Read Mizo_Old_version Estheri 4 Bible Online

Estheri 4 - Mizo_Old_version bible

Estheri 4

¹Chûng an thiltih zawng zawng chu a hriat chuan Mordekaia chuan a puan a pawt thlêr a, saiip puan leh vaivut a inbel a, khawlaiah a kal a, ring tak leh lungchhe takin a ṭap a.

²Lal kawt hung kawngka bul thlengin a kal a, tu mah saiip puan sina lal kawt hung chhûng luh chu phal a ni si lo va.

³Lal thupêk chu a thlenna ram tawh phawt maiah chuan Juda-te chu an ṭap ngawih ngawih a, chaw an nghei a, an chiau vawng vawng a, mi tam tak chu saiipah leh vaivut zîngahte an mu a.

⁴Tin, Estheri chu a nulate leh a pindan vêngtute chuan an va hrilh a; tichuan, lalnu chu a lungngai ta êm êm mai a, Mordekaia chu a saiip puan hlîpa, a sin tûrin a puan a thawn a; nimahsela, a lo duh lo va.

⁵Chutichuan, Estheri chuan lal pindan vêngtu pakhat, amah vêngtu atâna ruat Hathaka chu a ko va, chûng chu eng nge nia, engtizia nge ni tih hriat nân Mordekaia hnênah a kaltîr a.

⁶Chutichuan, Hathaka chu lal kawt hung kawngka zâwna mual zau laiah, Mordekaia hnênah chuan a va kal a.

⁷Tin, Mordekaia chuan a chunga thil lo thleng zawng zawng leh Juda-te tihhlumna tûra lal sum zînga dah tûra Hamanan tangka pêk a tiam zât chiah te a lo hrilh a.

⁸Tin, Estheri entîr tûr leh a awmzia hrilhfiah tûr te leh lal hnêna dîlsak tûrin a tîr a, anmahni tihboralna tûra Susan-a an puan thupêk ziak chhâwn a pe bawk a.

⁹Tin, Hathaka chuan Mordekaia thuchahte chu Estheri a va hrilh a.

¹⁰Tichuan, Hathaka chu Estheri chuan a lo bia a, “Lal chhiahhlawhte lalram ṭhen tina mite chuan, tu pawh, hmeichhia pawh, mipa pawh tihhluma a awm loh nâna lalin rangkachak tiang a lama a leknate chauh lo chu, lal hnêna a in chhûngrila lût chu tihhlum zêl tûr a ni tih dân awm chu an hre ṭheuh va; hei, ni sawmthum chhûng chu lal hnêna lût tûrin koh ka la ni lo va,” tiin Mordekaia hnêna sawi tûrin thu a chah a.

¹²Tin, Estheri thuchah chu Mordekaia an hrilh a.

¹³Tin, Mordekaia chuan Estheri a va chhântîr leh a, “Juda mi zawng zawngten an pumpelh loh tûr chu lal inah chuan i pumpelh dâwn bîk emaw tih inring suh.

¹⁴Tûn hun anga i ngawih mai mai chuan, hmun danga Juda-te tân himna leh chhuahna a lo awm pawhin, nang leh i pa chhûngte chu kan boral ang. Lal nihna i lo chan hi hetih hun atân ngei hian a ni dâwn lâwm ni?” va ti tûrin a tîr a.

¹⁵Chutichuan, Estheri chuan Mordekaia va chhâng leh tûr chuan a tîr a,

¹⁶“Susan-a awm Juda mi zawng zawng ko khâwm vek la, keimah avângin chaw nghei ula, ni thum leh zan thum eng mah ei lo leh in lovin awm rawh u. Kei leh ka nulahote pawhin kan nghei ve ang a. Tin, dân lo angin lal hnênah ka lût ang a; tin, ka boral leh ka boral a ni mai ang,” tiin.

¹⁷Chutichuan, Mordekaia chu a kal a, Estherin thu a pêk zawng zawng ang chuan a ti a.