Read Mizo_Old_version Exodus 10 Bible Online

Exodus 10 - Mizo_Old_version bible

Exodus 10

¹Tin, LALPAN Mosia hnênah, “Pharaoa hnênah va lût rawh; a thinlung leh a chhiahhlawhte thinlung chu ka tihkhauhsak tawh e, hêng ka chhinchhiahnate hi an zîngah ka entîr theihna tûrin;

²tin, nang pawhin i fa leh i fa fate benga Aigupta ram chunga thil ka tih zia leh, an zînga ka chhinchhiahnate ka tih zia hi i hrilh theihna tûrin; kei hi LALPA chu ka ni tih in hriat theih nân,” a ti a.

³Tin, Mosia leh Arona chu Pharaoa hnênah an va lût a, a hnênah, “LALPA, Hebraite Pathianin, ‘Ka hmaah eng chen nge inngaitlâwm duh lova awm i tum ni? Ka mite hian ka rawng an bâwl theih nân chhuahtîr rawh.

⁴Ka mite hi i chhuahtîr phal loh zawngin, ngai teh, naktûkah i ram chhûngah hian khaukhuapte ka rawn lêntîr ang a;

⁵tin, lei chung hi an dâp vek ang a, tu mahin lei rêng rêng hi an hmu thei lo vang; tin, rialin a tihchhiat bâk, in hnêna la awmate hi an ei ang a, phûla in thing ṭo apiangte chu an ei vek ang.

⁶Tin, i inte leh i chhiahhlawhte zawng zawng inte leh, Aigupta mi zawng zawng inte chu a khat vek ang; i thlahtute leh i thlahtute thlahtute pawhin, khawvêla an lo awm achin tûn thleng pawhin, chutiang chu an la hmu ngai lo a ni,’ a ti e,” an ti a. Tin, a lehhawi a, Pharaoa hnên ata chu a chhuak ta a.

⁷Tin, Pharaoa chhiahhlawhte chuan a hnênah, “He mi hi kan tân eng chen nge maw thanga a awm dâwn le? Hêngho hian LALPA an Pathian rawng an bâwl theih nân kaltîr ta mai che maw le. Aigupta ram hi tihchhiat a nih tawh hi i la hre lo vem ni?” an ti a.

⁸Tin, Mosia leh Arona chu Pharaoa hnênah an hruai leh a; tin, an hnênah, “Kal ula, LALPA in Pathian rawng chu va bâwl tawh u. Amaherawhchu, tute nge ni kal tûr chu?” a ti a.

⁹Tin, Mosian, “A pui a pangin kan kal ang; kan fapate leh kan fanute nên, kan berâm rualte leh kan bâwng rualte nên kan kal ang; LALPA hnênah kan kût ngei tûr a ni si a,” a ti a.

¹⁰Tin, ani chuan an hnênah, “LALPA chu in hnênah awm ang hmiang! In fanau tê tête nên chuan ka kaltîr mawlh ang che u le; inngaihtuah rawh u khai, thil sual tih in tum a nih hi le.

¹¹Hnai lo ve! Nangni mipaho erawh chu kal ula, LALPA rawng chu bâwl rawh u; chu chu alâwm in duh,” a ti a. Tin, Pharaoa hnên ata chu an hnawt chhuak ta a.

¹²Tin, LALPAN Mosia hnênah, “Aigupta ram chungah hian khaukhuapte rawn lêntîr tûrin i kut phar rawh, Aigupta ramah hian an lo chhohva, he rama thlai tinrêng, rial den chhiat bâk zawng zawngte nên lam pawha an ei theihna tûrin,” a ti a.

¹³Tin, Mosian Aigupta ram chungah chuan a tiang chu a han lek a, LALPAN chumi ni, nilêng leh zankhuain chumi ramah chuan khawchhak thli a rawn tlehtîr a; tin, a tûkah chuan khawchhak thli chuan khaukhuap a rawn lên a.

