Read Mizo_Old_version Estheri 3 Bible Online

Estheri 3 - Mizo_Old_version bible

Estheri 3

¹Chûng thil hnuah chuan Lal Ahasuera chuan Agag mi Hamedatha fapa Hamana chu a kaisântîr a, a chawisâng a, a mi liante zawng zawng aiin a ṭhut chungnuntîr a.

²Tin, lal kawt hung kawngkaa awm, a mite zawng zawng chuan Hamana chu an zah a, chibai an lo bûk ṭhîn a; chutianga tih tûrin lalin thu a pe a ni. Nimahsela, Mordekaia chuan a hmaa kûnin chibai a bûk duh lo va.

³Tin, lal mite, lal kawt hung kawngkaa awm zawng zawngte chuan Mordekaia hnênah, “Engati nge lal thupêk i bawhchhiat?” an ti a.

⁴Tin, heti hi a ni a, nî tin a hnêna an sawia a pawm chuan loh hnu chuan, Mordekaia thu chu a ngaimawh nge ngaimawh lo tih hriat nân Hamana chu an hrilh a, Juda mi a ni tih a lo hrilh tawh hlawm si a.

⁵Tin, Hamanan Mordekaia a hmaa kûna chibai a bûk loh a han hriat chuan Hamana chu thinrimin a khat ta ṭeuh mai a.

⁶Nimahsela, Mordekaia chung chauhva kut han thlâk chu eng mah thamah a ngai lo va, Mordekaia chi chu an hrilh tawh bawk si a; chuvângin, Ahasuera ram chhûng zawng zawnga Juda-ho, Mordekaia chipuite chu tihhlum vek a tum ta a.

⁷Lal Ahasuera kum sâwm leh kum hnih a lal kum, thla khatna, Nisan thlaah Hamana hmaah ni tin, thla tin, thla sâwm leh pahnihna Adar thla thlengin Aienna ṭhum an vâwr reng a.

⁸Tin, Hamanan Lal Ahasuera hnênah, “I ram ṭhen chhûng tinah hnam eng emaw, hnam dang nên inang lo, intihrang an awm darh nuaih a; an dânte chu hnam dangte dân nên a inang lo riau mai a, lal dân pawh an zâwm hek lo; chuvângin, chutiang awmtîr phal chu lal tân a manhla lo hle mai a.

⁹Lalin rem a tih chuan tihhlum vek tûr a ni tih ziak tlat ni sela; lal sum ina dah tûrin lal sum enkawltute kutah tangkaraw talent sângsâwm ka pe ang e,” a ti a.

¹⁰Tin, lal chuan a zungbun a phawi a, Juda-te hmêlma Agag mi, Hamedatha fapa Hamana chu a pe a.

¹¹Lal chuan Hamana hnênah, “Tangka leh chûng mite pawh chu ṭha i tih ang anga tih tûra pêk i ni,” a ti a.

¹²Chutichuan, thla khatna ni sâwm leh ni thum nîin lal lehkhaziaktute chu an ko va, Hamana thupêk ang chuan lal upate, ram ṭhen tin awptute, hnam tin puipate an thawn a, ram ṭhen tinah anmahni lehkhain, hnam tin anmahni ṭawng ṭheuhvin. Lal Ahasuera hminga thawn a ni a, lal zungbuna nem a ni.

¹³Tin, lalram ṭhen tinah, Juda mi zawng zawngte chu, ṭhalai leh tar te, naupang tê tê te, hmeichhia te, ni khatah, thla sâwm leh thla hnihna, Adar thla ni sâwm leh ni thum nî takin tihboral veka, thah veka, tihchimih veka, an sum chu râllâka lâksak tûrin lehkha an thawn darh a.

¹⁴Chumi nî atâna lo inpeih diam tûrin chumi thupêk chu ram ṭhen tina pêka hnam tin hnêna puan tûrin chumi lehkha chu an thawn a.

¹⁵Lal thupêkin an kal hmanhmawhtîr a, thupêk chu lal khawpui Susan-ah an puang a. Lal leh Hamana chuan zu an in der der mai a; nimahsela, Susan khua chu a mangang hle a.