Read Mizo_Old_version Estheri 9 Bible Online

Estheri 9 - Mizo_Old_version bible

Estheri 9

¹Chutichuan, thla sâwm leh thla hnihna, Adar thla ni sâwm leh ni thum ni, Juda-ho hmêlmaten an chunga rorêl an beisei ni, lal thupêk anga an tih ni tûr chu a lo hnai ta a. Nimahsela, a leha lingin Juda-ten anmahni hawtute chunga ro an rêlna a lo ni ta zâwk a.

²Lal Ahasuera ram ṭhen zawng zawnga Juda-hote chu, an chhiatna zawngtu chunga kut thlâk tûrin an khuaahte chuan an pung khâwm a. Tu mân an chelh ta lo va, anmahni chu mi zawng zawngin an hlau ta a.

³Chumi ram ṭhena mi ṭha zawng zawng te, hotu te, ram awptu te, lal hnathawktute chuan Juda-te chu an ṭanpui ta a, Mordekaia an hlauh avângin.

⁴Mordekaia chu lal ina mi ropui tak a ni a, a hming chu an ram ṭhen zawng zawngah a thang ta bawk a; Mordekaia chu a ropui ta deuh deuh a ni.

⁵Tin, Juda-te chuan an hmêlmate chu khandaihin an sâm a, an that a, an tiboral a, anmahni hawtute chungah an duh ang angin an ti a.

⁶Lal in Susan-ah chuan Juda-ten mi zanga an that a, an tiboral a.

⁷Tin, Hamedatha fapa, Juda-te hmêlma Hamana fapate sâwm - Parsandatha te, Dalphona te, Aspatha te, Poratha te, Adalia te, Aridatha te, Parmasta te, Arisaia te, Aridaia te, Vaizatha te chu an tihlum a; râllâk sum erawh chu an khawih lo.

¹¹Chumi ni chuan lal khawpui Susan-a an thah zât chu lal hmaah an rawn thlen a.

¹²Tin, lal chuan lalnu Estheri hnênah, “Juda-te chuan lal khawpui Susan-ah hian mi zanga leh Hamana fapate sâwm an that a, an tiboral ta. Lalram ṭhen dangah chuan engtin tak ti ang maw? Eng nge i dîl dâwn le? Pêk i ni ang. Eng nge i la duh leh dâwn? Tih a ni ngei ang,” a ti a.

¹³Tin, Estheri chuan, “Lalin rem a tih chuan, Susan-a Juda-te hian vawiina thupêk ang bawk hian naktûkah pawh ti sela. Hamana fapa sâwmte chu khai hlumnaah khai kân ni rawh se,” a ti a.

¹⁴Tin, lal chuan chutianga ti tûr chuan thu a pe a; Susan-ah thupêk chu an puang a, Hamana fapa sâwmte chu an khai kâng a.

¹⁵Tin, Susan-a Juda-te chu Adar thla ni sâwm leh ni li ni pawhin an pung khâwm a, Susan-ah mi zathum an that a; nimahsela, râllâk sum chu an khawih lo.

¹⁶Tin, Juda dang lalram ṭhen tina awmte pawh an pung khâwm a, inchhanhim tûrin ṭan an khawh a, an hmêlmate lakah râlmuangin an awm a, anmahni hawtute zînga mi sîngsarih leh sângnga an that a; nimahsela, râllâk sum chu an khawih lo.

¹⁷Adar thla ni sâwm leh ni thum niah chu chu an ti a; tin, ni sâwm leh ni li ni chuan an châwl a, ruaiṭheh ni leh hlimna niah an siam a.

¹⁸Susan-a Juda-te erawh chu chumi ni, ni sâwm leh ni thum leh ni sâwm leh ni li ni chuan an pung khâwm a; ni sâwm leh ni nga ni chuan an châwl a, ruaiṭheh ni leh hlimna niah an siam a.

¹⁹Chu vâng chuan a ni, kulh nei lo khuatea Juda-te chuan Adar thla ni sâwm leh ni li ni chu hlimna leh ruaiṭhehna ni leh, ni ropui leh ei tûr inpêk tawnna niah an siam ni.

²⁰Tin, Mordekaia chuan chûng thil chu a ziak a, Lal Ahasuera ram ṭhente chhûnga Juda-te zawng zawng, lamhnai leh lamhlaa mite lehkha a thawn a,

²¹Adar thla ni sâwm leh ni li ni leh ni sâwm leh ni nga ni chu kum tin awmnia hman tûrin thu a pe a; chumi ni chuan Juda-te chu an hmêlmate laka râlmuanga an awm tâk avâng leh, chumi thlaa lungngaihna chu an tân lâwmnaa a chan tâka, ṭahna ni chu ni lâwmawm taka a lo chan tâk avângin; tin, ruaiṭheh ni leh hlimna ni leh chanvo inthawn ni leh mi retheite thilpêk ni atâna siam tûrin thu a pe bawk a.

²³Tichuan, an lo tih ṭan tawh sa ang leh Mordekaian an hnêna a thawn angin Juda-te chuan tih an tum ta a;

²⁴Agag mi Hamedatha fapa Hamana, Juda-te hmêlma chuan Juda-te chu tiboral tûrin a phiar a, Aienna a lo siam tawh diam si a, chu chu anmahni timang tûr leh tiboral tûra aienna a ni;

²⁵nimahsela, lal hmaa chu thu chu a lo thlen chuan suahsualthlâk taka Juda-te a phiarna chu ama lu chungah a lêt ang a, amah leh a fapate chu khai kân tûr an ni tih lehkhain thu a pe a ni.

²⁶Tin, chu aienna avâng chuan chûng nite chu Aien nite an ti a. Chutichuan, chûng lehkha thu zawng zawng avâng te, chûng thil lo thleng an hmuh avâng te, an chunga thil lo thleng avângte chuan,

²⁷Juda-te chuan anmahni chhanah leh an thlahte leh anmahni rawn bêl apiangte chhanah thlasik anga khêl lovin, chûng nite chu, lehkhathawna chuang ang leh a hun ruat ang tak chuan kum tin awmnia hmang tûrin an ti a;

²⁸tin, chûng nite chuan chhuan zawng zawnga chhûngkaw tinah, ram ṭhen tinah, khaw tinah an hre rengin awmniah an hmang tûr a ni; tin, chûng Aien nite chu Juda-te zingah ngaihthah mai tûr a ni lo va, chumi hriat rengna pawh an thlahteah a tâwp mai tûr a ni lo an ti a.

²⁹Chutichuan, Abihaila fanu, Lalnu Estheri leh Juda mi Mordekaia chuan Aien chungchânga lehkhathawn pahnihna chu tinghet tûrin thu nei takin an ziak a.

³⁰Tin, Ahasuera ram ṭhen za leh sawmhnih leh pasariha Juda-ho zawng zawng hnênah chuan Mordekaia chuan ṭha takin lehkha a thawn a.

³¹“Juda mi Mordekaia leh Lalnu Estheri thupêk ang leh, anmahni ngei pawhin anmahni leh an thlahte tâna chaw nghei leh ṭah ni tûra an lo ruat angin, hêng Aien nite hi a hun ruatah an serh tûr a ni,” tiin.

³²Aien kût hman dân chu Estheri thupêkin lehkhaah ziak a ni.