Read Mizo_Old_version Estheri 6 Bible Online

Estheri 6 - Mizo_Old_version bible

Estheri 6

¹Chumi zân chuan lal chu a muhîl thei lo va; lal chanchin ziakna bu rawn la tûrin thu a pe a, a hmaah chuan an chhiar a.

²Bigthana leh Teresa, lal pindan vêngtu, kawngkhâr vêngtu pahnihten Lal Ahasuera chunga kutthlâk an tum thu Mordekaian a lo hriattîr thu ziak chu an han hmuchhuak a.

³Tin, lal chuan, “Chumi thu avâng chuan Mordekaia hian eng ang chawimawina leh ropuina nge a hmuh phah le?” a ti a. Lal chhiahhlawh, a rawngbâwl ṭhînte chuan, “Eng mah tihsak a hlawh lo,” an ti a.

⁴Tin, lal chuan, “Tu nge ni kawt hung chhûnga awm saw?” a ti a. Chumi lai chuan Hamana chu a khai hlumna siama Mordekaia khai hlumtîr tûr thu lal hnêna sawi tûrin, lal kawt hung pâwn zâwk chhûngah chuan a lo kal a ni a.

⁵Tin, lal chhiahhlawhte chuan a hnênah, “Ngai teh, lal kawt hung chhûnga awm chu Hamana a ni,” an ti a. Tin, lal chuan, “Lo lût rawh se,” a ti a.

⁶Chutichuan, Hamana chu a lût a. Tin, lal chuan a hnênah, “Lalin mi chawimawi a duha chu eng tihsak nge ṭha ang le?” a ti a. Tichuan, Hamana chuan, “Lalin keimah aia a chawimawi duh zâwk tu nge awm ang?” a ti rilru a.

⁷Tichuan, Hamana chuan lal hnênah, “Lalin a chawimawi duh chu,

⁸lalin a inbel ṭhin lal puan te, lal chuan ṭhinna sakawr te, lallukhum, lalin a khum ṭhinte rawn lâksak ni sela;

⁹tin, lalin a chawimawi duha chu thuam nân lal puan leh sakawr chu lal upa min ber kutah pêk ni sela, chuantîr sela, kawtthlêr fanpui sela, a hmaah chuan, ‘Lalin a chawimawi duha chu hetiang hian tih a ni ang,’ tiin puang zel sela,” a ti a.

¹⁰Chutichuan, lal chuan Hamana hnênah, “I sawi ang chuan lal puan leh sakawr chu va la thuai thuai la, lal kawt hung kawngkaa ṭhu ṭhîn, Juda mi Mordekaia chungah chutiang tak chuan va ti rawh; i sawi tâk zawng zawng kha hmaih awm hauh suh se,” a ti a.

¹¹Chutichuan, Hamana chuan lal puan leh sakawr chu a va la a, Mordekaia chu a thuam a, kawtthlêrah a chuan vêltîr a, a hmaah chuan, “Lalin a chawimawi duha chu hetiang hian tih a ni ang,” tiin a puang a.

¹²Tin, Mordekaia chu lal kawt hung kawngkaah chuan a lo kal leh a, Hamana erawh chu ngui takin inlukhuhin a in lamah a haw ta var mai a.

¹³Tin, Hamana chuan a nupui Zeresi leh a ṭhian zawng zawngte hnênah chuan a chunga thil lo awm dân engkim chu a hrilh a. Tichuan, a mi fingte leh a nupui Zeresi chuan a hnênah, “Tawhsual i tawhna Mordekaia chu Juda mi a nih chuan i chelh lo tawp ang a, a hmaah chuan i chesual ngei ang,” an ti a.

¹⁴Chutia a hnêna an sawi lai mêk chuan lal pindan vêngtute chu an va kal a, Estheri buatsaih ruaiṭhehnaa kal tûr chuan Hamana chu hmanhmawh takin an hruai ta a.