Read Mizo_Old_version Estheri 1 Bible Online

Estheri 1 - Mizo_Old_version bible

Estheri 1

¹Lal Ahasuera a lal laiin (chu Ahasuera chu India aṭanga Ethiopia thlenga ram ṭhen za leh sawmhnih leh pasarih chunga lal a ni a) heti hi a ni a.

²Lal Ahasuera a ram lalṭhutthlêng lal khua Susan-a a ṭhut lai,

³a lal kum thum kum khân a mi liante zawng zawng leh a mite tân ruai a ṭheh a; Persia leh Media rama thuneitute, an ram ṭhen mi ṭhate leh mi liante chu an awm vek a;

⁴a ram ropui tak rote leh a lal ropui nasatzia chu rei tak, ni za leh ni sawmriat zet a entîr a.

⁵Tin, chûng zawhah chuan mi lian leh mi tê lal khua, Susan-a lo tel zawng zawng tân lal in huan hung chhûng kawtlaiah lal chuan ni sarih zet ruai a ṭheh a;

⁶puan, a vâr te, a hring te, a dumpâwl te, lazai sin sendukin tangkaraw khângah leh sailungvâr banahte an thlung a; rangkachak leh tangkaraw ṭhutphahte chu sailungvâr, a sen te, a vâr te, a eng te, a dum tea rem chungah an hûng a.

⁷Rangkachak novin uain chu an sem a (no chu chi hrang hrang, inang lo thluah a ni), lal chuan a ngah khawp a, uain chu a awm leng lung mai a ni.

⁸Tin, uain chu dân angin an in a; tu mah tihluih an ni lo va, mi tinin an duh anga an tih ṭheuhna tûrin lal chuan a ina hotu zawng zawngte chu a hrilh a.

⁹Tin, Lalnu Vasti pawhin Ahasuera lal inah chuan hmeichheho tân ruai a ṭheh a.

¹⁰A ni sarih nî chuan lal rilru chu uain chuan a tihpuamsak ta a, pindan vêngtu pasarih, Lal Ahasuera hmaa rawngbâwl ṭhîn Mehumana te, Biztha te, Harbona te, Bigtha te, Abagtha te, Zethara te, Karkasa te chu Lalnu Vasti, a lallukhum khum chunga mipuite leh mi liante a hmêlṭhatzia inentîr tûra lal hmaa va hruai tûrin thu a pe a; a hmêl a ṭha hle si a.

¹²Nimahsela, Lalnu Vasti chuan pindan vêngtuten kal tûra lal thupêk an hrilh chu a hnial a; chuvângin, lal chu a thinrim ta hle mai a, a thinrim a alh ta a.

¹³Chutichuan, lal chuan thil hre mi mi fingte hnênah chuan (dân leh rorêl dân hria zawng zawngte chu chutiang chuan lalin a râwn ṭhîn rêng a ni;

¹⁴amah dâwltute chu Karsena te, Sethara te, Admatha te, Tarsisa te, Meresa te, Marsena te, Memukana te, Persia leh Media ram mi lian pasarih, lal hmêl hmu fotu, an rama amah hnaih ber ṭhînte an ni),

¹⁵“Pindan vêngtuten an hriattîr si, Lal Ahasueran a tih anga a tih loh avângin Lalnu Vasti chungah chuan dân anga ti tûrin engtin nge kan tih ang?” a ti a.

¹⁶Memukana chuan lal leh mi liante hmaah chuan, “Lalnu Vasti chuan lal chungah chauh a tisual a ni lo va, mi lian zawng zawng leh Lal Ahasuera ram ṭhen zawng zawnga hnam tin chungah pawh a tisual a ni.

¹⁷He lalnu thiltih hi hmeichhia zawng zawngin an han hre darh ang a, ‘Lal Ahasuera chuan Vasti a hmaa rawn hruai tûrin thu a pe a; nimahsela, a kal lo,’ tih thu a han than chuan an pasalte an hmuhsit phah mai ang.

¹⁸Tin, vawiinah ngei pawh hian Persia leh Media mi liannuho, lalnu thiltih hriate hian lal mi liante chungah an ti ve mai ang a. Chutichuan, inhmuhsitna leh thinurna nasa tak a chhuak ang.

¹⁹Lal ṭha tih zâwng a nih chuan, lal thupêk than chhuak sela, Lalnu Vasti chu Lal Ahasuera hmaah lo kal tawh hauh suh se, tih thu hi tihdanglam tawh hauh loh tûrin Persia leh Media ram dân zîngah ziak ni sela; tin, lalin amah aia ṭha zâwk a lalnu nihna luahtîr sela.

²⁰Tin, lal thupêk chu a ram zawng zawngah (zau teh mah sela) than chhuah a nih hunah chuan, an nupuiten a mi lian a mi tein an pasalte an pawisa ang,” a ti a.

²¹Chu thu chuan lal leh mi liante chu a tilâwm hle a; tichuan, lal chuan Memukana thu ang chuan a ti a.

²²Lalram zawng zawngah, ram tinah anmahni lehkha ṭheuhvin, hnam tin anmahni ṭawng ṭheuhvin mipain mahni in chhûng ṭheuhvah thu an nei tûr a ni tih thu a thawn ta a ni.