Read Mizo_Old_version Exodus 11 Bible Online

Exodus 11 - Mizo_Old_version bible

Exodus 11

¹Tin, LALPAN Mosia hnênah chuan, “Pharaoa chungah leh Aigupta ram chungah hian vawi khat chu hri ka han lêntîr leh ang e; chumi hnuah zawng a chhuahtîr tawh ang che u. A chhuahtîr vêk vêk che u zawngin heta ta hi a hnawt chhuak daih mai ang che u.

²Chutichuan, mipuite beng hriatah thu va sawi rawh, mipa leh hmeichhe tinin an vêngte chu tangkaraw incheina leh rangkachak incheinate dîl rawh se,” a ti a.

³Tin, LALPAN mite chu Aigupta mite a khawngaihtîr ta a. Chu chang a ni lo va, Mosia chu Aigupta ramah chuan, Pharaoa chhiahhlawhteho ngaihah leh mipuite ngaihah mi ropui tak a ni a.

⁴Tin, Mosia chuan, “LALPAN heti hian a ti, ‘Zanlai vêlah chuan Aigupta ram chhûngah hian ka lo kal tlang ang a;

⁵tichuan, Aigupta rama fa tîr zawng zawng, lalṭhutphaha thu Pharaoa fa tîr aṭanga buh râwt sawmna bula awm bawihnu fa tîr lam pawhin an thi ang, ran piang hmasa ber zawng zawngte nên.

⁶Tin, Aigupta ram chhûng zawng zawngah chuan ṭahna nasa tak a awm ang a, chutianga nasa rêng rêng a la awm ngai lo va, chutiang rêng rêng chu a awm leh tawh hek lo vang.

⁷Nimahsela, Israela thlahteho zawng mihring leh sa lamah rêng rêng ui pawhin a lei a phût lo vang; LALPA chuan Aigupta mite leh Israel mite hi a thliar ngei a ni tih in hria ang.

⁸Tin, hêng i chhiahhlawh zawng zawngte hi ka hnênah an lo chhuak ang a, “Chhuak rawh, i hnung zuitute zawng zawng nên hian,” tiin ka hmaah an kûn ang; tin, chumi hnuah chuan ka chhuah ang,’ tiin,” a ti a. Tin, Pharaoa hnên ata chu thinrim zet maiin a chhuak ta a.

⁹Tin, LALPAN Mosia hnênah chuan, “Pharaoan in thu a pawm lo vang; ka thil makte Aigupta ramah hian tihpuna a awm theih nân,” a ti a.

¹⁰Tin, Mosia leh Arona chuan Pharaoa hmaah chuan chûng thil mak zawng zawng chu an ti a; tin, LALPAN Pharaoa thinlung chu a tikhauh va, Israela thlahte chu a ram ata a chhuahtîr phal lo va.