Read Mizo_Old_version Estheri 8 Bible Online

Estheri 8 - Mizo_Old_version bible

Estheri 8

¹Chumi ni chuan Juda-te hmêlma Hamana in chu Lal Ahasuera chuan Lalnu Estheri a pe a. Tin, Mordekaia chu lal hmaah a lo kal a; Estheri chuan a eng nge a nih a lo hrilh tawh a.

²Tin, lal chuan Hamana a lâksak, a zungbun chu a phawi a, Mordekaia a pe a. Tin, Estheri chuan Mordekaia chu Hamana in chhûng hotuah a siam a.

³Tin, Estheri chuan lal hmaah chuan thu a sawi leh a, a ke bulah a bawk a, mittui tla chungin Agag mi Hamana thil ṭha lo tih tum Juda-te chunga a remruat chu tihbo a dîl a.

⁴Tin, lal chuan rangkachak tiang chu Estheri lamah chuan a han lek phei a. Chutichuan, Estheri chu a tho va, lal hmaah chuan a ding a,

⁵“Lal ṭha tih zâwng a niha, a mittlung ka niha, lal ngaiha a dika, a lâwm zâwng ka nih chuan, Agag mi Hamedatha fapa Hamana remruat lehkha, lalram ṭhen zawng zawnga mi Juda-te tihboral vek tûr tih a ziak chu tih leh loh tûrin ziak ni sela.

⁶Engtin nge ka chipuite chunga thil ṭha lo lo thleng han hmuh chu ka tuar zawh ang? Engtin nge ka laichînte boral han hmuh chu ka tuar zawh ang?” a ti a.

⁷Chutichuan, Lal Ahasuera chuan Lalnu Estheri leh Juda mi Mordekaia hnênah chuan, “Ngai teh u, Juda-te chunga a kut a thlâk avângin Hamana in chu Estheri ka pe e, amah pawh chu an khai hlum ta a.

⁸Tin, Juda-te hnênah i duh ang takin lal zungbuna nemin châr rawh; lal hminga ziak leh lal zungbuna nem leh châr chu tu mân an tidanglam thei lo a ni,” a ti a.

⁹Chutichuan, lal lehkhaziaktute chu chumi lai la la, thla thumna, Sivan thla ni sawmhnih leh ni thum niah chuan an ko va, Mordekaia thupêk ang chuan Juda-te hnênah te, hotute hnênah te, India aṭanga Ethiopia thlenga ram ṭhen hrang za leh sawmhnih leh pasariha ram awptute leh puipate hnêna thawn tûrin lehkha an ziak a, ram ṭhen tinah chuan anmahni lehkha ṭheuhvin, hnam tin anmahni ṭawng ṭheuhvin, Juda-te hnênah pawh an lehkha leh an ṭawngin an thawn a.

¹⁰Lal Ahasuera hmingin a ziak a, lal zungbunin an nem a, lehkha chu sakawr an phurhtîr a, ama vulh ṭhiau, lal tâna chhawr ṭhin sabengtung chak mi chunga chuangin an tlânpui a.

¹¹Tin, chu lehkhaah chuan lal chuan Juda-ho khaw tina awmte chu inpun khâwma lo invêng tûrin a ti a; eng mi pawh, khawi rama mi pawh, anmahni leh hmeichhia leh naupangte bei tûra lo thawk apiang chu lo beia that chimit vek tûr leh, an neih zawng zawng pawh rawksak tûrin a ti a.

¹²Lal Ahasuera ram ṭhen zawng zawng chungah he thil ti tûra Juda-te tâna ni ruat chu thla sâwm leh thla hnihna, Adar thla ni sâwm leh ni thum ni, Juda zawng zawng thah vek tûra ruat ni chu a ni.

¹³Tin, chumi lehkhaa thupêk chu, chumi nia an hmêlmate chunga phuba an lâk theihna tûra Juda-te chu inpeih diama an lo awm theih nân ram ṭhen zawng zawnga thawn chhuaha, mi zawng zawng hnêna puan tûr, tih a ni.

¹⁴Chutichuan, hmanhmawh takin lal thupêkin lal tâna chhawr ṭhin sabengtung chak mi chunga chuang lehkha tlânpuitute chu an chhuak a; tin, thupêk chu lal khawpui Susan-a puan chhuah a ni.

¹⁵Tin, Mordekaia chu lal puan, a dumpâwl leh a vâr inbelin, rangkachak lallukhum ropui tak leh puanzaisîn kawrfual senduk inbelin lal in ata chu a chhuak a; Susan khua chu an au dur dur a, an lâwm êm êm a.

¹⁶Juda-ho chuan êng te, lâwmna te, hlimna te, chawimawina te an nei.

¹⁷Lal thupêk leh lal thu tihtlûk thlenna ram ṭhen leh khua apiang chu an lâwmin an hlim êm êm a, ruai te an ṭheh a, awmni an kham a. Tin, chûng ram mite zînga tam tak chu Juda-ah an insiam a; Juda-te chu an lo hlauh tak avângin.