Read Mizo_Old_version Estheri 2 Bible Online

Estheri 2 - Mizo_Old_version bible

Estheri 2

¹Chûng thil hnua Lal Ahasuera thinrim chu a lo daih hnu chuan, Vasti leh a thiltih leh a chungchânga thupêk chu a hre chhuak a.

²Chutichuan, lal chhiahhlawh, a rawngbâwltute chuan a hnênah, “Lal tân nula hmêlṭha zawn ni sela;

³lal pindan enkawltu Hegaia, hmeichhe enkawltu hnuaiah, Susana lal hmeichhe dah khâwmna inah nula hmêlṭha zawng zawng ko khâwm tûrin lalin a ram chhûnga ram ṭhen zawng zawngah hotu ruat sela; tin, an intihthianghlimna tûrte pêk ni ṭheuh sela;

⁴lal tilâwmtu ber nula chu Vasti aiah lalnu ni sela,” an ti a. Tichuan, chu chuan lal chu a tilâwm a, chutiang chuan a ti ta a.

⁵Lal khawpui Susan-ah chuan Juda mi, mi pakhat a awm a, a hming chu Mordekaia a ni a, Benjamin mi Kisa fa Simeia fapa Jaira fapa a ni;

⁶Babulon lal Nebukadnezzaran Juda lal Jekonia sala a hruai laia Jerusalem aṭanga hruai a ni.

⁷A pami fanu, Hadasi, Estheri an tih chu a enkawl seilian a; pa a nei lo va, nu a nei bawk si lo va. Nula chu a nalhin a hmêl a ṭha hle mai a; a nu leh a pa an thih hnuin Mordekaia chuan a fanu atân a awmpui ta a ni.

⁸Chutichuan, lal thupêk leh lal thuruat chu an lo hriata, nula tam tak, lal khawpui Susan-a Hegaia vênnaah an kal khâwm chiam lai chuan heti hi a ni a, Estheri chu lal inah hmeichhe vêngtu Hegaia vênnaah chuan an hruai lût a.

⁹Tin, nula chuan a tilâwm a, a duhsakna a chang a, lal in ata a chanvo leh a intihthianghlimna tûr chu a pe thuai mai a, nula pasarih pêk âwm deuh deuhte nên; amah leh a nulâtpuite chu hmeichhe awmna hmun ṭha berah a hruai ta a.

¹⁰Estheri chuan eng chi nge a nih leh tute nge a laichînte a hriattîr hauh lo va; Mordekaia chuan hriattîr lo tûrin thu a pe tlat a ni.

¹¹Estheri chuan eng nge a tih ṭhina, engtin nge a awm tih hre tûrin Mordekaia chu ni tin hmeichhe awmna kawt hung chhûngah chuan a kal ṭhîn a.

¹²Tin, thla sâwm leh thla hnih hmeichhe tâna dân anga an chungchânga thiltih hnua Lal Ahasuera hnênah nulaho an kal hun a lo thlen chuan (chutiangah chuan an intihthianghlim hun a kim tawh ṭhîn a, hetiang hian an ti ṭhîn a ni, thla ruk chhûng murra hriakin an zût a, thla ruk dang leh chhûng rimtui leh hriak dangin an zût leh a),

¹³hetiang hian an kal ṭhîn a, lal ina luhpui tûrin hmeichhe awmna ata an duh apiang an pe ṭhîn a ni.

¹⁴Tlai lamah an kal a, a tûkah, hmei vêngtu, lal pindan vêngtu Saasgaza vên hmeichhe awmna pahnihnaah an lêt leh ṭhîn a; lalin a duha, an hming lama a kohte chauh lo chu lal hnênah an kal leh tawh ṭhîn lo.

¹⁵Chutichuan, Mordekaia pami Abihaila fanu, a fanu atâna a awmpui Estheri chu lal hnêna a kal hun a thlen chuan, hmeichhe vêngtu, lal pindan vêngtu Hegaia ruat chauh lo chu eng mah a duh lo va. Estheri chu a hmu apiangte duh zâwng mi nih a kai a.

¹⁶Chutichuan, Estheri chu Lal Ahasuera lal inah thla sâwmna, Tebeth thlaah kum sarih a lal kumah an hruai lût a.

¹⁷Lal chuan hmeichhe dang zawng zawng aiin a hmangaih a, nula dang zawng zawng aiin khawngaihna leh duhsakna a hlawh a; tichuan, lallukhum a khumtîr a, Vasti aiah lalnuah a siam ta a.

¹⁸Chutichuan, Estheri hmingin lal chuan a mi liante leh a mite tân ruai ropui tak a ṭheh a; a rama mite tân awm nî a khamsak a, lal tih âwm rêngin phal takin thilte a sem a.

¹⁹Tin, nulaho an inkhâwm leh lai chuan Mordekaia chu lal kawt hung kawngkaah a ṭhu a.

²⁰Mordekaia thupêk avângin Estheri chuan tute nge a laichînte leh eng chi nge a nih a la hriattîr lo fo va; Estheri chuan Mordekaia thu chu a awmpui laia a zâwm ṭhîn ang khân a la zâwm reng a ni.

²¹Tin, lal kawt hung kawngkaa Mordekaia a ṭhut lai chuan lal pindan vêngtu zînga mi pahnih Bigthana leh Teresa, kawngka vêng ṭhîntute chu an thinur a, Lal Ahasuera chungah kutthlâkna remchâng an zawng a.

²²Chu thil chu Mordekaian a lo hria a, Lalnu Estheri chu a hrilh a; tin, Estheri chuan Mordekaia hmingin lal a hrilh a.

²³Tin, chumi thu chu an han chhui chiang a, chutiang chu a lo ni ngei tih an hriat chhuah chuan thingah an khai hlum ve ve a; chu chu lal kawl, lal chanchin ziakna buah an ziak a.