Read Mizo_Old_version Exodus 1 Bible Online

Exodus 1 - Mizo_Old_version bible

Exodus 1

¹Hêng hi Israela fapa Aigupta rama lûtte hming chu a ni; mi tin mahni chhûngte ṭheuh nên Jakoba hnênah chuan an kal a:

²Reubena te, Simeona te, Levia leh Juda te;

³Isakara te, Jebuluna leh Benjamina te;

⁴Dana te, Naphtalia te, Gada leh Asera te.

⁵Tin, Jakoba ṭhâlbea chhuak zawng zawngte chu mi sawmsarih an ni; Josefa zawng Aigupta ramah chuan lo awm tawh sa rêng a ni a.

⁶Tin, Josefa leh a unaute zawng zawng leh chûng chhuanho zawng zawngte chu an thi ta vek a.

⁷Tin, Israela thlahte chuan chi tam tak an thlah a, nasa takin an lo pung a, an lo tam ta êm êm mai a, an lo chak ta telh telh a; tin, chu ramah chuan an lo khat ta mup mai a.

⁸Tin, Aigupta ramah chuan Josefa hre lo, lal thar a lo awm ta a.

⁹Tichuan, a mite hnênah, “Ngai teh u, Israela thlahte hi kan aiin an tamin an chak tâk zâwk hi le;

¹⁰hawh u, anmahni hi tihhnathiamin i ti ang u; chuti lo chuan, an lo pung zêl ang a, nakinah indonate a lo awm hian, kan hmêlmate lamah an pakai ve hlauh ang a, min bei ang a, he ram aṭang hian an tlân chhuak hlauh dah ang e,” a ti a.

¹¹Chutichuan, an phurrita tirethei tûrin an chungah hnathawk vêngtute an ruat ta a. Tichuan, Pharaoa tân bungraw dah khâwmna tûr Pithom leh Rameses khuate an siam a.

¹²Nimahsela, anmahni chu an tihretheih nasat poh leh an pung nasa deuh deuh va, an darh zau ta deuh deuh va. Tin, Israela thlahte avâng chuan Aigupta-ho chu an lungngai ta a.

¹³Tin, Aigupta mite chuan Israela thlahte chu rim takin an thawhtîr a.

¹⁴Hnathawh hautak tak, lung chârna leh leirawhchante siamtîr leh lovah hna tinrêngte hrehawm taka thawhtîrin an chhawr vak vak a; an thawhna zawng zawngah chuan rim takin an chhawr zêl a.

¹⁵Tin, Aigupta lal chuan Hebrai nau chhar mite chu a bia a, chu mite chu pakhata hming Siphraii a ni a; tin, pakhata hming chu Puaii a ni a:

¹⁶an hnênah chuan, “Hebrai hmeichhiate nau hrinna hmuna nau in chhar hunin, mipa fa a nih chuan tihlum zêl ang che u; hmeichhia a nih erawh chuan zuah tûr a ni,” a ti a.

¹⁷Nimahsela, nau chhar mite chuan Pathian an ṭih a; tichuan, Aigupta lal thupêk ang chuan an ti duh lo va, mipa fate chu an humhim ta zêl zâwk a.

¹⁸Tin, Aigupta lal chuan nau chhar mite chu a kohtîr a, an hnênah chuan, “Engati nge hetianga thil in tiha, mipa fate chu in humhim zêl le?” a ti a.

¹⁹Tin, nau chhar mite chuan Pharaoa hnênah, “Hebrai hmeichhiate hi Aigupta hmeichhiate ang an nih ve loh vâng a ni; anniho hi zawngin an sam êm bik a; tichuan, nau chhartu lo thlen hma hian an lo hring tawh ṭhîn a ni,” an ti a.

²⁰Chutichuan, Pathianin nau chhar mite chu a tiṭha ta hle a; tichuan, mite chu an lo tam ta hle a, an lo chak ta telh telh a.

²¹Tin, heti hi a ni a, nau chhar miten Pathian an ṭih avângin chhûngkua neiin a siam ta a.

²²Tin, Pharaoan, “Mipa lo piang apiang chu luiah in paih ang a; tin, hmeichhia apiang chu in humhim zêl tûr a ni,” tiin, a mite zawng zawng chu thu a pe a.