¹⁴Tin, khaukhuapte chu Aigupta ram zawng zawng chungah chuan an lêng a, Aigupta ram chhûng zawng zawngah chuan an fu a. An tam êm êm mai a; tûn hmain khaukhuap chutiang rêng rêng a la awm ngai lo va, tûn hnuah pawh chutiang rêng rêng chu a awm leh tawh lo vang.

¹⁵Lei chung zawng zawng hi an dâp vek mai si a; tichuan, ram chu a thimin a thim mup mai a ni; tin, rial den chhiat bâk, chumi rama thlai tinrêng leh theirah zawng zawngte chu an ei vek a. Tichuan, Aigupta ram chhûng zawng zawngah chuan lovah thil hring rêng rêng, thing pawh, thlai pawh a awm ta hauh lo mai a.

¹⁶Tin, Pharaoa chuan Mosia leh Arona chu hmanhmawh takin a kohtîr a, an hnênah, “LALPA in Pathian chungah leh nangmahni chungah thil ka lo tisual ta e.

¹⁷Chutichuan, ka sual hi tûn ṭumah chauh hian ngaidam ang che, ka ngên a che, he thihna hi mi lâk bosak phawt mai tûrin LALPA in Pathian hnênah ngên ang che,” a ti a.

¹⁸Tin, Pharaoa hnên ata chu a kal chhuak a, LALPA hnênah chuan a ngên ta a.

¹⁹Tin, LALPA chuan khawthlang thli na tak mai a rawn tlehtîr a, chu chuan khaukhuapte chu a lên a, Tuifinriat Senah a lên thla ta vek a; Aigupta ram chhûng zawng zawngah chuan khaukhuap pakhat mah a awm ta lo va.

²⁰Nimahsela, LALPAN Pharaoa thinlung chu a tikhauh va; tichuan, Israela thlahte chu a chhuahtîr phal ta lo va.

²¹Tin, LALPAN Mosia hnênah, “Vân lamah i kut han lek rawh, Aigupta ram chungah hian a lo thim khupa, ai mit thlawn ang maia a lo thimna tûrin,” a ti a.

²²Tin, Mosia chuan a kut chu vân lamah a han lek a, Aigupta ram chhûng zawng zawng chu ni thum chhûng zet a thim ta mup a.

²³Tu mah rêng rêng an inhmu thei ta lo va, tu mah mahni hmun ata ni thum chhûng zet chu an tawlh sawn thei lo bawk a. Israela thlahte zawng zawng awmna erawh chu a êng vek a.

²⁴Tin, Pharaoan Mosia a kohtîr a, a hnênah, “Kal ta ula, LALPA rawng chu va bâwl tawh u; in beram rualte leh in bâwng rualte erawh chu awm sela; in fanau tê tête pawh in hnênah kal ve rawh se,” a ti a.

²⁵Tin, Mosian, “LALPA kan Pathian hnêna kan inthawi theihna tûrin inthawina tûrte leh hâlral thilhlan tûrte chu nangin kan kutah min pe tel ve bawk tûr a ni.

²⁶Kan rante chu kan hnênah an kal ve bawk tûr a ni; ran rêng rêng chu pakhat mah kan hnutchhiah lo vang. Chûng zînga mi chu LALPA kan Pathian rawngbâwl nân kan hman ngei ngei tûr a ni si a; chumi hmun kan va thlen hma loh chuan engin nge LALPA rawng kan bâwl ang tih kan la inhre lo a ni,” a ti a.

²⁷Nimahsela, LALPAN Pharaoa thinlung chu a tikhauh va, a chhuahtîr phal ta lo va.

²⁸Tin, Pharaoan a hnênah, “Ka hnên ata hi chhuak daih la, fimkhur rawh khai, ka hmêl rêng rêng rawn hmu tawh hlek suh; ka hmêl i hmuh ni la la chuan i thi ngei tûr a ni,” a ti a.

²⁹Tin, Mosia chuan, “I sawi dik zet mai; i hmêl zawng hmuh ni ka nei leh tawh lo vang e,” a ti a.