êm mai a ni.

³⁸“Chûng zawng zawng avâng chuan thu nghet tak kan thlung a, kan ziak a; kan mi liante, kan Levi-hote leh kan puithiamten min nemnghehpui a,” tiin.